1 Adamanyaga hant'hu ha kulavila nt'ahambiko kwa maziti ya msaji. Utali wakwe wandaga mp'hima nne, uzangalamu wakwe nawo mp'ima nne. Utali wakwe kwiita kulanga wandaga mp'hima imwenga. 2 Adamanyaga vilunganyilo mwe zimp'hembe zakwe izine zitendile zinde kint'hu kimwenga ne hant'hu ho kulavila nt'hambiko ahenye, niyo ahikiziga shaba. 3 Akidamanyilaga vint'hu vakwe vose kwa shaba. Nyungu zakwe na makoleo yakwe na makanga yakwe ne mijungo yakwe na viziga vakwe va kupakuila moto. 4 Naye ahadamanyilaga kilingo cha kutambikila wavu we shaba, niyo augela kilingo cha kutambikila kuzunguluka nt'hendelo zose, niyo wanda hagati yakwe. 5 Naho adamanyaga mp'hete nne zo kwinuila no kuzigela mwe zimp'hembe izine. 6 Iviyaiviya ahadamanyilaga mikimailo kwa miti ya msaji niyo aikiziga shaba, 7 aigelaga mikimailo iyo mwe zimp'hete vileke inde mwe zimp'hembe za kilingo cha kutambikila kwa kuhenuila. Kilingo icho che nt'hambiko chandaga na vungu didamanywe ne zimbao ziya.

8 Adamanyaga kanga dya shaba hamwenga no kisimiko chakwe che shaba. Dikanga idyo dyadamanyagwa kwa shaba yandaga enga vioo va kukekawiila va wavele wandaga wasank'hani he nk'kili ye Dihema Dikukile.

9 Niyo naho adamanya lwazo. Mapazia ye nt'hendelo ya Kwa mwenye mzi utali wakwe wandaga mp'hima gana. Mapazia ayo yadamanywe kwa kitambala king'aile chedi, 10 yaketozele mwe mikimailo milongo miidi idamanywe kwa shaba na visimiko milongo miidi va shaba, mna nduwano zakwe ne mp'hapi zakwe zandaga za masawa. 11 Kwe nt'hendelo ya Kasikazini utali we dipazia nawo wandaga mp'hima gana, na mikimaila milongo miidi mna nk'hombosha ze mikimaila ne zinduwano zakwe zandaga za masawa. 12 Kwe nt'hendelo ya Usweelo wa zuwa yandaga na uzangalamu wa mp'hima milongo mishano naho yandaga na mapazia yakwe hamwenga na mikimailo mlongo na visimiko mlongo hamwenga na nduwano za masawa na nitasi vakwe mnaga mwe mikimailo. 13 Nt'hendelo ya ulailo wa zuwa nuko kwandile no lwivi una uzangalamu wa mp'hima milongo mishano. 14 Nokunda na pazia dya utali wa mp' hima milongo mishano kwe nt'hendelo imwenga ye nk'hili hamwenga na mikimailo mitatu na visimiko vitatu, 15 na pazia dya utali wa mp'hima mlongo na shano dyandaga kwe nt'hendelo int'huhu ye nk'hili yo lwazo hamwenga na mikimailo mitatu na visimiko vitatu. 16 Mapazia yose ho lwazo yadamanyagwa kwa suke yedi ing'aile. 17 Visimiko ve mikimailo vandaga va shaba. Mna zink'hombosha ne zinduwano zakwe zandaga za masawa. Imitwi yakwe nayo neinde ya masawa, mikimailo yose yo lwazo yatozelezagwa na nk'hombosha za masawa. 18 Idipazia dye nk'hili yo lwazo dyadamanywagwa kwa mazoya ya ngoto na langi ya buluu na zambalau na ink'hundu na kitambala chedi king'aile zibilingwe vedi.

Yandaga na utali wa mp'hima milongo miidi enga udya we dipazia dyo lwazo, na utali kuita kulanga mp'hima shano. 19 Neitozelezwa na mikimailo mine na visimiko vine va shaba. Kwa kulanga nokuhakwa masawa nduwano ne zink'hombosha zakwe nazo nezinda za masawa. 20 Vigingi vose ve Dihema Dikukile vandaga hamwenga na viya vo lwazo vandaga va shaba.

21 Uno nuwo uwazilo we vint'hu vizengele Dihema Dikukile umwo mwaikagwa vihant'hi viidi va maiwe ivo vawandikwagwa imiko mlongo.

Uwazilo uno noudamanywa ni Walawi wakalangilizwa ni Itamali mwana Haluni mlavant'hambiko enga ivo Musa asigiilaga.

22 Bezaleli mwana Uli mwana Huli ywe dikabila dya Yuda adamanyaga yose ayo Zumbe amsigiilaga Musa. 23 Naho Oholiabu mwana Ahisamaki ywe dikabila dya Dani uyo mwambizi ywakwe andaga mmanyi mkulu mwe kuhamba na kuchola na kutuluma na kutula mizungu mwe zi langi za kibuluu na zambalau na zink'hundu na kitambala chedi king'aile kibilingwe vedi.

24 Uwazilo wose we zahabu yalavagwa kwajili ya Zumbe yandaga kilo magana mlongo kwa kihimo kiikigwe ni Dihema Dikukile. 25 Masawa ya awo want'hu wo mdugano kwa awo wawazigwe yandaga magana mlongo matatu na magana mane kwa kihimo kiikigwe ni Duhema dikukile. 26 Kila mnt'hu awazigwe kukongela miaka milongo miidi na imwenga na kugendeela nakalava kodi yakwe mwe kima kiya kiikigwe ni Dihema Dikukile. 27 Kilo alufu nt'hatu na magana mane za masawa zandaga kwa kudamanyila visimiko gana ve Dihema Dikukile ne dipazia, kila kimwenga kilo milongo mitatu. 28 Ziya zikilo mlongo na mfungate zisigale Bezaleli azidamanyilaga nk'hombosha ze mikimailo na kuzikizigila masawa viya vizitwi vakwe no kuvidamanyila vitasi. 29 Kima che shaba chalavilagwa Zumbe chandaga ni kilo alufu mbili na gana dimwenga na milongo miidi na kane. 30 Mwe shaba iyo adamanyaga visimiko ve nk'hili ye Dihema Dikukile na kilingo cha kutambikila kidamanywe kwa shaba na waya we shaba hamwenga ne vin'thu vose ve kilingo cha kutambikila, 31 ne visimiko vizunguluke lwazo ne visimiko ve nk'hili yo lwazo ne vigingi vose ve Dihema Dikukile na vose viuzunguluke ulwazo.