1 Awa nawo welekwa wa Esau uyo akwitangwa iviya iviya Edomu. 2 Esau alombaga wavele wa Kikanani, awo Ada mwana Elini uyo Mhiti na Oholibama mwezukuluwe dya Anahi naho mwezukuluwe dya Zibioni Mhiti, 3 iviyaiviya amlombaga Basemati mwana Ishumaeli naho ni lumbudye dya Nebaioti. 4 Ada niyo amweleka Elifazi na Basemati niyo amweleka Leueli, 5 na Oholibama niyo amweleka Jeushi na Jalamu na Kola. Esau awelekaga awa woseni mwe isi ya Kanani.

6 Niyo Esau awaguha wakaziwe na wanawe we kike na kilume, na want'hu wose wa mwe nyumba yakwe, hamwenga no ugoli wakwe wose apatile mwe isi ya Kanani, niyo aita kwe isi nt'huhu, hale na nduguye Yakobo. 7 Ahalawaga kwaviya isi idya nawakekala na Yakobo, heikawakint'ha, kwaviya wandaga na mafyo makulu ya udimi, naivo hawakadaha kwikala wose hamwenga. 8 Niyo Esau akwikala kwe isi ya vigulu ikwitangwa Seili. Zina tuhu dya Esau niye Edomu.

9 Awa nawo welekwa wa Esau, awo wandaga wakale wa Waedomu. 10 Esau elekaga mwanawe ywa kilume kwa mkaziwe Ada na kumwink'ha zina niye Elifazi naho niyo amweleka Leuli kwa mkaziwe Basematithi. 11 Elifazi elekaga wana kilume washano, awo ni Temani na Omali na Zefo na Gatamu na Kenazi. 12 Iviyaiviya Elifasi elekaga mwana kilume akwitangwa Amaleki kwa Timna uyo andaga mwuwele ywakwe. Awa nawo wezukulu wa Ada andaga mkaza Esau. 13 Lueli elekaga wana kilume wane, nawo ni Nasani na Zela na Shama na Miza. Awa wandaga wezukulu wa Basemathi uyo andaga mkaza Esau.

14 Mkaziwe mtuhu ywa Esau uyo Oholibama, mwana kike ywa Anahi na mwezukulu wa Sibeoni elekaga wana kilume watatu, Jeushi na Yalamu na Kola.

15 Awa nawo welekwa wa Esau wendile watemi wa makabila ye hengi. Cheleko cha Elifasi mwana ywa nk'hongo ywa Esau, nuko alaile mtemi Temani na mtemi Omali na mtemi Zefa na mtemi Kenazi, 16 na mtemi Kola na mtemi Gatamu na mtemi Amaleki. Awo wose wandaga ni welekwa wa Ada uyo andaga mkaza Esau.

17 Na kwa Lueli mwana ywa Esau, nuko walawile watemi awa, mtemi Nahati na mtemi Zala na mtemi Shama na mtemi Miza. Awa woseni wandaga welekwa wa Besemathi mkaza Esau.

18 Awa nawo watemi walaile kwa welekwa wa Oholiboma mkaza Esau uyo andile mwana kike ywa Anahi, mtemi Yeushi na mtemi Yalamu na mtemi Kola. 19 Awo ni wana wa Esau naho awa nawo wandile watemi wa Makabila aya yose welekwa wa Esau.

20 Awakaya awenye we isi ya Edomu, nawapangana mwe makabila yawalawile kwa Seili uyo andaga ywa kabila dya Waholi. Ivo walawaga kwa Lotani na Shobali na Zibioni na Anahi, 21 na Dishoni na Ezeli na Dishani. Wana awa wa Seili wandaga nawo watemi we isi ukwo Edomu.

22 Lotani andaga niye mkale ywa Holi na Hemani. Uyo Lotani andaga na lumbudye akwitangwa Timuna.

23 Shobali andaga niye mkale ywe zink'holo za wakina Alavani na Manahati na Ebali na Shefo na Onamu.

24 Zibioni elekaga wana kilume waidi, Aya na Anahi. Uyu Anahi ni yudya abunk'hulaga zin'choko za mazi ye moto mdya mwe nyika, umwo andaga akadima zimp'hunda za ise. 25 Wana wa Anahi ni Dishoni na oholibama uyo andaga mkale ywe zink'holo za Hemdani na Eshibani na Itilani na Kelani. 26 Anahi iviya iviya andaga na mwanawe ywe kike etangagwa Oholiboma.

27 Ezeli andaga niye mkale ywe zink'holo za Bilihani na Zaavani na Akani.

28 Dishani andaga niye mkale ywe zink'holo zawe, Uzi na Alani.

29 Awa nawo wandile watemi wa Waholiti, mwe isi ya Edomu, mtemi Latani na mtemi Shobali na mtemi Zibioni na mtemi Anahi, 30 na mtemi Dishomi na mtemi Ezeli na mtemi Dishani.

31 Umwo kwandaga hakunati kulaila maseuta yoyose mwe Izilaili, awa nawo wandaga maseuta mwe isi ya Edomu. 32 Bela mwana Beoli andaga seuta ywa Edomu, naho zina dyo mzi wakwe wandaga Dinihaba. 33 Bela eze abanike Jobabu mwana Zela kulawa Bozila niye auguhaga useuta. 34 Yobabu eze abanike, Hushamu kulawa kwe isi ya Watemani auguhaga useuta. 35 Hushamu eze abanike, Hadadi mwana Bedadi auguhaga useuta, mzi wakwe mkulu wandaga ni Avithi. Uyu niye awatowaga na kuwahuma Wamidiani mwe isi ya Moabu. 36 Hadadi eze abanike, Shamula kulawa Mashileka auguhaga useuta. 37 Samla eze abanike, Sauli kulawa Lehobosi, uko hagihi no mto Efulati auguhaga useuta. 38 Sauli eze abanike, Balihanani mwana wa Akiboli aguhaga useuta. 39 Baal hanani mwana Akiboli eze abanike, Hadadi auguhaga useuta, naho zina dyo mzi wakwe dikanda nidyo Pau. Mkaza Ekiboli andaga Mehetabeli, mwana kivele ywa Matuledi, naho ni mwezukulu ywa Mezahabi.

40 Esau andaga niye mkale ywe zink'holo izi za Edomu, Timuna na Alivahi na Jeteti, 41 Oholibamahi na Elahi na Pinoni, 42 Kenazi na Temani na Mibizali, 43 Magidieli na Ilamu. Kila hadya dikale kabilia idyo, hetangilagwa dizina dya izo zink'holo. Naho wose nawalaila kwa Esau uyo andile mkale ywa Waedomu.