1 "Uneva mnt'hu anabawa ngo'mbe hegu ngoto niyo aikoma hegu niyo aitaga, nauungwe kuliha ngo'mbe shano kwa imwenga, na ngoto imwenga kwa imwenga. Mbavi uyo naaungwe kuliha nk'huda, uneva hanadahile naatagigwe yehe kwo ubavi wakwe. 2 Uneva mbavi kagwilwa nekilo akamola niyo atoigwa no kubanika uyo amtowile haande na masa, 3 mna uneva inanda kagwilwa no kukomwa umwo zuwa ditont'homoke uyo amkomile naande na masa yo ukomi.

"Uneva mbavi anagwilwa vaungwa alihe, mna uneva hananacho cho kuliha yehe naatagwe alihile ubavi wakwe uwo.

4 "Uneva mfugwa ubaigwe unaoneka kwa uyo mnt'hu ukei mgima ukanda mp'halala hegu punda hegu ngoto mnt'hu uyo naalihe mbili kwa imwenga.

5 "Uneva mnt'hu analekela mifugwa yakwe niyo yadya nk'honde ya zabibu za mnt'hu mtuhu, mta mifugwa iyo naaungwe kuliha vint'hu vedi va mwe nk'honde hegu zabibu zakwe.

6 "Uneva moto uchulikwe una toza mwe miwa niyo woka ngano ifungigwe vichanga, na idya imwe nk'honde, uyo achulike naaungwe kuliha ivo vose vibanangwe.

7 "Uneva mnt'hu anahokela kint'hu chochose cha ugoli kulawa kwa mnt'hu mtuhu vileke amwiikile niyo chabaigwa mwe nyumba yakwe, niyo mbavi agwiligwa uyo mbavi naaungwe kuliha mbili kwa imwenga. 8 Mna mbavi hana oneke, uyo mta inyumba neegalwe hant'hu hakumvika Mnungu vileke ikaoneke kugamba, ni yehe hegu hiyo yehe aguhile kint'hu icho cha miyawe.

9 "Mahigano ya ubavi wowose yakanda ya ng'ombe hegu mp'hunda hegu ngoto hegu suke, hegu chochose chagile, uneva yumwenga agamba chakwe, wose waidi wegalwe hant'hu hakumvika Mnungu, naho yeyose akuunga asengelwe ni walamuzi kugamba ana masa, naamlihe miyawe imwenga kwa mbili.

10 "Uneva mnt'hu anahokela mp'hunda hegu ng'ombe hegu ngoto hegu mfugwa wowose, kulawa kwa miyawe vileke amwiikile, mna niyo yafa hegu kulumila hegu niyo ainuliza nt'wika heina yeyose aone, 11 want'hu awo waidi nawegalwe hant'hu hakumvika Zumbe vileke womboke ulamuzi mwa woho kugamba yumwenga ywawe hadamanye wiihi mwe vint'hu va miyawe. Mta ivint'hu ivo naazumile ikilapi naho haalihigwe chochose, 12 mna uneva udya mfugwa ubaigwa mnt'hu uyo naaungwe kumliha umwenye. 13 Uneva mfugwa uwo ukomigwa ni kala aungwa kwigala viya visigale enga uwona, naivo haalihe chochose mwo mfugwa uwo.

14 "Uneva mnt'hu anaazimwa mfugwa wa miyawe, niyo mfugwa uwo walumila hegu niyo wafa, mwenye akanda hahali, uyo mnt'hu aazimwe naaungwe kuliha ubanangi uwo wose. 15 Mna ayo yanalaila mwenye akanda aaho, hokunde na maliho. Uneva mfugwa uwo wandaga ukadamanya ndima ya maliho, uyo mwenye naalihigwe maliho ye ndima du."

16 "Uneva mnt'hu anamdant'ha mwali na mazanga helailwe niyo agona naye, naalihe viligane na maliho ya mwali na mazanga yakwe, naye naande mkaziwe. 17 Mna uneva tati ya mwali analemela kumwink'hiza mwanawe kwa uyo mgosi, mgosi uyo naaungwe kuliha viligane na maliho ya mwali na mazanga yakwe du.

18 "Mkomeni mvele yeyose msai.

19 "Mkomeni mnt'hu yeyose akugenda na mfugwa.

20 "Mkomeni mnt'hu yeyose akumtambikila mnungu mtuhu na kunileka miye Zumbe Mnungu.

21 "Mse kuwatendela vihile watakwiza kwaviya nanywe mwandaga watakwiza mwe isi ya Misili. 22 Msekuwatendela vihile wabanikilwe ni wagosi zawe na wana nk'hiwa. 23 Mnatenda ivo neniwategeleze umwo wakaniiila, 24 name nenife maya niyo nawakomani vileke wavele wenyu nawo wande wabanikilwe ni walume zawe, wana wenyu nawo wande wana nk'hiwa.

25 "Mnt'hu yeyose mkiwa mwa want'hu wangu anakukopa usekuunga akulihe, naho usekuunga mgenyezo kulawa kwakwe. 26 Uneva mnt'hu anakuikila lahani suke yakwe umvuzile zuwa dikei kuswa, 27 kwaviya isuke iyo niiyo du nduguyo akuunga akegubikile nekilo, naakegubikilei kituhu? Ana niila nenimtegeleze kwaviya miye ni Mnungu mta mbazi.

28 "Use kumlonga vihile Mnungu hegu kuwaligita vilongozi wa want'hu wako.

29 "Usekwikalisa kulava imwenga kwa mlongo yo ulozo wako wa nk'hongo.

"Nt'hula sasu ywako nounink'he miye. 30 Nink'he nt'hula sasu ywako mwe zing'ombe zako na mwe zingoto zako. Zileke zikale na wamamizawe kwa mazuwa mfungate, dikabula dizuwa dya mnane unink'he miye.

31 "Nomnde want'hu wangu wakukile, ivo msekudya nyama ikomigwe ni kala, vituhuvakwe, yaduileni makuli.