1 Zumbe niyo amgamba Musa, "Kamkaule Falao. Miye hiwatenda yehe ne vilongozi weyawe kunda na nk'hani vileke niwalagise vihungi va kutisa, 2 naho mdahe kuwasimuila wana na wezukulu wenyu ivo niwatendele Wamisili kwa maya na kwa kuwatendela vihungi va kutisa. Aho wose nommanye kugamba ni miye Zumbe."

3 Musa na Haluni niyo waita kwa Falao no kumgamba, "Ivi nivo Zumbe Mnungu ywa Waibulania akulonga, ‘Noulemele hata ini kukeseleza hameso hangu? Walekele want'hu wangu waite vileke waka nivike, 4 uneva unagendeela kulemela kuwalekela waite, luvi nenigale sige mwe isi yako. 5 Nezigubike isi yose ise kuoneka. Nezidye vint'hu vose hata viya visigazwe ni fula ya maiwe vikanda ni hamwenga na maziti yose nayakakula mwe migunda yenyu. 6 Nezimemeze inyumba yako Falao na kwe zinyumba za wambizi wako na want'hu wako. Nezinde nyingi hata wakale wenyu wakei kuona uwingi uwo kukongela aho welekegwa hata dielo.’ " Ivo niyo Musa ahalawa ha Falao.

7 Wambizi wa Falao niyo wamgamba, "Want'hu awa nawaleke ini kukigela nk'huswank'uswa? Walekele want'hu awa wakamvike Zumbe Mnungu ywawe. Hunati ukombaganye kugamba isi ya Misili yabanika?"

8 Musa na Haluni wetangwagwa wauye kwa Falao, niyo awagamba, "Iteni mkamvike Zumbe Mnungu ywenyu. Mna ni wahi nawaite?"

9 Musa niyo amhitula, "Nekiite na wana wetu wose na wadala wetu ne zingoto ne zimbuzi zetu ne zing'ombe zetu kwaviya chaunga kikamdamanyile wila Zumbe ywetu."

10 Niyo Falao awagamba, Nakelisa kwa Zumbe, "Henigeze kuwalekela muite na wana wenyu na wavele wenyu. Kwaviya ikindedi mna mizungu iihile mwe mioyo yenyu kugamba homuuye naho. 11 Bule! Nawaite wagosi du kwo kumvika Zumbe, kwaviya ayo nayo mkuunga." Niyo Musa na Haluni waguluswa hameso ha Falao.

12 Zumbe niyo amgamba Musa, "Loloteza mkono wako kwe isi ya Misili vileke sige zize zidye vose visigazwe ni fula ya maiwe." 13 Ivo Musa niyo aloloteza ink'home yakwe mwe isi ya Misili, niyo Zumbe egala mp'eho kulawa ulailo wa zuwa, msi uwo wose ne kilo chakwe chose. Mtondo wakwe imp'heho iyo yegalaga sige. 14 Sige zezaga niyo zekala mwe isi yose ya Misili. Yandaga matuluma ya sige heyenati kulaila naho heyeze yalaile naho enga ivo. 15 Sige zagubikaga isi yose ya Misili niyo kwatitihala, zadyaga vose vasigazagwa ni fula ya maiwe. Hazasigazaga matunda mwa maziti hegu mani yoyose, hegu maziti yoyose mwe isi ya Misili.

16 Niyo aaho Falao awetanga Musa na Haluni no kuwagamba, "Hidamanya wavu kwa Zumbe Mnungu ywenyu na kwenyu. 17 Niusileni uulu du kwo wavu uno, mkanilombezele kwa Zumbe Mnungu ywenyu anihonye mwe file ino." 18 Ivo Musa ahalawaga ha Falao no kugenda kumlombeza Zumbe. 19 Zumbe egalaga nk'hungunt'ho kulawa usweelo wa zuwa. Nk'hungunt'ho iyo yazinula zisige zose mwe isi ya Misili no kuzigala kwe bahali ya Shamu. Hakwandaga na sige yoyose yasigalaga mwe isi yose ya Misili. 20 Mna Zumbe amtendaga Falao kunda mnk'hani, alemelaga kuwalekela Waizilaeli waite.

21 Zumbe niyo amgamba Musa, "Loloteza umkono wako kwo ulanga vileke kunde na ziza kulu digubike isi yose ya Misili vileke want'hu watusetuse." 22 Musa alolotezaga umkono wakwe kwo ulanga niyo kwanda ziza kulu mwe isi yose ya Misili kwa mazuwa matatu. 23 Want'hu wa Misili hawadahaga kukeona, naho hakwandga na yeyose ahalawaga aho abwiilagwa nu ulwiza. Mna mdya wekalaga Waizilaeli mwandaga hamna lwiza.

24 Falao amwitangaga Musa niyo amgamba, "Mwadaha kuita na wana wenyu na wavele wenyu mkamvike Zumbe, mna zimbuzi ne zingoto ne zing'ombe, zisigale aaha."

25 Niyo Musa ahitula, "Nouungwe ukink'he int'hambiko na malavo yo kuita nayo kwo kumvika Zumbe Mnungu ywetu. 26 Uneva hiivo, nekiite na mifugwa yetu yose, hokusigale chochose kunyuma yetu, kwaviya chaungwa kisagule mwa ayo kiyalave nt'hambiko mwo kumvika Zumbe Mnungu ywetu, naho hakinati kimanye ni yahi nekisagule mwe nt'hambiko mpaka kibule uko."

27 Mna Zumbe niyo amtenda Falao kugendeela kunda mnk'hani, haungile kuwalekela waite. 28 Falao niyo amgamba Musa, "Halawe aha! Usekiwza kwangu naho! Zuwa ukwiziila aha nohukome."

29 Musa niyo agamba, "Vedi, hounione naho."