1 Mwe dizuwa dya nk'hongo mwo mwezi wa katatu aho Waizilaeli weze walawe Misili, mwe dizuwa iidyo wabulaga kwe dijangwa dya Sinai. 2 Weze watambe kulawa Lefidimu wabulaga kwe dijangwa dya Sinai, niyo waika nk'hambi he diwandamo dyo mnima, 3 ivo Musa akwelaga kwo mnima akadugane na Mnungu.

Zumbe amwitangaga Musa kudya kwo mnima akamgamba awagambile imp'huga ya Yakobo awo Waizilaeli kugamba, 4 "Mniona miye, Zumbe Mnungu, ivo niwatendile Wamisili, naivo niwenuleni mwa mawawa enga ya dege nyika no kuwegalani kwangu. 5 Ivo elo, uneva mna niva kiya hulonga no kuitoza Indagano yangu nomnde want'hu wangu wasagulwe mwe si zose. Ikindedi si zose zangu, 6 nomnde useuta wa walava nt'hambiko wangu isi nayo neikuke. Izi nizo zimbuli nouwagambile Waizilaeli." 7 Musa agendaga kuwetanga wadala wa want'hu no kuwagambila zimbuli zose asigiilwe ni Zumbe Mnungu. 8 Want'hu wose wazumilaga kwa hamwenga wakagamba, "Nekidamanye mbuli zose asigiile Zumbe Mnungu." Musa kamgambila Zumbe Mnungu uhituzi uwo wa want'hu. 9 Zumbe Mnungu niyo amgamba Musa, "Nenize kwako mwe divunde dititihale, vileke want'hu wanive halonga na weye, niho nawakuhuile kukongela ivi haluse no kugendeela. "

Niyo Musa amgambila Zumbe Mnungu uhituzi uwo wa want'hu alongile, 10 Zumbe niyo amgamba Musa, "Ita kawagambe want'hu wakekuke dielo na luvi naho wafigise suke zawe, 11 wakeike lumwe kwa zuwa dya katatu, kwaviya kwe dizuwa dya katatu neniseele mwo mnima wa Sinai, iivi want'hu wose wakaniona. 12 Uwaikile mihaka want'hu awo nt'hendelo zose zo mnima, uwagambe wase kwombokanya no kukwela kwo mnima kulanga naho wase kuusogeela. Yeyose akuunga aukwafe mnima naakomwe. 13 Mnt'hu yeyose ase kuukwafa mnima uwo, naatoigwe maiwe hegu nalasigwe misale. Mnt'hu hakuungwa kuukwafa, naho imbuli ino ni kwa want'hu ne viumbwa vituhu vose, nevikomwe. Mna umwo digunda dikaila want'hu wose niho nawausogeele umnima."

14 Musa aseelaga kulawa kwo mnima akawabasa want'hu niyo awakukiza woho nawo niyo wafigisa zisuke zawe, 15 niyo awagamba, "Keikeni lumwe kwa kisindo, naho msekugona na wavele."

16 Mtondo mwe dizuwa dya katatu kwandaga na tint'himo na lumwemwe na vunde dititihale mwo mnima. Naho kwandaga na gunda dyailisaga dyawatendaga want'hu wandaga he nk'hambi wazingize. 17 Musa awalavaga want'hu kwe nk'hambi vileke wakadugane na Mnungu. Awo want'hu wakimalaga he diwandamo dyo mnima. 18 Mnima wose wa Sinai wagubikagwa ni mosi kwaviya Zumbe Mnungu aseelaga mwo mnima uwo mwo moto. Mosi uwo wandaga enga mosi wa nunda ya moto, niyo kwanda na kisingisa kikulu mwo mnima. 19 Digunda dyagendeelaga kuilisa, Musa alongaga, Mnungu naye amhitulaga kwa tint'himo. 20 Zumbe Mnungu eze aseele kwo lunenengwa lwo Mnima Sinai amwitangaga Musa kudya kwo mnima, niyo Musa akwela, 21 naho Zumbe Mnungu amgambaga Musa, "Seela hasi ukawagambe want'hu wasekujink'ahanya weze kwa Zumbe wakaule, wengi nawanakomwe. 22 Walavant'hambiko wakunisogeela iviyaiviya waungwa wakekukize woho wenye cheivo miye Zumbe nneniwabanange."

23 Musa niyo amgamba Zumbe, "Want'hu hawalekelwe kukwela kwo mnima wa Sinai kwaviya weye nokuki kanya ukagamba, ‘Ika mihaka kuuzunguluka mnima naho manyeni kugamba uno ni mnima wa Zumbe.’ "

24 Zumbe Mnungu niyo amgamba Musa, "Seela ukeze na Haluni, mna usekuwalekela walava nt'hambiko na want'hu watuhu wakwele uku sema nna wabanange." 25 Ivo Musa aseelega kwa want'hu no kuwagambila yalongigwe ni Zumbe Mnungu.