1 Isaka adalahalaga niyo meso yakwe yanda haya kuona. Amwitangaga mwanawe mkulu Esau niyo amgamba, "Mwanangu." Esau niyo ahitula, "Woe!"

2 Isaka niyo amgamba, "Kaula miye hidalahala himanyize dizuwa dyo kubanika kwangu. 3 Guha uta wako ne misale uite kwe nyika ukanikomele nyama. 4 Uyambike nk'hande imwile idya huiungisa niyo wanigaila nidye hajika ukudya huvikile iivi hinati kubanika."

5 Umwo Isaka andile akalonga na Esau nine andaga akategeleza. Ivo esau eze ande kaita kwo kongola, 6 uyo Labeka niyo amgamba mwanawe Yakobo, "Hiva ivo iso naakalonga na Esau." 7 Kanikomele nyama niyo wanambikila nk'hande imwile. Habinda ukudya huvikile hameso ya Zumbe iivi hinati kubanika. 8 Labeka niyo agendeela akagamba, "Haluse mwanagu, nitegeleze udamanye ivo hulonga. 9 Ita kwe difyo ukasagule mbuzi mbili zigimbale, niziguhe miye nambike nk'hande idya iso akuiungisa. 10 Akajika umwigaile iso akadye naye nakuvikile iivi akei kubanika."

11 Mna Yakobo niyo amgamba nine, "Kumanya kugamba Esau anafili mwili wose, mna miye hina. 12 Mafani tate naanitoze niyo abunk'hula kugamba namdant'hiliza, kwa sila ino nadaha kuligitwa hant'hu hakuvikilwa."

13 Nine niyo amhitula kugamba, "Ligito nedinde dyangu mwanangu, weye damanya ivo hulonga, weye ita kanigaile zimbuzi izo." 14 Ivo agendaga kuziguha zimbuzi niyo amwigaila nine niyo ambika nk'hande idya ise akuiungisa. 15 Labeka aguhaga suke izedi za Esau izo zandile kwe nyumba ya Labeka niyo amvala Yakobo. 16 Iviyaiviya amvalaga nk'hingo mwe mikono na mmwenga mwe singo yakwe hemwiina fili.

17 Niyo amwink'ha ink'hande imwile yedi ne mikate idya aidamanye.

18 Niyo Yakobo aita kwa ise niyo amwitanga, "Tate!"

Esau etikaga, "Woe." "Ni weye yuhi mwanangu?"

19 Yakobo niyo ahitula, "Ni miye mwanao Esau, hidamanya enga viya unigambile. Nakulombeza ukungumale udye inyama hwigaile vileke univikile."

20 Isaka niyo agamba, "Kupata kale vivihi kwa uhufu ivo mwanangu?"

Yakobo niyo amhitula, "Zumbe Mnungu ywako kanambiza kuipata." 21 Isaka niyo amgamba Yakobo, "So hagihi na miye hutoze mwanagu nimanye kindedi kugamba weye ywi Esau kindedi hegu bule." 22 Yakobo amsogeelaga ise. Ise amtozaga niyo agamba, "Izwi dyako dyenga dya Yakobo, mna mikono yako haitoza enga ya Esau." 23 Hadahaga kumanya kugamba andaga ni Yakobo kwaviya mikono yakwe yandaga ina fili enga ya Esau, ivo niyo akonga kumvikila. 24 Mna amuuzaga kaidi, "Weye ni we mwanangu Esau ywe kindedi?"

Yakobo amhitulaga ise akagamba "Ni miye."

25 Isaka niyo agamba, "Haya nink'he iyo inyama nidye ukala wako mwanangu, akajika aho huvikile." 26 Niyo Ise agamba, "So unikumbatile kwa kuninonela mwanagu." 27 Ivo Yakobo amwiziilaga ise hagihi ise niyo amnonela, ise naye eze eve mhemp'he we zisuke zakwe niyo amvikila. Agambaga, "Mhemp'he wedi we zisuke za mwanangu ni enga mhemp'he wa nk'honde ivikilwe ni Zumbe 28 Mnungu akwink'he fula kwa lupisi lwakwe naho nk'honde yako inde kitefe. Akwink'he nk'hande na divai vitendese. 29 Want'hu wa si zose wande wandima wako, naho want'hu wafike madi hameso hako. Unde kilongozi cha wanduguzo na welekwa wa nyokwe wakufikile madi. Wose wakuunga wakuligite waligitwe, wadya wakuunga wakuvikile, nawo wavikilwe."

30 Isaka eze ibinde kwink'hiza uvikilwa aaho Yakobo eze ahalawe, nduguye Esau auyaga kulawa kwo kongola. 31 Yehe naye ambikaga nk'hande yedi niyo aigala kwa ise niyo amgamba, "Tate itakwikala udye inyama hwigaile vileke univikile."

32 Isaka niyo auza, "Ni weye yuhi?"

Esau niyo ahitula, "Ni miye mwanao mkulu Esau." 33 Isaka niyo etuka na kuzingiza kwa wogohi niyo auza, "Ni ani akomile nyama niyo anigaila? Hiidya umwo weye wandile ukei kwiza. Himvikila pele, naivo yehe ni mvikilwa mazuwa yose."

34 Esau eze eve milosi ya ise, ailaga kwa izwi kulu na kwa usungu mkulu niyo agamba, "Tate nivikile name!"

35 Isaka niyo agamba, "Nduguyo keza niyo anidant'hiliza. Kauguha uvikilwa wako."

36 Esau niyo agamba, "Kaidi aka akanihujila. Nivo vikuleka etangwa Yakobo. Zina idi kwa Kiibulania nuko kugamba, hujila. Kaguha uwagilwa wangu wo welekwa wa nk'hongo, haluse naho aguha uvikilwa wangu. Tate! Hunisigazile uvikilwa?"

37 Isaka ahitulaaga akagamba, "Himtenda kale kunda mkulu kwako naho hiwa tenda wanduguze kunda watumwa wakwe. Himwink'ha nk'hande na divai. Hina cha kukudamanyila mwanangu!"

38 Esau agendeelaga kumlombeza ise akagamba, "Ivo weye Tate una uvikilwa umwenga du? Nivikile name tate!" Akongaga kuila kwa izwi kulu.

39 Isaka niyo amgamba

"Wikazi wako nounde hale na sanga ya kitefe

naho hale na mnyuzu ukulawa kulanga.

40 Wikazi wako nounde wa kutoana na want'hu na kutaha vint'hu vawe,

mna ywi mtumwa ywa nduguyo.

Aho ukeza kusaguka

Hounde mtumwa ywakwe naho."

41 Esau amwihiyaga Yakobo kwaviya ise nakamvikila niyo alonga mwo moyo wakwe, "Lupisi lwo kuhongeza kwajili ye file ya tate lwihagihi, niho nenimkome ndugu yangu Yakobo."

42 Mna Labeka eze ave mzungu wa Esau wa kumkoma niyo amwitanga na kumgambila Yakobo mwanawe akugamba, "Tegeleza nduguyo Esau aika mzungu wa kukukoma. 43 Haluse mwanagu damanya aya hukugambila. Sunguza wiite Halani kwa mkulu Labani, 44 ukekale naye kwa lupisi mpaka maya ya nduguyo yamseele 45 no kujala kiya umtendele, akajika neni mtume mnt'hu akubase. Nii nibanikilwe na nyose waidi kwa zuwa dimwenga?"

46 Niyo Labeka amgambaga Isaka, "Nna usungu mwo moyo kwajili ya wavele awa we Kihiti wa Esau. Uneva Yakobo naye analomba mvele ywa Kihiti. Wikazi wangu una uwedi wani?"