1 Akajika aho, Yakobo amuonaga Esau akeza hamwenga na want'hu milongo mine. Ivo niyo awapanganiza wana mwa Lea na Laheli na mwa wambizi wakwe waidi. 2 Niyo awaika watumwa na wana ywawe kunda wa nk'hongo, niyo wamtimila Lea na wanawe, niyo kunyuma awaika Laheli na Yusufu. 3 Yakobo aitaga kulongole mwa wose niyo afunama hasi mwe sanga nk'hanana mfungate umwo akaunga ambwiile mkuluwe. 4 Mna Esau na Yakobo kila yumwenga amgulukilaga miyawe, niyo amkumbatila na kumnonela. Wose waidi wandaga wakaila. 5 Esau eze abagaze no kuwaona wavele na wana, auzaga, "Awa unanawo ni wahi?"

Yakobo niyo ahitula, "Mkulu, awa nawo wana na wakazangu awo Mnungu anink'hile kwa uwedi wakwe." 6 Niyo wadya watumwa weza hamwenga na wana wawe no kumwinamila, 7 Lea nae niyo eza hamwenga na wanawe, niyo wabindiliza. Yusufu na Laheli nawo niyo weza no kumwinamila.

8 Esau niyo auza, "Mafyo ya mifugwa matuhu nidugane nayo nivo yagaaze?"

Yakobo niyo ahitula, "Idi ni geleko dyako vileke nizumilwe ha meso ha mkulu."

9 Mna Esau niyo amhitula, "Nnanao ugoli ubindile ingi ndugu yangu, ugoli uwo unde wako mwenye."

10 Yakobo niyo agamba, "Bule, uneva hipata mbazi kwako, nihokele mageleko yangu. Kuuona uso wako kwangu miye ni enga kuuna uso wa Mnungu, kwaviya kunihokela kwa kinyemi kikulu. 11 Nakulombeza uhokele mageleko yangu aya hwigaile, Mnungu kanda ywedi kwangu no kunink'ha kila kint'hu kiya niungile." Yakobo agendeelaga kumhembeleza kwa mbazi niyo azumila.

12 Esau niyo agamba, "Nekigendeele ne nt'hambo. Miye nohulongoele."

13 Yakobo niyo amhitula, "Zumbe dyangu kamanya kugamba awa wana wasokela, naho aungwa kunda na wengele kwe mifugwa ino yonk'heza. Uneva inagendezeswa lugendo lutali neife yose. 14 Weye longola, name nohutimile mp'halahole, nekikombeke miye na wana ne mifugwa nekikubwiile uko Seili."

15 Esau niyo agamba, "Vedi, goja hwasile want'hu wangu mwizanye."

Mna Yakobo niyo ahitula, "Usekutenda ivo, kwaviya miye hiunga kuzumilwa ni weye du." 16 Dizuwa diya Esau akongaga utafi wo kuuya Edomu. 17 Mna Yakobo aitaga Sukoti, uko azengaga mahema yakwe yo kwikala, na kwajili ye mifugwa yakwe. Nivo vikuleka hant'hu aho hetangwa Sukoti. Kwa Kiibulania nuko kugamba, "Maheha".

18 Mwo kuuya kulawa Mesopotamia Yakobo abulaga vedi mo mzi wa Shekemu mwe isi ya Kanani no kuzenga nk'hambi yakwe hagihi no mzi. 19 Agulaga kipande icho kulawa kwa welekwa wa Hamoli ise dya Shekemu kwa vipande gana va matundu umwo nimo azengaga nk'hambi yakwe. 20 Adamanyaga kilingo cha kutambikila niyo ahenk'ha zina niho, Eli Elohi Izilaeli.