1 Zumbe niyo amgamba Musa, "Kaula, hikutenda enga Mnungu kwa Falao, nduguyo Haluni naye naande mlongi ywako. 2 Noumgambile Haluni yose yadya hugambile udamanye, naye naamgambe Falao awalekele Waizilaeli wahalawe mwe isi ya Misili. 3 Mna nenimtende Falao kunda mnk'hani hata uneva nenongeze vihungi na vilagiso mwe isi ya Misili. 4 Falao haakutegeleze, aho nenilagise udahi wangu na kuisulumizisa isi ya Misili no kuwalava want'hu wangu na makabila ya Izilaeli kulawa isi ya Misili. Nenidamanye ivo kwa udamanyi mkulu wa usengelo mwa Wamisili, 5 aho heza kulagisa udahi wangu kuwahiga Wamisili no kuwalava Waizilaeli kuse ye isi ya Misili. Aho naho nawamanye kugamba miye ni Zumbe." 6 Musa na Haluni nawadamanya enga ivo Zumbe awalagize wadamanye. 7 Umwo wakalonga na Falao Musa andaga na miaka milongo mnane, Haluni andaga na miaka milongo mnane na mitatu.

8 Zumbe niyo awagamba Musa na Haluni, 9 "Uneva Falao anawaunga mdamanye vilagiso, mgambe Haluni aguhe ingoda yakwe niyo aiduula hasi hameso ya Falao, nayo neihituke nyoka." 10 Musa na Haluni waitaga kwa Falao no kudamanya enga ivo wagambigwe ni Zumbe wadamanye. Haluni aidulaga ink'home yakwe hasi ha meso ya Falao na wandima wakwe, aho niyo ink'home yahituka nyoka. 11 Niyo Falao awetanga wata mizungu na wasai na walaguzi wa Misili, kwa uganga wawe niyo wadamanya enga ivo adamanye Haluni. 12 Nawaduula zingoda zawe hasi, niyo zingoda zahituka mazoka, mna ink'home ya Haluni niyo yazimela izawe. 13 Mna hamwenga na ayo Falao nakanda mnk'hani naho hawategeleze enga ivo Zumbe alongaga.

14 Zumbe niyo amgamba Musa, "Falao kanda mnk'hani, alemelaga kuwalekela want'hu kuita. 15 Haluse luvi mtondo wiite kwa Falao, umwo akaita kwo mto umgoje ho lwega lwo mto Naili ukanda kuitoza ink'home yako idya yahituke nyoka. 16 Mgambe, ‘Zumbe Mnungu ywa Waibulania kanituma nize hugambe, Uwalekele want'hu waite, wakanivike kwe kwedijangwa. Mna hata ivi hukuunga kwiva. 17 Haluse iki nicho akulonga Zumbe, Kaula neniyatowe amazi aya yo mto Naili ne nk'home nnanayo mwo mkono, nayo nayahituke sakame. 18 Samaki zo mto nezife, niyo mto noununk'he, neiwatende Wamisili wasekudaha kuyanywa mazi yo mto Naili.’ "

19 Zumbe niyo amgamba Musa, "Mgambe Haluni aguhe ink'home niyo aichulusila mwa mazi ya Misili na mwe mito yawe, na mwe vizuto vawe, na mwa maziwa yawe na mwe vizumi vawe, vileke yahituke sakame, nokunde sakame mwe isi yose ya Misili, na mwe vint'hu vose va kuikila mazi."

20 Niyo Musa na Haluni wadamanya enga viya wasigiilwe ni Zumbe. Haluni enulaga ink'home niyo ayatowa amazi yo mto Naili hameso ya Falao ne vilongozi weyawe, niyo mazi yakwe yahituka sakame. 21 Samaki mwo mto niyo zafa, niyo zanunk'ha vihile, vitendile Wamisili wasekudaha kunywa amazi yo mto. Sakame yenelaga mwe isi yose ya Misili. 22 Mna niyo wasai wa Misili nawo wadamanya kwa uganga wawe enga viya Musa na Haluni wadamanye. Enga viya Zumbe alongile, Falao nakagendeela kunda mnk'hani, alemelaga kuweva Musa na Haluni. 23 Niyo Falao ahituka no kwingila kwe nyumba yakwe haheina kuyafanyanya yalaile. 24 Wamisili wose wafukaga mnk'handa yo mto wakazungula mazi yo kunywa, kwaviya hawadahaga kunywa amazi ya mwo mto.

25 Yabulaga mazuwa mfungate kukongela aho Zumbe autowaga mto Naili kwa mazi yakwe kunda sakame.