1 Sala ekalaga na kubuza miaka gana na milongo miidi na mfungate. 2 Abanikilagwa uko Kiliti Aba, Hebuloni mwe isi ya Kanani. Ibulahimu niyo ahongeza ifile ya mkaziwe. 3 Alekaga ikimba cha mkaziwe niyo awabasa Wahiti, no kuwagamba, 4 "Miye ni mgeni hwikala aaha na nyuwe, nitagileni hant'hu ni mmose mkazangu."

5 Niyo wamhitula, 6 "Kitegeleze, mkulu. Weye ywi mnt'hu mkulu vitendese aha hetu, mmose mkaziyo, hohoose hadya no usagule. Hahali mnt'hu yeyose mwa suwe naakunyime ho kummosela msanga mkaziyo."

7 Ibulahimu niyo awafunamila, 8 no kugamba, "Uneva mnizumila ni mmose mkazangu aha, nilombezeleni kwa Efuloni mwana ywa Zoali 9 anitagile hant'hu ha Makepela, idya ikolumbili lwo nk'honde wakwe. Nilombezeleni anitagile hant'hu he vikuta va kuwamosela msanga want'hu wangu. Mgambeni anitagile kwa yombe dikint'hile aha hameso yenyu." 10 Efuloni mwenye andaga aaho kekala na Wahiti aho hant'hu he midugano he nk'hili yo mzi, ahitulaga wose wakategeleza, 11 "Tegeleza, mkulu, nohwink'he nk'honde wose na ho kummosela msanga mkaziwo. No hwink'hile ha meso ha want'hu wangu, udahe kummoselaa msanga mkaziyo."

12 Ibulahimu niyo afunama kwa kweseleza naho kwa Wahiti 13 niyo amgamba Efuloni, want'hu wose wakategeleza, "Nawalombezani, mnitegeleze. Nenigule nk'honde wose. Hokela maliho yangu, nenimmose msanga mkazangu aho."

14 Efuloni niyo ahitula, 15 "Mkulu, diyombe dyo nk'honde ni matundu magana mane du. Icho ni kint'hu chani mwa suwe? Mmose msanga mkaziyo uumo." 16 Ibulahimu azumilaga niyo ahima kihimo cha matundu icho Afuloni awatambulaga Wahiti wakamwiva, kugamba ni matundu magana milongo mine, viligane ne vihimo vo lupisi ulo.

17 Ivo nivo vandile hata unk'honde uwo wandaga wa Efuloni uko Makipela, ulailo wa zuwa wa Mamle unda wa Ibulahimu. Imp'hanga yandile umo ne miti yose mwo mgunda, mpaka kwo uheelo wo mgunda, 18 neimanyika kwa Wahiti wose wandile aaho, kugamba Ibulahimu niye mta hant'hu aho.

19 Yeze yajike ayo, Ibulahimu ammoselaga msanga mkaziwe Sala kwe mp'hanga, mwe isi ya Kanani. 20 Ivo umgunda ne mp'hanga vandaga uumwo venk'hizagwa kwa Ibulahimuwa vinde vakwe na welekwa wakwe hande hant'hu ha kumosela msanga.