1 Niyo Zumbe amgamba Musa, "Haluse noukaule ivo huunga nimtende Falao. Ikindedi neni mtigize awalekele want'hu wangu waite, kwa udahi wangu nenimtigize awaguluse want'hu wangu mwe isi yakwe."

2 Naho niyo Mnungu alonga na Musa akamgamba, "Ni miye Zumbe. 3 Nakelavilizaga kunda Mnungu mta Udahi wose kwa Ibulahimu na kwa Isaka na kwa Yakobo, mna hikelavilize kwawe kwa zina dyangu mwenye. 4 Naho naikaga Ndagano yangu na woho, kuwenk'ha isi ya Kanaani uko wandaga watakwiza. 5 Iviyaiviya hiva indilo ya Waizilaeli awo wakutendigwa watumwa ni Wamisili, naho hikumbukila Indagano yangu. 6 Haluse wagambile Waizilaeli kiya hulonga kwawe, ‘Ni miye Zumbe, neniwahonyeni no kuwakombola mwo utumwa wa Wamisili. Neni wasulumizise Wamisili, naho neni wakomboleni kwa udahi mkulu. 7 Neni watendeni want'hu wangu name neninde Mnungu ywenyu. Naho nommanye kugamba ni miye Zumbe Mnungu ywenyu niwakomboleni kulawa kwo utumwa wa Wamisili. 8 Neniwegaleni kwe isi idya nakelisile kugamba neniwenk'he Ibulahimu Isaka na Yakobo, naho neniwenk'heni inde yenyu, ni miye Zumbe Mnungu nilongile aya.’ " 9 Ivi nivo Musa awagambile Waizilaeli mna woho hawa mtegeleze yadya alongile kwaviya nawengila chevu kwajili yo ukwank'walu we kitumwa nawakatendelwa.

10 Niyo Zumbe amgamba Musa, 11 "Ita kamgambe Falao, Falao, aungigwa awalekele Waizilaeli wahalawe mwe isi."

12 Mna Musa niyo amgamba Zumbe, "Waizilaeli du hawanitegeleze, uyo Falao naanitegeleze vivihi miye hiina umanyi wa kulonga?"

13 Mna Zumbe alonga na Musa na Haluni, akawasigiila waite kwa Falao, Falao, vileke awalekele Waizilaeli wafose mwe isi ya Misili.

14 Awa nawo wakale we zink'holo za Izilaeli uyo naho akwitangwa Yakobo. Wana wa Lubeni uyo mwelekwa ywa nk'hongo ywa Yakobo, wandaga ni Hanoki na Palu na Heziloni na Kalimi. Awa wandaga wakale we zink'holo za Lubeni. 15 Awa nawo wana mtandatu wa Simioni, Yumueli na Yamini na Ohadi na Yakini na Sohali na Sauli. Nine dya Sauli andaga Mkanani. Awa wandaga wakale we zik'holo za Simioni. 16 Awa nawo wana awatatu wa Lawi, viligane ne vyeleko vawe. Geloshoni na Kohathi na Melali, naho miaka ya Lawi yandaga gana dimwenga na milongo mitatu na mfungate. 17 Gelishoni andaga na wana waidi, Libini na shimei, viligane na mazina ye zimp'huga zawe. 18 Awa nawo Wana wane wa Konathi, Amlamu na Izilaha na Hebuloni na Uzieli. Kohathi ekalaga miaka gana dimwenga na milongo mitatu na mitatu. 19 Wana wa Melali wandaga ni Malihi na Mushi. Awa ni mp'huga ya Lawi viligane no welekwa wawe.

20 Amlam alombaga lumbudye dya ise akwitangwa Yokebedi, niyo amwelekela Haluni na Musa. Amlam ekela miaka gana dimwenga na milongo mitatu na mfungate. 21 Ishali andaga na wana watatu, nawo ni Kola na Nefegi na Zikili. 22 Wana wa Uzieli wandaga ni Mishaeli na Elizafani na Sitili.

23 Niyo Haluni amlomba Elisheba mwanakike ywa Aminadabu naho lumbudye dya Nahashoni. Elisheba amwelekelaga Haluni wana awa, Nadabu na Abihu na Eliezali na Itamali. 24 Awa nawo awana wa Kola, Asili na Elikana na Abiasafu. Awa wandaga wakale we zink'holo za Kola. 25 Elieazali mwanawe dya Haluni, amlombaga yumwega mwa wanakike wa Putieli, Eliezeli amwelekelaga mwana akwitangwa Finehasi. Awa nawo wandaga wakale we zink'holo za Walawi.

26 Haluni na Musa naawo Zumbe awagambaga, "Walaveni Wazilaeli mwe isi ya Misili viligane na makabila yawe." 27 Naawo wamgambile Falao naho Falao awalekele Waizilaeli.

28 Zuwa diya umwo Zumbe alongaga na Musa uko Misili, 29 nakamgamba Falao, "Ni miye Zumbe. Mgambile Falao kila kiya hukugambila."

30 Mna Musa niyo ahutula Zumbe, "Miye hina umanyi wa kulonga kwa Falao naho Falao naanive vivihi?"