1 Musa awaduganyaga want'hu wose wa Izilaeli, akawagamba "Aya yose nayo Zumbe awasigiileni mdamanye. 2 Kwa mazuwa mtandatu nomdamabye ndima zenyu mna zuwa dya mfungate ni zuwa dya kuhumula idyo Dikukile kwa Zumbe. Yeyose naadamanye ndima mwe dizuwa idyo naakomigwe. 3 Msekukweleza moto mwe zikaya zenyu mwe dizuwa idyo dyo kuhumula."

4 Musa awagambaga want'hu wose wa Izilaeli, "Ino niyo imbuli Zumbe Mnungu awalagize mdamanye. 5 Nomlave mwo ugoli wenyu malavo ya kumwink'ha Zumbe Mnungu. Kila mnt'hu mta moyo wedi amlavile Zumbe Mnungu malavo ya zahabu na masawa na shaba, 6 nyuzi za mazoya ya ngoto ya buluu na zambalau na ink'hundu, kitambala chedi king'aile, na mazoya ya mbuzi, 7 nk'hingo za ndolome zigeligwe langi ink'hundu nank'hingo ihuhile ya kala dya kwebahali na vihant'hi va mti wa msaji, 8 mavuta kwajili ye vimuli na vint'hu vina mhemp'he kwajili ya mavuta ya kuhaka na kwajili ya ubani una mhemp'he, 9 maiwe ya sadoniki na maiwe matuhu kwa kuhambila kizibao na kafuko ka mwe kifua.

10 "Kila mnt'hu umwenyu mta umanyi wa ndima eze adamanye kila kint'hu kiya Zumbe asiigile. 11 Kudamanya Dihema Dikukile, ngubiko yakwe ne dipazia dyakwe na mikiki yakwe na pau zakwe ne visimiko vakwe, 12 Disanduku dye Ndagano hamwenga ne mikimailo yakwe na hant'hu he zimbazi ne dipazia dya hant'hu hakukise, 13 meza ne mikimailo yakwe hamwenga na vyombo vakwe vosene mikate iikigwe hameso ha Zumbe Mnungu, 14 kinala che vimuli hamwenga ne vyombo vakwe vose ne vimuli vakwe na mavuta yakwe, 15 kilingo cho kutambikila kwa koka ubani ne mikimailo yakwe na mavuta ya kuhaka no ubani una mhemp'he ne dipazia dyo lwivi dye dihema dikukile, 16 kilingo cha nt'hambiko ya kokwa no wavu we shaba ne mikimailo yakwe hamwenga na vyombo vakwe vosene dikanga ne visimiko vakwe. 17 hamwenga na mapazia yo ua no mikimailo yakwe ne visimiko vakwe ne dipazia dye nk'hili yo ua, 18 ne vigingi ve Dihema Dikukile ne vigingi vo ua hamwenga ne zisigi zakwe, 19 mavalo yasumigwe vedi kwa ndima ya hant'hu hakukile ni mavalo yakukile ya mlavant'hambiko Haluni na wanawe kwa ndima yo ulavant'hambiko."

20 Ivo want'hu wose wa Izilaeli niyo wahalawa ha meso ha Musa, 21 naho yeyose aone vedi kudamanya ivo naho elelwe kudamanya ivo ezaga na malavo yakwe kwa Zumbe kwa uzesi we Dihema Dikukile na kwa undima wakwe na kwajili ye zisuke zo ulava nt'hambiko. 22 Ivo wose waonaga kunda ni vedi, wagosi kwa wavele wezaga na vint'hu va kukehambila visaufu na heleni na np'hete na salu za singo na mahambo yose ya zahabu, kila mnt'hu niyo amlavila Zumbe Mnungu kint'hu cha zahabu. 23 Kila mnt'hu mta mazoya ya ngoto ya langi ya buluu ne zambalau ne ink'hundu hegu kitambala king'aile hegu nk'hingo ihuhile ya kala dya kwebahali hegu ya mbuzi igeligwe langi ink'hundu nawavigala. 24 Wose adahaga kulava masawa hegu shaba wegalaga malavo yawe kwa Zumbe, naho mnt'hu yeyose andile ne mbao za msaji zadahile kudamanya ndima yoyose naye egalaga. 25 Wavele wose wandile na umanyi wa kusuma wegalaga nyuzi za vitambala ving'aile na nyuzi za buluu na zambalau na nyuzi za mazoya ya ngoto yenk'hundu izo wadamanyaga. 26 Naho wavele wabilingaga nyuzi za mazoya ya mbuzi. 27 Vilongozi wegalaga maiwe ya langi na maiwe matuhu kwa kuhambila kizibau na kafuko ka mwe kifua, 28 naho nawegala vint'hu va mhemp'he na mavuta ya kukwelezela vimuli na mavuta ya kuhaka na ubani una mhemp'he. 29 Waizilaeli wose na wagosi kwa wavele na awo wazumile mwe mioyo yawe kwigala chochose kwa ndima ya Zumbe Mnungu iyo amlagize Musa idamanywe, wegalaga vint'hu ivo kwa kuunga wenye enga malavo ya kumwink'ha Zumbe Mnungu.

30 Musa awagambaga Waizilaeli, "Kauleni! Zumbe Mnungu kamsagula Bezaleli, mwana ywa Uli mwezukuluwe dya Huli ywe dikabila dya Yuda. 31 Kammemeza udahi wakwe na mizungu na umanyi na ubala mwe zindima zo umanyi, 32 mwo kudamanya usani na kubunk'hula vo kudamanya mwe vint'hu kulawa mwe zahabu na masawa na shaba, 33 asongole maiwe na kuyahamba na vihant'hi kwa ndima zo umanyi. 34 Naho kamlongoza Bezaleli na Oholiabu na mwana ywa Ahisamaki ywa kabila dya Dani wawahinize watuhu. 35 Kawenk'ha umanyi wa kudamanya kila ndima ihengi ikudamanywa ni wamanyi na watula mizungu na wakubilinga nyuzi za suke zing'aile na nyuzi za buluu na za zambalau na mazoya ya ngoto yenk'hundu na suke nt'huhu. Wakudaha ndima zose zihengi naho ni wamanyi mwo kutula mizungu.