1 Mnungu niyo awavikila Nuhu na wanawe akawagamba, "Yelekeni mgenyele, mwiimemeze isi. 2 Makala yose na madege mwo ulanga na vint'hu vose vimemile mwe isi na samaki zose kwe bahali, nevimwogoheni. Ivo vose viikwa mwo udahi wenyu. 3 Neniwenk'heni kila kina ugima kinde nk'hande yenyu, enga viya niwenk'hileni amaziti, naho haluse nawenk'hani kila kint'hu. 4 Mna msekudya nyama ina sakame, kwaviya ugima umwe sakame. 5 Mnt'hu yeyose akumkoma miyawe naye nenimsengele kwa kumkoma, naho kala dyodyose nedimkome mnt'hu nenidikome. 6 Akuunga amkome mnt'hu, naye naakomigwe ni mnt'hu kwaviya mnt'hu kaumbwa akeigile kwa Mnungu."

7 "Nyuwe yelekeni mgenyele, mwelekese mkagenyele mwe isi yose."

8 Mnungu amgambaga Nuhu na wanawe, 9 "Haluse naika Ndagano yangu na nyuwe hamwenga ne welekwa wenyu wakwiza, 10 ne viumbwa vose na madege yose na makala yose na kila kiya kilaile mwe safina hamwenga na nyuwe na kila kiumbwa kino ugima mwe isi. 11 Naika lagano dyangu mwa nyuwe kugamba henibanage pele naho viumbwa kwa ugubiko mkulu wa mazi mwe isi, hokunde naho na ugubiko mkulu wa mazi ukuunga uibanange isi." 12 Niyo Mnungu agamba, "Iki nicho kilagiso mwe dilagano idi huika na nyuwe hamwenga ne viumbwa vose vina ugima, lagano dya vyeleko vose vikwiza. 13 Naika tamwasi dyangu mwa mavunde. Neinde kilagiso che dilagano dyangu ne isi. 14 Haigubika isi na mavunde tamwasi niyo dyailaila mwa mavunde, 15 neni kumbukile dilagano dyangu kwenyu kwa makala yose, kugamba ugubiko mkulu wa mazi houkome wose wana ugima kaidi. 16 Tamwasi dikalaila mwa mavunde, Nenidione no kukumbukila dilagano dyangu dya mazuwa yose mwa miye ne viumbigwa viumbe mwe isi." 17 Mnungu niyo amgamba Nuhu, "Icho nicho kilagiso che dilagano huika mwa miye na viumbwa vose vina ugima."

18 Wana Nuhu wafosaga mwe safina wandaga Shemu na Hamu, na Yafeti. Hamu amweleke Kanani. 19 Wana awa watatu wa Nuhu wandaga nawo wakale wa want'hu wose mwe isi.

20 Nuhu, andaga mlimi naho akongaga kulima nk'honde wa mizabibu. 21 Zuwa dimwenga anywelesaga divai aidamanyaga, niyo akolwa, niyo atambala kimbwigili kwe dihema dyakwe. 22 Hamu ise dya Kanani amuonaga ise ekimbwigili niyo agendaga kuwagambila wadya wanduguze waidi awo wandaga kuse. 23 Mna Shemu na Yafeti waguhaga mgolole niyo wakehasika kunyuma mwa maega yawe. Wengilaga kisengelenyuma kwe dihema dya tati yawe niyo wamgubika wakayaonya meso yawe ukwo walawile wase kuuona umbwigili wa tati yawe. 24 Nuhu eze aleukwe no kubunk'hula kiya mwanawe mdodo amtendile, 25 niyo agamba,

"Aligitwe Kanaani!

Naande mtumwa ywa watumwa kwa wanduguze.

26 Naho niyo agamba, atogolwe Zumbe Mnungu ywa Shemu!

Kanaani ande mtumwa ywa Shemu.

27 Mnungu amgenyeze Yafeti. Zina idi kwa kiibulania, nuko kugamba, mgenyezo.

Welekwa wakwe wikale mwe dihema dya Shemu!

Kanaani naande mtumwa ywa Yafeti."

28 Ugubiko mkulu wa mazi mwe isi wize womboke, Nuhu ekalaga miaka magana matatu na milongo mishano. 29 Nuhu abanikaga akanda na miaka milongo kenda na milongo mishano.