1 Naho niyo Zumbe amgamba Musa, "Ita ukamgambe Falao, Mnungu ywa Waibulania agamba, ‘Walekele want'hu wangu waite wakanivike. 2 Uneva unalemela kuwalekela no kugendeela kuwatozeleza, 3 nenikupule maine yaihise mwe mifugwa yenyu yose, mwe zingoto na mwe zing'ombe na ifalasi na mp'hunda na ngamia ne zimbuzi. 4 Neniiike mhaka ukupanga mifugwa ya Waizilaeli na mifugwa ya Wamisili, ne mifugwa ya Waizilaeli heife.’ 5 Naho Zumbe kaika kale dizuwa akagamba, luvi, Zumbe naadamanye aya alongile. "

6 Luvi yakwe Zumbe adamanyaga enga ivo alongile, mifugwa ya Wamisili yafaga yose mna hahana mfugwa wowose wa Waizilaeli ufile. 7 Falao atumaga want'hu wakakaule. Waonaga kugamba hahana mfugwa wowose wa Waizilaili ufile. Mna Falao niyo agendeela kunda mnk'hani naho hawalekele want'hu waite.

8 Naho niyo Zumbe awagamba Musa na Haluni, "Guheni maivu ye ditanulu mwe vifumba venyu vileke Musa ayafilise mwo ulanga hameso ha Falao. 9 Nayande nt'hifu sisili mwe isi yose ya Misili, nayegale maihu yaihile yakuunga yatumbuke mwa want'hu na makala mwe isi yose ya Misili."

10 Ivo niyo waguha maivu mwe ditanulu no kukimala nayo hameso ha Falao. Musa ayafilisaga mwo ulanga, niyo yegala maihu yatumbuke mwa want'hu na makala. 11 Wasai wadya hawadahaga kukimala na kuhigana na Musa, kwaviya woho hamwenga na want'hu wose mwe isi ya Misili wandaga na maihu. 12 Mna Zumbe amtendaga Falao kugendeela kunda mnk'hani. Ivo enga viya Zumbe alongaga, Falao haawategeleze Musa na Haluni.

13 Niyo naho Zumbe amgamba Musa, "Ukelauke luvi mtondotondo umbase Falao umgambe, Zumbe Mnungu ywa Waibulania agamba, ‘Walekele want'hu wangu waite wakanivike. 14 Nt'hambo ino neniwatoweni kindedi ndedi, weye mwenye na vilongozi weyao na want'hu wako. Niho noumanye kugamba, hahali mtuhu mwe si zose enga miye. 15 Wandile nalagise udahi wangu niyo nawatoani weye na want'hu wako kwa maine yaihile, hegu nomsila pele. 16 Mna kiya kilekile ukekala hata dielo ni kuunga kukulagisa ludole lwangu no kuditenda dizina dyangu divike mwe isi yose. 17 Mna weye wagendeela kunda mk'hani mwa want'hu wangu hukuunga kuwalekela waite. 18 Ivo luvi lupisi enga ulu nenigale fula izamile ya maiwe heinati kulaila mwe isi ya Misili kukongela aho nk'hongo na ivi haluse. 19 Elo, lagiza mifugwa uko kwe mbago ivuzwe kaya hant'hu hatondoale. Want'hu wose na mifugwa inanda haheina nyumba, neikomwe umwo ifula iyo ikanya.’ " 20 Vilongozi weyawe wamwenga wa Falao wogohaga mwa ayo alongaga Zumbe, niyo wasunguza kuvuza kwe zinyumba, want'hu wawe na mifugwa hant'hu hatondoale. 21 Mna wamwenga hawogohe kwa kiya alongile Zumbe, niyo wasa watumwa wawe na mifugwa yawe kuse.

22 Zumbe niyo amgamba Musa, "Loloteza mkono wako uuonyekeze kwo ulanga vileke fula ya maiwe inye mwe isi yose ya Misili, iwanyeele want'hu na makala na kila ziti na mani mwe isi ya Misili." 23 Musa aloloteza ink'home yakwe kwo ulanga, niyo Zumbe egala fula ya maiwe na lumwemwe na nk'huwa mwe isi. Zumbe nakegala fula ya maiwe mwe isi ya Misili, 24 yandaga fula ya maiwe na lumwemwe nt'hendelo zose. Yandaga fula ya maiwe iihile heiinati kunya mwe isi ya Misili kukongela aho nk'hongo mpaka ivi haluse. 25 Ifula iyo ya maiwe yabanangaga vint'hu vose vandaga kuse mwe isi yose ya Misili, ni hamwenga na want'hu na makala na vihandwa mwe migunda no kuvuna maziti yose. 26 Mzi wa Gosheni du, uko wekalaga Waizilaeli, nuko kwandaga hekwiina fula iyo ya maiwe.

27 Falao niyo awetanga Musa na Haluni akawagamba, "Nt'hambo ino hidamanya wavu. Zumbe niye uywedi ekedu, mna miye na want'hu wangu ki wavu. 28 Mlombezeni Zumbe kwaviya ifula ino ya maiwe ne zink'huwa zikitendesa. Neni walekeleni mwiite homwikalise aha naho."

29 Musa niyo amgamba, "Haluse ivi hafosa kuse yo mzi, neninule mikono yangu kulanga nimlombeze Zumbe. Nk'huwa nezileke naho hokunde na fula ya maiwe. Ivo mmanye kugamba si ino ni ya Zumbe. 30 Mna himanya kugamba weye na vilongozi weyao mkei hamkumwogoha Mnungu."

31 Fula ya maiwe ize inye pamba ne vihandya vose vikulava unga nevibanangwa kwaviya pamba niho neikunga ibwalike, vihandwa vikulava unga navo nevitoga kale. 32 Mna ingano ne vihandwa vituhu vikale enga ngano haviabanangwe kwaviya nevinda vikei kukula.

33 Ivo niyo Musa ahalawa ha Falao no kuita kuse yo umzi. Enulaga mikono yakwe akamlombeza Mnungu. Nk'hua ne fula ye maiwe niyo valeka, fula nayo hayagendeele ukunya. 34 Falao eze aone kugamba ifula ya maiwe ne zink'hua vileka, adamanyaga wavu naho, niyo agendeela kunda mnk'hani yehe na vilongozi weyawe. 35 Enga ivo Zumbe amgambilaga Musa, Falao agendeelaga kunda mnk'hani hawawalekele Waizilaeli waite.