1 Fyo dyose dya Waizilaeli dyatambaga kulawa kwe dijangwa dya Sini, wagendaga wakaika nt'hulwe viligane na ivo Zumbe Mnungu asigiilaga, niyo waika nt'hulwe Lefidimu, hant'hu handaga haheina mazi ya kunywa. 2 Ivo want'hu wamlabiilaga Musa wakamgamba, "Kink'he mazi kinywe."

Musa niyo awagamba, "Nk'humbizi yai na miye? Nii mwamgeza Zumbe Mnungu?"

3 Want'hu waonaga nk'hilu hadya niyo wakonga kumkalaliza Musa wakamgamba, "Nii kukilava Misili suwe na wana wetu ne mifugwa yetu vileke ukikome ne nk'hilu?"

4 Musa niyo amwiila Zumbe Mnungu akagamba, "Niwatende vivihi want'hu awa kwaviya waunga wanitowe maiwe."

5 Zumbe Mnungu niyo amgamba Musa, "Naho guha wamwenga mwa wadala wa Waizilaeli, guha ne ngoda idya wautoelaga mto wa Naili niyo waita. 6 Miye nenikimale kulongole kwako ho luwe ho Mnima wa Helobu. Lutowa uluwe lulawe mazi vileke want'hu wanywe." Niyo Musa adamanya ayo hameso ha wadala wa Waizilaeli.

7 Aho hant'hu henk'higwa zina niho Masa naho Meliba, kwaviya Waizilaeli watendaga nk'humbizi no kumgeza Zumbe Mnungu wakagamba, "Ivi Zumbe ehamwenga na suwe hegu bule?"

8 Wamaleki wezaga niyo watowana na Waizilaeli uko Lefidimu. 9 Niyo Musa amgamba Yoshua. "Sagula wagosi mwa want'hu wetu luvi wakatowane na Wamaleki. Luvi miye nenikimale kwo lunenengwa lwo lugulu nitozile ingoda ya Mnungu mwo mkono." 10 Yoshua atendaga enga viya agambilwe ni Musa niyo watowana na Wamaleki, Musa na Haluni na Huli waitaga kwo lunenengwa lwo lugulu. 11 Waizilaeli wandaga wahumi umwo Musa andaga kenula mkono wakwe, mna ana useleza Wamaleki wawahumaga. 12 Mna mikono ya Musa ize isokele niyo waguha iwe no kumwikila adikaile. Haluni na Huli wainulizaga mikono ya Musa kulume na kumoso, niyo mikono yakwe yapata ludole msi wose. 13 Yoshua na want'hu wakwe wawahumaga watowani wa Wamaleki kwa kuwasenga mabamba

14 Zumbe niyo amgamba Musa, "Wandika imbuli ino mwe kitabu inde lukumbusa, naho uyalonge Yoshua eve kugamba neniwabanange pele Wamaleki wose mwe isi." 15 Musa aduganyaga maiwe na kuyaumbika kunda nunda kwa kulavila nt'hambiko, niyo akitanga, "Zumbe niye bendela yangu." 16 Agambaga, "Inula ibendela ya Zumbe! Zumbe Mnungu naatoane na Wamaleki mwe vyeleko vose!"