1 Yakobo afunganyaga kila kiya andaga nacho, no kuita Belisheba, niyo amlavila nt'hambiko Mnungu ywa Isaka uyo andaga ise. 2 Naho Mnungu alongaga na Yakobo mwe sozi mwe kilo niyo etenga, "Yakobo, Yakobo!" Yakobo niyo etika, "Woe."

3 Niyo agamba, "Miye ni Mnungu, Mnungu ywa Iso. Use kogoha kuita Misili, kwaviya nohutende isi nk'hulu kudya Misili. 4 Miye mwenye neniite hamwenga na weye uko Misili, naho nenivivuze vyeleko vako mwe isi iino, naho Yusufu mwenye naakugome ameso yako."

5 Yakobo niyo ahalawa Belisheba, naho wanawe wamwinulaga tatiyawe, na wakembe wawe na wavele wawe na kuwakweza mwa magali yadya Falao awenk'hile. 6 Waguhaga ne mifugwa yawe, na vint'hu vose wapataga mwe isi ya Kanani, niyo waita Misili. Niyo Yakobo aguha imp'huga yakwe yose, 7 wanawe we kilume na wezukuluwe we kilume na wanawe wekike na wezukulu we kike na welekwa wakwe wose no kwiita nawo wose uko Misili.

8 Aya nayo mazina ya wana wa Yakobo wengilaga Misili, Lubeni mwelekwa ywa nk'hongo, 9 na wana wa Lubeni ni Hanoki na Palu na Heziloni na Kami. 10 Wana Simioni ni awa, Yemueli na Yamini na Ohadi na Yakini na Sohali na Sauli, uyo andaga mwana ywo mvele ywe Kikanani. 11 Wana Lawi ni awa Geshoni na Kohathi na Melali. 12 Wana Yuda ni awa, Eli na Onani na Shela na Pelesi na Zela. Mna Eli na Onani wafiilaga uuko Kanaani. Wana wa Pelisi wandaga ni Heziloni na Hamuli. 13 awa nawo wana wa Isakali. Tola na Puva na Yashubu na Shimloni. 14 Wana Zabuloni ni awa, Seledi na Eloni na Yaleeli. 15 Awa nawo wana wa Lea amwelekele Yakobo uko Mesopotamia ikanda ni hamwenga na Dina. Cheleko chose cha Lea ni want'hu milongo mitatu.

16 Awa nawo wana wa Gadi. Sefoni na Hagi na Shuni na Esibini na Eli na Elodi na Aleli. 17 Awa nawo wana wa Asheli. Imna na Ishiva na Ishivi na Belia na lumbu dyawe uyo Sela. Wana Belia wandaga Hebel na Malikieli. 18 Awa ni wana wa Zilipa awo Labani amwink'haga mwanawe Lea, niyo amwelekela Yakobo wana mlongo na mtandatu.

19 Laheli amwelekelaga Yakobo wana waidi. Yusufu na Benjamini. 20 Uko Misili Asenati mwana Potifa, uyo andaga mlavant'hambiko ywo mzi wa Oni, amwelekelaga Yusufu wana waidi, Manase na Ifulaimu. 21 Benjamini awelekaga, Bela na Bekelina Alshebel na Gela na Naamani na Ehi na Loshi na Hupimu na Alidi. 22 Awa ni wana wa welekwa wa Yakobo na Laheli, kwa hamwenga wandaga mlongo na wane.

23 Dani elekaga mwana yumwenga, naye andaga Hashimu. 24 Nafutali awelekaga. Yaseeli na Guni na Yeseli na Shilemu. 25 Awa mfungate, ni welekwa wa Yakobo na Biliha, mtumwa mvele, uyo Labani amwink'haga mwanawe Laheli.

26 Uwazilo wa welekwa wa Yakobo wa sakame yakwe mwenye, waitile Misili wandaga milongo mtandatu na mtandatu, haheina kuhanganya wakaza wanawe. 27 Unawaza hamwenga na wadya wana waidi wa Yusufu awo awelekaga uko Misili, want'hu wose we nyumba ya Yakobo awo waitaga Misili wandaga milongo mfungate.

28 Yakobo amtumaga Yuda amlongoele Yusufu amlongoze sila kwingila Gosheni. Weze wabule mwo mkoa wa Gosheni, 29 Yusufu aguha digali dyakwe dikuvutwa ni falasi niyo aita Gosheni kumhokela ise. Aaho Yusufu eze alawanye hameso ya ise, amkumbatilaga ise kwa lupisi lutali. 30 Yakobo niyo amgamba mwanawe, "Nenife elo haluse, kwaviya hikuona mwa meso kugamba ukei umgima."

31 Yusufu niyo awagamba wanduguze na want'hu wose we nyumba ya ise, "Neniite hamgambile Falao, naho nehamgambe, Wanduguzangu ne mp'huga yose ya tate awo wandaga wakekala kwe isi ya Kanani weza kwangu. 32 Nehamgambile kugamba nyuwe muwadimi wa mafyo, naho mwiza ne zimbuzi ne zingoto ne zin'gombe, na kila kint'hu chenyu. 33 Falao akeza kuwetangani no kuwauza, ndima yenyu ni ihi? 34 Nyuwe nomumgambe, watumwa wako kinda wadimi wa mafyo kukongela udodo wetu hata ivi haluse, enga ivo wakale wetu watendaga. Naivo nomwink'higwe kwikala uko Gosheni." Yusufu alongaga ivo kwaviya wadimi wose wa ngoto nawakabezwa mwe isi ya Misili.