1 Zuwa dimwenga, Musa andaga akadima ngoto za mkwewe uyo Yetulo mlavant'hambiko ywa Midiani, egalaga idifyo kungwelo ye nyika, niyo abula kwo mnima wa Holebu, mnima wa Mnungu. 2 Mtumigwa ywa kwe mbingu ywa Zumbe amlailaga enga lulija lwa moto mgati mwa kasaka. Musa aonaga kugamba kasaka kakweela moto mna kandaga hakakusha. 3 Musa niyo agamba, "Nenisogele hagihi vileke nikaule maona aya makulu, naho nikaule nii kasaka aka hakakusha."

4 Zumbe eze aone kugamba Musa kasogela hagihi, Zumbe niyo amwitanga hadya ha kasaka, "Musa! Musa!"

Musa niyo etika, "Woe."

5 Mnungu niyo amgamba Musa, "Use kusogelesa hagihi. Hambula vilatu vako, kwaviya hant'hu ukimale hakuka." 6 Niyo agendeela kulonga, "Ni miye Mnungu ywa wakale wako, Mnungu ywa Ibulahimu na Mnungu ywa Isaka, naho ni Mnungu ywa Yakobo." Musa niyo afisa uso wakwe kwaviya ogohaga kumkaula Mnungu.

7 Niyo Zumbe agamba, "Ikindedi hiona ivo want'hu wangu wakutendelwa ukwank'hwalu uko Misili. Hiva indilo yawe kwajili ya wakimalizi wawe. Hiyamaya makunt'ho yawe, 8 naivo hiseela niwakombole kulawa kwa Wamisili no kuwalava mwe isi idya no kuwegala kwe isi yedi, naho zangalamu, isi ina ulozo. Isi iyo wekala Wakanani na Wahiti na Waamoli na Wapelizi na Wahivi na Wayebusi. 9 Ikindedi ndilo ya want'hu wangu inibwiila, naho hiona Wamisili ivo wakuwakint'hiza. 10 Haluse nakutuma kwa Falao ukawaguhe want'hu wangu Izilaeli walawe mwe isi ya Misili."

11 Mna Musa niyo amgamba Mnungu, "Ni miye ani niho niite kwa Falao, no kuwalava Waizilaeli mwe isi ya Misili?"

12 Niyo Mnungu agamba, "Neninde na weye, naho kilagiso cho kugamba ni miye hutumile ni iiki. Ukeza kwajika kuwalava want'hu awo, mwe isi ya Misili, nomwize mnivike mwo mnima uno."

13 Mna Musa niyo amgamba Mnungu, "Uneva nnaita kwa Waizilaeli no kuwagamba, Mnungu ywa wakale wenyu kanituma kwenyu, uneva wana niuza kugamba, uyo Mnungu etangwa ani? Neni wahitulei?"

14 Mnungu niyo agamba, "NI MIYE eyuko yudya eyuko." Niyo Mnungu agendeela kumgamba, ivo nivo noulonge kwa Waizilaeli, uyo akwitangwa. MIYE, niye anitumile kwenyu. 15 Wagambile Waizilaeli kugamba, Zumbe, Mnungu ywa wakale wako, Mnungu ywa Ibulahimu, Mnungu ywa Isaka, naho Mnungu ywa Yakobo, kanituma kwenyu. Idi nidyo dizina dyangu mazuwa yose, nidyo dizina nawanitange vyeleko vose mazuwa yose. 16 Ita kawaduganye wadala vilongozi wa Izilaeli, uwagambe Zumbe Mnungu kanilaila, Mnungu ywa wakale wenyu, Mnungu ywa Ibulahimu, Mnungu ywa Isaka, naho Mnungu ywa Yakobo. Wagambile kugamba, hiza kuwakaulani naho hiona kiya mkutendelwa mwe isi ya Wamisili. 17 Naho naika Ndagano kugamba, neniwalave mwo utumwa wenyu uko Misili, na kuwegala kwe isi ina ulozo ya Wakanani na Wahiti na Waamoli na Wapelizi na wahivi na Wayebushi.

18 "Wadala wa Izialeli nawakive kiya ukuwagambila, naivo weye na awo, nomwiite kwa Falao, niyo mwamgamba, ‘Zumbe Mnungu ywa Waibulania kakelaviliza kwetu, goja kiite utafi wa mazuwa matatu kwe dijangwa kikalave nt'hambiko zetu kwa Zumbe Mnungu ywetu.’ 19 Mna himanya kugamba Falao haawalekeleni mwiite mpaka ate kutigizwa kwa mkono wo udahi. 20 Mna nenilagise udahi wangu kwa kuitowa Misili kwa vihungi va kutisa huunga nidamanye uko, akajika na awalekeleni mwiite.

21 "Miye neniwatende Wamisili wawabwedeni, naivo inde umwo want'hu wangu wakahalawa, wase kuhalawa mikono mihala. 22 Mwo lupisi ulo kila mvele ywa Kiibulania naamlombeze Mmisili ywa hagihi naye, hegu mgeni ywa mwe nyumba yakwe, amwink'he vint'hu va masawa na zahabu na suke. Vint'hu ivo nomuwavale wanakilume wenyu na wakike. Naivo nivo nomuwahoke Wamisili ugoli wawe."