1 Yusufu adundugaga kufinyiliza hameso ya wandima wakwe niyo alagiza wafose kuse. Naivo hakwandaga na yeyose umwo Yusufu akaketambalisa kwa wanduguze. 2 Ailaga kwa izwi kulu vilekile Wamisili weve, niyo mbuli iyo yevika kwe nyumba ya Falao. 3 Niho Yusufu awagambaga wanduguze, "Ni miye Yusufu. Tate akei mgima?" Wanduguze wadundugaga kumhitula kwaviya wengilwagwa ni wogofi umwo waka kaulana. 4 Naho Yusufu niyo awagamba, "Nisogeeleni hagihi." Watendaga ivo awagambilaga, Yusufu niyo awagamba, "Ni miye ndugu ywenyu Yusufu yudya mwamtagaga uku Misili. 5 Haluse mse kunda na kinyulu no kukekalaliza wenye kwa kunitaga uku Misili. Mnungu mwenye niye anitumile niwalongoele vileke nikombole wikazi wa want'hu. 6 Uno ni mwaka wa kaidi du wa gumbo mwe isi, iyuko miaka mituhu mishano kulongole, hokunde na kulima hegu kuvuna. 7 Mnungu kanigala niwalongoeleni vileke awahonye kwa kwehela kuwona kugamba nyuwe ne cheleko chenyu mwasigala wagima. 8 Elo hiyo nyuwe mnigale uku, mna ni Mnungu. Yehe kanitenda kunda mlangilizi ywa Falao na mkulu ywe nyumba yakwe na kilongozi mkulu mwe isi yose ya Misili."

9 Msunguze kuuya kwa tate mkamgambe, ivi nivo akulonga mwanao Yusufu, "Mnungu kanitenda kilongozi mkulu ywa Misili yose, sunguza wize. 10 Noukekale mwo mkoa wa Gosheni, naho nounde hagihi na miye, weye na wanao na wezukuluwo na mafyo yako, hamwenga na wadimi wako na vose unanavo. 11 Unekala Gosheni, nohulele kwaviya yeza miaka mituhu mishano ye digumbo naivo weye hamwenga ne nyumba yako yose na vose mnanavo mnase kuzehuka."

12 Yusufu agendeelaga kulonga, "Naho haluse nyuwe wenye mniona na weye ndugu yangu Benjamini kuniona kugamba ni miye Yusufu. 13 Mkamgambile tate ivo nili na udahi aha Misili, naho mgambileni yose yadya myaone. Sunguzeni kamwigaleni uku."

14 Yusufu niyo amkumbatila nduguye Benjamini, niyo akonga kuila, Benjamini naye niyo amkumbatila nduguye uku naye akaila. 15 Uku akagendeela kuila, awakumbatilaga wanduguze awatuhu na kuwanonela. Akajika aho wanduguze wakonga kusimuila naye.

16 Mbuli izo zize zimanyike kwe nyumba ya Falao kugamba wanduguze dya Yusufu weza, Falao na wandima wakwe weleleswagwa. 17 Falao niyo amgamba Yusufu, "Wagambe wanduguzo watwike mizigo mwe zimp'hunda zawe wauye Kanani. 18 Waite wakamguhe tati yawe, ne zimp'huga zawe, weze aha. Neniwenk'he hant'hu hedi mwe Misili, nawo nawande na vint'hu va kuwakint'ha kwa wikazi wawe mwe isi. 19 Naho wagambile kugamba, waguhe magali yakuvutwa na falasi aha Misili yo kuwaguhila wakembe wawe, hamwenga na wavele wawe na tati yawe, weze aha. 20 Mse kwangadikila viya mnanavo uko, kwaviya ayedi yose ya Misili nayande yenyu."

21 Wana wa Yakobo watendaga enga viya walagizwe. Yusufu awenk'haga magali na mp'hamba enga ivo seuta alongile. 22 Yusufu awenk'haga kila yumwenga ywawe suke mp'ya za kwasakanya, mna niyo amwink'ha Benjamini masawa magana matatu na suke shano mp'ya za kwasakanya. 23 Ivia ivia nakamwigaila ise vint'hu vedi va Kimisili kwaajili ya nt'hambo yakwe ya kuuya. Vitwikigwe mwe zimp'hunda mlongo, na mp'hunda nt'huhu mlongo zitwikigwe uhule na mikate na mp'hamba nt'huhu. 24 Niyo alagana na wanduguze, umwo wandile wakahalawa awagambaga, "Mse kukwank'hilana mwe sila!"

25 Wahalawaga Misili, no kuuya kwa tatiyawe ukwo kwe isi ya Kanaani. 26 Niyo wamgamba tati yawe, "Yusufu akei mgima! Ikindedi niye kilongozi mkulu ywe isi yose ya Misili!" Yakobo niyo etukisa mna hahuwile.

27 Mna weze wamgambile zimbuli zose alongile Yusufu no kuwona magali egailwe ni Yusufu vileke yamguhe kuita Misili, moyo wa Yakobo tati yawe watondowalaga. 28 Yakobo niyo ahitula, "Haluse himanya kugamba mwanangu Yusufu akei mgima! Neniite haonane naye iivi nikei kubanika."