1 Yusufu niyo amwinamila na kumbatila ise akaila na kumnonela. 2 Niyo Yusufu awagamba waganga wakwe wamhake Yakobo uyo ise, miti vileke asekuola. Wadya waganga niyo wamhaka. 3 Waguhaga mazuwa milongo mine wakamhaka miti. Wamisili wamhongezelaga kwa mazuwa milongo mfungate.

4 Kuhongeza kwize kusile, Yusufu awagambaga wandima wa Falao, "Mwigaileni Falao ulosi uno kugamba, 5 umwo tate andaga hagihi no kubanika, anitendaga nikelise kugenda kummosela msanga kwe kikuta akesimbilaga mwenye uko Kanaani. Elo, namlombeza kukagamba, goja hammosele tate msanga, naho akajika neniuye."

6 Falao niyo amhitula, "Ita kammosele msanga iso enga ivo walaganaga kudamanya."

7 Ivo Yusufu aitaga kwo kummosela ise sanga. Aitaga hamwenga na wakulu wose wa mwe nyumba ya Falao, na wadala vilongozi wose we kitala cha Falao, na wadala vilongozi wose wa isi ya Misili. 8 Imp'huga yakwe na wanduguze na wose mwe mp'huga ya ise, wose waitaga hamwenga na yehe. Mna, wana wadodo na ngoto na mbuzi ne zingombe, wasigalaga uko Gosheni. 9 Iviyaiviya waitaga want'hu wakwelega falasi na magali yakuvutwa ni falasi, kulajunga kulu.

10 Weze wabule he kiwasa cho kuhutila nk'hande cha Atadi, nt'hendelo ya kaidi ya Yolodani, wahongezaga kwa kinyulu kikulu na usungu, niyo Yusufu amhongezela ise kwa mazuwa mfungate. 11 Want'hu wa Kanani wadya wandaga wakekala hadya weze waone mahongezo aho he kiwasa cho kuhutila cha Atadi, niyo wagamba, "Mahongezo aya ni makulu mwa Wamisili!" Nivo vikuleka hant'hu aho hetangwa Abeli Mizilaimu. Nuko kugamba, "Mahongezo ya Wamisili".

12 Ivo niyo wanawe watendaga enga viya tati yawe awalagizaga. 13 Wamwinulaga niyo wamwigala kwe isi ya Kanaani no kummosela sanga mwe mp'hanga imwo mgunda wa Makipela yandile ulailo wa zuwa wa Mamle, iyo Ibulahimu aigulaga kwa Efuloni Mhiti inde hant'hu ha kumosela hamwenga no mgunda wakwe. 14 Yusufu eze ajike kummosela msanga ise auyaga Misili hamwenga na wanduguze na wose waitaga naye kwo kummosela msanga ise.

15 Wanduguze dya Yusufu weze waone kugamba tati yawe kabanika wagambaga, "Nevinde vivihi uneva Yusufu naakiihiye, naho anaika mzungu wo kulihiza kwa maihi yose chamdamanyaile?" 16 Ivo niyo wamwigaila ulosi wakagamba, "Umwo tati yetu akei kubanika, 17 nakakigamba kiukulombeze uwalekele wanduguzo kwadiya wabanange, na wavu wawe wadamanye, kwaviya nawakutendela viihile. Elo chakulombeza uwalekele wavu watumwa wa Mnungu ywa iso." Yusufu akeve ivo, niyo aila.

18 Niyo wanduguze nawo waila, wakafunama hasi, naho hameso hakwe wakagamba, "Suwe kiwa tumwa wako."

19 Mna Yusufu niyo awahitula, "Mse kogoha. Miye hiye Mnungu ywa kuwasengelani. 20 Mwaikaga mizungu ihile mwa miye, mna Mnungu aihitulaga kunda yedi, vileke want'hu wengi wahonywe enga ivo vili dielo, kulawa mwa ayo yalaile. 21 Ivo msekogoha, miye neniwaleleni nyuwe hamwenga na wana wenyu." Awatondowazaga miyoyo yawe kwa milosi yedi.

22 Yusufu agendeelaga kwikala ukwo Misili hamwenga ne mp'huga ya ise. Ekalaga miaka gana na mlongo niyo abanika. 23 Yusufu ekalaga niyo awaona wana na Ifulaimu na wezukulu wakwe. Naho awahokelaga wana wa Makili wandaga wana wa Manase kwe mp'huga yakwe. 24 Yusufu niyo awagamba wanduguze, "Miye nihagihi no kubanika, mna kwavovose Mnungu nawezileni, niyo awalava mwe isi ino, no kuwegala kwe isi idya awaikilaga Ndagano kwa kilapi, awo Ibulahimu na Isaka na Yakobo." 25 Yusufu awagambaga Waizilaeli waike kilapi kugamba, "Umwo Mnungu akeza kuwezilani na kuwaambiza kuuya kwe isi yenyu. Mwaungwa mwinule mavuha yangu kulawa mwe isi ino." 26 Ivi Yusufu abanikaga kudya Misili akanda na miaka gana na mlongo. Wamhakaga miti ase kuwola, no kumgela mwe Disanduku.