1 Ulu nulo ludongo lwe cheleko cha Adamu. Umwo Mnungu awaumbaga want'hu, awaumbaga wakeigile na yehe mwenye. 2 Awaumbaga mgosi na mvele, niyo awavikila, no kuwetanga "Want'hu". 3 Umwo Adamu eze abule miaka gana na milongo mitatu, apataga mwana akeigile na yehe mwenye, niyo amwitanga Seti. 4 Eze amweleke Seti, Adamu ekalaga miaka magana mnane mituhu. Apataga wana watuhu wakike na wakilume 5 niyo abanika akanda na miaka magana kenda na milongo mitatu.

6 Umwo Seti andaga na miaka gana na mishano, apataga mwana, etangwagwa Enoshi. 7 Eze amweleke Enoshi ekala miaka magana mnane na mfungate. Apataga wana watuhu wakike na wakilume 8 niyo abanika akanda na miaka magana kenda na mlongo na miidi.

9 Enoshi eze abule miaka milongo kenda amwelekaga Kenani, 10 Enoshi eze amweleke Kenani ekalaga miaka magana mnane na mlongo na mishano mituhu, 11 Enoshi abanikaga akanda na miaka magana kenda na mishano.

12 Umwo Kenani andaga na miaka milongo mfungate, apataga mwana kilume uyo etangagwa Mahalaleli, 13 Kenani eze amweleke Mahalaeli ekelega miaka magana mnane na milongo mine mituhu. Elekaga wana watuhu wakike na wakilume 14 Kenani abanikaga akanda na miaka magana kenda na mlongo.

15 Mahalaleli eze abule miaka milongo mtandatu na mishano, elekaga mwana kilume etangwagwa Yaledi, 16 Eze amweleke Yaledi, Mahalaeli ekalaga miaka magana mnane na milongo mitatu. Elekega wana watuhu wakike na wakilume 17 Mahalaeli abanikaga akanda na miaka magana mnane na milongo kenda na mishano.

18 Umwo Yaledi eze abule miaka gana dimwenga na milongo mtandatu na miidi, elekaga mwana kiume etangwagwa Enoki, 19 eze amweleke Enoki, Yaledi ekalaga miaka magana mnane mituhu. Apataga wana watuhu wakike na wakilume 20 Yaledi abanikaga akanda na miaka magana kenda na milongo mtandatu na miidi.

21 Enoki eze abule miaka magana milongo mtandatu na mishano, apataga mwana kilume etangwagwa Metusela. 22 Akajika aho, Enoki ekalaga akamwelela Mnungu kwa miaka magana matatu niyo eleka wana watuhu wakike na wakilume. 23 Enoki ekalaga miaka magana mtandatu na mishano. 24 Ekelaga akamwelela Mnungu wikazi wose, niyo agiila, kwaviya aguhagwa ni Mnungu vileke ande hamwenga naye.

25 Umwo Matusela eze abule miaka gana milongo mnane na mfungate, elekaga mwana kilume, niye Lameki. 26 Eze amweleke Lameki ekalaga miaka magana mtandatu na milongo mnane na mbili. Elekaga wana watuhu wakike na wakilume 27 Metusela abanikaga akanda na miaka magana kenda na milongo mtandatu na kenda.

28 Lameki eze abule miaka gana na milongo mnane na miidi, elekaga mwana kilume. 29 Amwink'haga zina niye Nuhu, akagamba "Mwana uyu niye naakisangalaze kulawa mwe ndima ndala kikuidamanya suwe wenye mwe sanga iligitwe ni Zumbe." 30 Eze amweleke Nuhu, Lameki ekalaga miaka magana mashano na milongo kenda na mishano. Elekaga wana watuhu wakike na wakilume 31 Lameki abanikaga akanda na miaka magana mfungate na milongo mfungate na mfungate.

32 Nuhu eze abule miaka magana mishano, elekaga wana kilume watatu, Shemu na Hamu na Yafeti.