1 Zumbe Mnungu amgambaga Musa, "Songola vihant'hi viidi va maiwe enga viya va nk'hongo, name neniwandike mbuli ziya zandile mwe vibao va nk'hongo viya waviduulaga hasi niyo vabwagazuka. 2 Luvi mtondo vinde vajika, wize, kidugane kwo lunenengwa lwo mnima wa Sinai. 3 Mnt'hu yeyose asekwiza hamwenga na weye, hegu asekuoneka hohose mwo mnima, hegu ngoto hegu ngombe zisekudimwa hagihi yakwe." 4 Ivo Musa asongolaga vihant'hi ivo viidi va maiwe enga viya va nk'hongo. Akelaukaga mtondotondo akakwela kwo mnima wa Sinai, enga ivo Zumbe amsigiilaga, naho aguhaga viya vihant'hi viidi va maiwe mwe mikono yakwe.

5 Zumbe Mnungu niyo aseela mwa mavunde niyo akimala hamwenga na Musa, akabilikiza dizina dyakwe, "Zumbe Mnungu." 6 Ivo Zumbe Mnungu ombokelaga hameso ha Musa akabilikiza akagamba, "Ni miye Zumbe, Mnungu mta mbazi no uwedi, hikusunguza kwiihiwa, nalagisa lukunde lutendese na uhuwilwa. 7 Miye neniwaungise want'hu kwa maalufu ya vyeleko, nawausila uwihi na masa na wavu. Mna henileke kuwasengela wana na wana wawe kwo wavu wawa tati zawe kwe cheleko cha katatu na cha kane."

8 Musa afunamaga hasi niyo avika, 9 agambaga "Zumbe uneva nakwelela mwe kindedi, nakulombeza unde hamwenga na suwe, hamwenga na kugamba want'hu awa wank'hani, mna kiuusile wiihi no wavu wetu, ukihokele enga want'hu wako mwenye."

10 Zumbe Mnungu niyo amgamba Musa, "Haluse naika Ndagano na want'hu wa Izilaeli. Nenidamanye vakweheela hameso yawe vint'hu hevinati kudamanywa mwe si yose, hegu mwe isi yeyose. Naho want'hu wose wakwikala hamwenga nawo nawaone makulu. Kwaviya nenidamanye mbuli ya kwehela kwajili yako. 11 Tozeni sigilizi izi niwek'hileni dielo. Neniwause hameso yenyu Waamoli na Wakanaani na Wahiti na Wapelezi na Wahivi na Wayebusi. 12 Kauliseni mnase kudamanya Ndagano na want'hu we isi iyo mkuita, kwaviya idyo nedinde Ndagano mwa nyuwe. 13 Mna nommole hant'hu hawe ha kulavila nt'hambiko na kuitula mikola yawe ya kuvikila na mahili yawe ya Ashela.

14 "Mse kuivika milungu yeyose mituhu, kwaviya miye Zumbe Mnungu namanyika kwa zina dyangu, Mta wivu, kwaviya neniihiwe mnavika milungu mituhu. 15 Msekuika Ndagano yoyose na want'hu we isi iyo, kwaviya umwo wakakehabwasa ne milungu yawe yo udant'hi na kuilavila nt'hambiko nawawalalikeni, nanywe nomdye zink'hade ze zinth'abiko zawe. 16 Naho mnasagula wanakike wande wakewana wenyu umwo mwawe, niyo wanakike awo wakehabwasa ne milungu yawe yo udant'hi, wanakike awo nawawa tende wana wenyu nawo wakehabwase enga woho.

17 "Msekukedamanyila milungu ya kusongola na vilama.

18 "Kila mwaka mkumbukile dizuwa dye kinyemi dye mikate heigeligwe ugwadu. Mdye mikate heigeligwe ugwadu kwa mazuwa mfungate enga ivo niwasigiileni. Mtende ivo mwo msimo ulaganwe mwo mwezi wa Abibu kwaviya nuwo umwezi mwalawaga Misili.

19 "Kila nt'hulasasu mwa want'hu na nt'hula sasu mwe mifugwa yenyu iyo neinde yangu, ikanda ni hamwenga na nt'hula sasu mwe zing'ombe na mwe zingoto. 20 Naho nt'hula sasu ywa mph'unda noumkombole kwa kumsakanya na ngoto, uneva huna mkombole vaungwa umbobotole isingo. Wana wenyu wose wa kilume nt'hulasasu nomuwakombole.

"Naho hasekunda na yeyose akuunga eze hameso hangu heiina kint'hu.

21 "Nomdamanye ndima mazuwa mtandatu na kuhumula mwe dizuwa dya mfungate hata uneva ni msimo wo kulima hegu mwo uvuni.

22 "Nomnde na zuwa dya kinyemi dya majuma, nayo ni kuduganya ulozo wa nk'hongo wo uvuni we ngano, naho nomnde na zuwa dya kinyemi dyo ulozo kwo uheelo wo mwaka.

23 "Wagosi wose waungwa kwiza hameso hangu miye Zumbe, Zumbe Mnungu ywa Izilaeli, nk'hanana nt'hatu mwo mwaka. 24 Neni waguluse want'hu wa si nt'huhu na kuzangalamula mihaka yenyu, naho hokunde na yeyose akuunga amunk'hilwe kuiguha isi yenyu umwo mkeza ha meso ha Zumbe Mnungu nk'hanana izo zint'hatu kila mwaka.

25 "Msekunilavila sakame ya nt'hambiko na kint'hu chochose kihangane na ugwadu, hegu nt'hambiko ya Zuwa dya kinyemi dye Pasaka isekusigazwa mpaka mtondo.

26 "Ulozo wako wa nk'hongo nouulete kwangu miye Zumbe Mnungu, Mnungu ywako.

"Usekumwambika mwana ngoto hegu na mwana mbuzi mwe mele ya nine."

27 Zumbe Mnungu niyo amgamba Musa, "Wandika ulosi uno, kwaviya kwa ulosi uno nenidamanye lagano na weye na want'hu wa Izilaeli." 28 Musa ekalaga uko kwo mnima hamwenga na Zumbe Mnungu mazuwa milongo mine, kilo na msi, hadile nk'hande hegu kunywa mazi. Awandikaga mbuli zose mwe Ndagano na ziya sigilizi mlongo.

29 Musa eze aseele kwo mnima wa Sinai akanda ne viya vihant'hi viidi vine zimbuli ze Ndagano mwe miko yakwe, hamanyize kugamba futa yakwe neingala kwaviya kalonga na Mnungu. 30 Haluni na want'hu wose wa Izilaeli weze wamuone wogohaga kumsogeela, kwaviya futa yakwe neikang'alisa. 31 Mna Musa awetangaga, ivo Haluni ne vilongozi wose wa want'hu, niyo wauya kwakwe, niyo alonga nawo. 32 Akajika aho waizilaeli wose wezaga hagihi nae, niyo awenk'ha zisigilizi zose izo Zumbe Mnungu amwink'haga uko kwo mnima Sinai. 33 Musa eze ibinde kulonga na want'hu agubikaga uso wakwe ne kitambala. 34 Mna nekinda ni kihendo cha Musa kugamba umwo andile akengila mwe Dihema Dikukile, alonge naye, akihausaga kiya kitambala aho eze afose kuse. Naho eze afose kuse awagambilaga Waizilaeli kiya asiigilwe, 35 naho Waizilaeli waonaga futa yakwe yendaga ing'alisa. Niyo Musa agubikaga futa yakwe kwa kitambala mpaka aho eze aite akalonge na Zumbe Mnungu.