1 Izi zose nizo zimbuli alongaga Zumbe Mnungu akagamba. 2 "Ni miye Zumbe Mnungu ywenyu nawalavaga mwe isi ya Misili kudya mwandaga watumwa.

3 "Usekunda na milungu mituhu mna miye.

4 "Usekukedamanyila hili dikukeiga na kint'hu chochose kikwe mbingu hegu kihasi he isi hegu ki mwa mazi hasi ye isi. 5 Usekudifunamila na kudivika, kwa viya ni miye Zumbe Mnungu ywako, ni Mnungu mta finju, nawatowa wana kwa masa ya watati zawe, mwe cheleko cha katatu na cha kane cha wadya wakuniihiya. 6 Mna nalagisa lukunde lwangu kwa vyeleko maalufu na ma alufu wano lukunde kwangu no kudamanya viligane ne zisigilizi zangu.

7 "Usekuditambula zina dya Zumbe Mnungu ywako kwa mbuli hei hali, kwaviya Zumbe hamuone hana masa mnt'hu yeyose akuditambula dizina dyangu kwa mbuli heihali.

8 "Udikumbukile Dizuwa dya Kuhumula naho umanye kugamba ni zuwa dya Zumbe. 9 Udamanye zindima zako zose mwa mazuwa mtandatu, 10 mna mwe dizuwa dya mfunagate ni Zuwa dya Kuhumula naho ni Zuwa dya Zumbe Mnungu ywako. Usekudamanya ndima yeyose weye hegu mwanao yeyose hegu mtumwa ywako yeyose hegu mfugwa ywako hegu mgeni emwo mzi wako. 11 Kwaviya mwa mazuwa ayo mtandatu Zumbe aumbaga mbingu ne isi ne bahali ne viya vimndani mwawe, niyo ahumula mwe dizuwa dya mfungate. Ivo Zumbe Mnungu adivikilaga Dizuwa idyo dyo Kuhumula no kuditenda dikukile.

12 "Uweve welesi wako vileke wikale mazuwa mengi mwe isi hwik'hile miye Zumbe Mnungu ywako.

13 "Usekukoma.

14 "Usekugenda na mvele ywa mwenye.

15 "Usekubawa.

16 "Usekumziga mnt'hu.

17 "Usekumunk'hilwa ni nyumba ya mwenye hegu mvele ywakwe hegu mtumwa ywakwe hegu ng'ombe yakwe hegu mp'hunda yakwe hegu chochose kiya ananacho."

18 Want'hu weze waone ditint'himo no lumwemwe no kwiva imiiile ye digunda na ivo mnima wandaga ukalava umosi, wogohaga na kuzingiza niyo wakimaila kwa luhale. 19 Wamgambaga Musa, "Longa na suwe, naswe nekikutegeleze, mna usekumleka Mnungu alonge na suwe sema kinabanike."

20 Niyo Musa awagamba, "Msekogoha, kwaviya Mnungu keza kuwagezani mnde ne wogofi naye vileke msekudamanya wavu." 21 Umwo want'hu wagendeelaga kukimala kwa luhale umwo Musa andaga akasogeela divunde diya dititihale kudya andaga Mnungu.

22 Naho Zumbe amgambaga Musa, Wagambe Waizilaeli, "Muwona wenye ivo nilongile na nyuwe kulawa kwe mbingu. 23 Msekukedamanyila milungu ya masawa na milungu ya zahabu niyo mwanivika hamwenga na yoho. 24 Mnidamanyile hant'hu ha kunilavila nt'hambiko. Mnilavile malavo ye nt'hambiko uumwo na malavo yo utondowazi ye zingoto zenyu ne zing'ombe naho hohose hadya neniditende dizina dyangu dikumbukilwe, nenize kwenyu na kuwavikila. 25 Uneva mnanizengela hant'hu ha kumvika Mnungu kwa maiwe, msekuyasongola kwaviya mnayasongola na kilama cho kusongoela heinde yedi kwangu. 26 Msekuika vibo umwo mkanizengela, kugamba vinase kuuona umbwigili umwo akakwela mnanga."