1 "Kwa kongezela, dihema noudamanye dinde na mapazia mlongo yafumigwe kwa kitambala king'aile yedi na nyuzi za buluu zitile kubilingwa na nyuzi za zambalau na zink'hundu. Mapazia ayo yahambigwe na viumbwa vina mawawa vikale enga makelubi. 2 Mapazia yose yaligane, utali wawe unde mp'hima milongo miidi na kane, no uzangalamu wakwe unde mp'hima kane. 3 Mapazia amashano yalunganywe hamwenga, mashano matuhu nayo yalunganywe hamwenga idi na idi. 4 Udamanye matasi ya buluu mwe mp'hindilo ye dipazia dya nk'hongo, naho udamanye iivo mwe yadya mapazia matuhu. 5 Udamanye matasi milongo mishano mwe dipazia dimwenga naho udamanye matasi milongo mishano mwe mp'hindilo ye dipazia dimwe mapazia milongo mashano ya kaidi matasi ayo yakaulaeni. 6 Udamanye nduwano milongo mishano za zahabu zikuunga zilunganye hamwenga mapazia vileke dihema dinde dimwenga.

7 "Udamanye mapazia mlongo na dimwenga ya mazoya ya mbuzi, ugubikile dihema dikukile. 8 Mapazia yose yaligane. Kila pazia dinde na utali wa mp'hima mlongo na nt'hatu, uzangalamu wakwe unde enga mp'hima mbili. 9 Ayo mapazia mashano uyalunge hamwenga, yadya mtandatu nayo uyalunge hakwe. Pazia dya mtandatu udibilinge kulongole ye dihema. 10 Noudamanye matasi milongo mishano mwe mp'hindile ye dipazia dizigiile mwa ayo mapazia yalunganywe hamwenga, naho udamnye matasi milongo mishano mwe mp'hindilo ye dipazia dizigiile mwe ayo matuhu. 11 Udamanye nduwano milongo mishano za shaba no kuzigela mwa matasi yadya vileke mapazia yande pazia dimwenga mwe dihema. 12 Kiya kipande kisigale che dipazia che dihema, dilebetu disigale nedinde dikahowela kunyuma ye dihema. 13 Nusu ye mp'hima ye nt'hendelo imwenga neidya nt'hendelo ya kaidi, zo utali we dipazia, nouziholeze uku na uku vileke zigubike dihema.

14 "Udamanye ngubiko mbili nt'huhu ze dihema, zidamanywe kwa nk'hingo ihuhile ya kala dya kwebahali zisisigwe langi ink'hundu, mnanga mwakwe wiike ngubiko idamanywe kwa nk'hingo ya kala dya kwe bahali hediina mazoya.

15 "Dihema Dikukile udidamanye kwa fulemu idamanywe kwa maziti ya misaji. 16 Utali wa kila fulemu imwenga neinde mp'hima mlongo, vizingiti vakwe nevinde mp'hima imwenga na nusu, 17 kila mkimailo unde na nyimi mbili hasi zo kulunganyila, naho ivo nivo noudamanye mwe fulemu yose ye dihema. 18 Ivi nivo noudidamanye dihema, fulemu milongo miidi kwe nt'hendelo ya kwa mwenyemzi, 19 naho udamanye visimiko milongo mine va masawa, kila fulemu inde na visimiko viidi, naho zinyimi ze ziulemu vingile mwe kizingiti vakwe viidi. 20 Damanya fulemu milongo miidi kwe nt'hendelo ya mkoma mahanya ye dihema 21 na visimiko vawe milongo mine vidamanywe kwa masawa, visimiko viidi hasi yo lubao lwa nk'hongo, visimiko viidi vituhu hasi ye fulemu int'huhu. 22 Udamanye fulemu mtandatu kwe nt'hendelo yo usweelo wa zuwa we ndihema, 23 naho udamanye fulemu mbili, imwenga mwa kila mp'hembe ya kunyuma ye dihema. 24 Fulemu mbili zikwe mp'hembe zisekulunga hasi mna zilunganywe kulanga. Mnanga mwa kila fulemu ye mp'hembe kunde na mp'hete mbili za zahabu vileke zitoze ivizingiti. 25 Naivo nokunde na fulemu mnane na visimiko mlongo na mtandatu va masawa hasi ye kila fulemu.

26 "Udamanye mp'hapi mlongo na mishano ya msaji, mishano nayo kwajili ya fulemu kwe nt'hendelo imwenga ye dihema, 27 mishano kwe nt'hendelo ya Kasikazini ye dihema, mishano mituhu kwe nt'hendelo ya Kwa mwenye mzi ye dihema mishano mituhu kunyuma ye dihema usweelo wa zuwa. 28 Mp'hapi ya hagati yomboke hagati ye fulemu, kulawa uheelo we dihema kuita uheelo mtuhu. 29 Fulemu zose zikizige zahabu akajika zisopeke mwe zibangili ze zahabu zikutozeleza zimp'hapi izo zikizigwe zahabu.

30 "Dihema idyo udidamanye vikuligana ne mliganyizo ulagiswe kudya kwo mnima.

31 "Udamanye pazia tuhu dya kitambala chedi king'aile, Nouditulume vedi kwa viumbwa vina mawawa vikale enga makelubi kwa langi za buluu na zambalau na zink'hundu. 32 Akajika noudihweleze mwe mikimailo mine ya msaji ikizigwe zahabu nduwano zakwe nezinde za zahabu mwe visimiko vakwe ivine va masawa. 33 Ukajika nanika dipazia idyo hasi ye zinduwano. naho wiike Disanduku dye Ndagano kunyuma ye dipazia. Dipazia diya nedipange idihema, Hant'hu Hakukile na Hant'hu Hakukise 34 Nowiike ngubiko ikwitangwa hant'hu he zimbazi mnanga mwe Disanduku dye Ndagano kundani ya hant'hu Hakukise. 35 Idya imeza yo msaji nowiike kuse ye dipazia mkoma mahanya ye Dihema Dikukile, niyo waika kinala che vimuli kuse yakwe kwe nt'hendelo ya Kusini.

36 "Udamanye pazia tuhu dya kitambala chedi kinga'ile kifumigwe kwa nyuzi za langi za buluu na zambalau na zink'hundu na kitambala king'aile kisumigwe vedi. Idi nedinde he nk'hili ye dihema. 37 Dipazia idi udidamanyile nduwano za zahabu na mikimailo mishano ya msaji niyo wazikiziga zahabu. Akajika usane visimiko vishano va shaba vo kisimikila imikimailo vileke uhwelezele idipazia."