1 Awana wa Yakobo awo aitaga nawo uko Misili hamwenga na wavele wawe na wana wawe wandaga ni, 2 Lubeni, Simioni, Lawi, Yuda, 3 Isakali, Zabuloni, Benjamini, 4 Dani, Nafutali, Gadi, Asheli. 5 Uwazilo wose we cheleko cha Yakobo wandaga milongo mfungate. Yusufu mwanawe dya Yakobo andaga kale uuko Misili. 6 Naho akajika Yusufu na wanduguze ne cheleko kiya chose wabanikaga, 7 naho Waizilaeli wandilisaga na cheleko niyo wagenyelesa na kunda na ludole no kumema mwe isi ya Misili.

8 Miyaka mingi yomboke kwenukilaga seuta mtuhu uko Misili hemanyize mbuli azidamanyaga Yusufu. 9 Niyo awagamba want'hu wakwe, "Mkaulise kwaviya Waizilaeli wagenyelesa naho wana ludole kukijink'ha suwe. 10 Haluse kiike mzungu vileke wasekugenyela, uneva kunalaila nk'hondo nawakelunge na wank'hondo wetu no kukitoa niyo wanyilka mwe isi." 11 Ivo Wamisili waikaga wakimalizi wawakimaile Waizilaeli na kuwasulumiza kwa ndima ndala. Waizilaili niyo wamzengela Falao, vindolo va kwiikila mp'hamba mwe mizi ya Pitomu na Lamesesi. 12 Mna Waizilaeli wandaga wakagenyela no kusambala mwe isi hamwenga na kugamba wandaga wakasulumizwa vitendese. Wamisili niyo wawogohesa Waizilaeli. 13 Niyo Wamisili wawatenda kwa ukwank'walu wadamanye ndima. 14 Wautendaga wikazi wawe kunda mdala kwa ndima ndala mwo kudamanya chwakawa na matofali na mwe zink'honde. Naho mwe zindima izo zose Waizilaeli watendagwa kwa ukwank'walu wadamanye ndima.

15 Niyo Falao alonga na wank'hunga wa Waibulania, Shifula na Pua, awo wandaga wakawelesa wavele wa Waibulania, 16 niyo awagamba, "Uneva mkawambiza wavele wa Kiibulania wakengila nyumba, kananda kagosi kakomeni, kananda kandele kalekeni." 17 Mna wadya wank'hunga wandaga wakamwogoha Mnungu, ivo hawadamanye enga ivo Falao awagambaga wadamanye, mna niyo wawaleka wanakigosi wande wagima. 18 Ivo Falao niyo awetanga na kuwauza, "Nii mwatenda ivi? Mwawaleka wanakigosi wande wagima?"

19 Wadya wank'hunga niyo wamhitula Falao, "Wavele wa Kiibulania hiyo enga we Kimisili. Woho wahufu kwingila nyumba umwo wank'hunga kikanda hakinati kibule." 20 Ivo Mnungu andaga ywedi kwa wank'hunga awo niyo Waizilaeli wagenyela no kundilisa na ludole. 21 Kwaviya wadya wank'hunga nawakamwogoha Mnungu, ivo awenk'haga mp'huga zawe wenye. 22 Naho akajika Falao alagizaga kwa want'hu wakwe wose kugamba, "Mwanakilume yeyose akwelekwa kwa Waibulania aduulwe mwo mto Naili, mna kandele kalekeni kagima."