1 Adamu agonaga na Hawa mkaziwe, Hawa niyo engilwa ni ubovu. Engila nyumba mwanawe uyo Kaini. Niho hawa agambaga, "Kwa wambizi wa Zumbe Mnungu hipata mwana kilume." 2 Engilaga nyumba mwana kilume mtuhu etangwagwa Habili. Habili andaga mdimi, Kaini naye andaga mlimi. 3 Iwize lwomboke lupisi, Kaini aguhaga hant'hu ho ulozo niyo awigala kunda malavo kwa Zumbe, 4 Abeli naye aguhaga nt'hula sasu ze zingoto, niyo achinja, no kuguha zinyama zigimbale no kumlavila Mnungu. Zumbe elelwagwa ni Habili ne nt'hambiko yakwe, 5 mna amlemelaga Kaini na malavo yakwe. Kaini aihiwagwa niyo afujuka kwa maya. 6 Zumbe amgambaga Kaini, "Nii ukaihiwa? Nii ukafujuka? 7 Wandile wadamanye yawagile, hegu hwa zumilwe? Mna huna damanye yawagile, wavu wakukimaila ho lwivi lwako, naho wakunyatila ukugwile, mna weye waungwa uuhume."

8 Niho Kaini amgambaga nduguye Habili, "Kite ha kabuga." Umwo wandaga kwa kabuga Kaini amkump'hukilaga nduguye niyo amkoma.

9 Zumbe amuuzaga Kaini, "Nduguyo Abeli ekuhi?"

Kaini niyo ahitula, "Himanyize uko eli. Miye ni mtumwa ywa kumdima ndugu yangu?"

10 Niyo Zumbe agamba, " Kudamanyai? Sakame ya nduguyo yaniila kulawa mwe sanga. 11 Haluse, weye kuligitwa mwe sanga iyo ikegubule niyo sakame ya nduguyo uyo umkomile yanweela umwo! 12 Ndima yoyse noudamanye mwe sanga heikwink'he ulozo, naho nounde mnt'hu ywa kwangadika heena nt'hulwe mwe isi."

13 Kaini niyo amgamba Mnungu, "Usengelo wangu ukulisa hikudaha kuufinyiliza. 14 Dyelo kunigulusa kwe nk'honde ina ulozo no undiilo wako. Neninde hina kaya no kwangadika mwe isi, naho yeyose naanione naanikome."

15 Mna Zumbe Mnungu niyo agamba, "Bule. Uneva yeyose anakukoma, naalihizwe nk'hanana mfungate kujinka weye." Ivo Mnungu amwikaga kiwalo Kaini kumkanya mnt'hu yeyose akuunga wamuone Kaini kugamba asekumkoma. 16 Kaini niyo ahalawa ho undiilo wa Mnungu no kugenda kwikala kwe isi ikwitangwa Nodi, ulailo wa zuwa mwa Edeni.

17 Kaini na mkaziwe wapataga mwana kilume wamwink'hile zina niye Enoko. Niyo Kaini akonga kuzenga mzi niyo auwink'ha zina dya mwanawe. 18 Enoko amwelekaga Iladi, Iladi naye amwelekaga Mehuyaeli, Mehuyaeli naye amwelekaga Metushaeli, Metushaeli naye amwelekaga Lameki. 19 Lameki alombaga wavele waidi, yumwenga etangagwa Ada yumwenga naye etangagwa Sila. 20 Ada amwelekaga Yabali, uyo andaga mkale ywa wadimi wandaga wakekala mwe zink'hambi. 21 Nduguye andaga ni Yabali, mkale ywa wila wandaga wakatoa miluli na mazeze. 22 Sila amwelekaga Tuba kaini, mkale ywa wasani vint'hu va shaba vilama. Lumbudye dya Tuba Kaini andaga ni Naama.

23 Lameki niyo awagamba wakaziwe,

"Ada na Sila tegelezeni izwi dyangu,

wakaza Lameki tegelezeni kiya hulonga.

Hikoma mnt'hu kwaviya kunigela nk'wenge,

Himkoma mbwanga kwaviya kanilumiza.

24 Uneva Kaini naalihizwe nk'hanana mfungate, ikindedi Lameki naalihizwe,

yeyose naanikome miye naalihizwe nk'hanana milongo mfungatena mfungate."

25 Adamu apataga naho mwana kilume kwa mkaziwe Hawa. Adamu amwink'haga mwana uyo zina niye Seti, akagamba, "Mnungu kanink'ha mwana hant'hu ha Abeli, akomigwe ni Kaini." 26 Seti naye apataga mwana kilume, niyo amwink'ha zina dya Enoshi.

Aho niho want'hu wakongaga kumlombeza Mnungu kwa zina dyakwe.