1 Naho Yakobo agendeelaga no utafi wakwe, umwo mwe sila adugananga na mtumigwa ywa kwe Mbingu. 2 Eze awaone niyo agamba, "Awa watoani wa Mnungu." Ivo ahetangaga hant'u aho Mahanaimu.

3 Yakobo atumaga wegala ulosi wamlongoele kwa nduguye Esau mwe isi ya Edomu. 4 Awasigiilaga kugamba, "Aya nayo mkuungwa mkamgambile mkulu Esau, ‘Mtumwa ywako Yakobo agamba, nahekala na Labani, naho nehinda hata ivi haluse. 5 Nna ng'ombe na mpunda na mbuzi na watumwa wa kilume na wa kivele. Haluse nakutumila ulosi uno weye zumbe dyangu, kugamba wadaha ukanionela mbazi.’ "

6 Wadya wegale ulosi weze wauye kwa Yakobo, wamgambaga, "Nekiita kwa nduguyo Esau, naho eza kukusingila. Ehamwenga na want'hu magana mane." 7 Yakobo ogohesaga na kwingilwa ni kinyulu. Awapangaga wadya want'hu andaga nawo hamwenga ne zingoto ne zimbuzi ne izing'ombe ne zingamia, mwa mafyo maidi. 8 Afanyanyaga kugamba, "Uneva Esau aneza kuditaha diya idifyo dya nk'hongo, diya dituhu nedikadaha kusumka."

9 Niho Yakabo akamlombeza Mnungu akagamba, "Unitegeleze weye Mnungu ywa tate Ibulahimu, naho Mnungu ywa tate Isaka, weye Zumbe niwe wanigambaga niuye kwa want'hu wangu na kwe isi yangu, naho nokunigamba kila kint'hu nekinde chedi kwangu. 10 Hiwagilwe kwa vovose kwo udya uwedi na uhuwilwa wako, udya unitendele mtumwa ywako. Nawombokaga umto wa Yolidani handa ne nk'home du yo kugendela, mna haluse nauya kaya na mafyo aya maidi. 11 Nalombeza, unihonye, na maya ya ndugu yangu Esau. Nogoha kugamba eza kunikump'hukila na kukikoma suwe chose hamwenga na wavele na wana. 12 Mna nokugamba nounidamanyile kila kint'hu kunda chedi, no kunink'ha welekwa wabindile ingi, hekwiina mnt'hu yeyose akudaha kuwawaza. Kwaviya uwingi wawe nounde enga msanga we bahali."

13 Kilo icho Yakobo agonaga aaho, asagulaga mifugwa kulawa mwa amafyo yakwe kugenda kumwink'ha mageleko nduguye Esau, 14 mbuguma za mbuzi magana maidi, na mavulata milongo miidi, 15 ngamia zikonk'heza milongo mitatu hamwenga ne zindama zawe, mbuguma milongo mine za ng'ombe, na majeku mlongo, mbuguma za mp'hunda milongo miidi na majeku ya mp'hunda mlongo. 16 Ayapangaga mwe wandima wakwe, kila yumwenga na fyo dyakwe. Niyo awagamba, "Longoleni, naho neniwaze nk'hacho kulawa mdimi yumwenga na fyo dyakwe, mpaka mdimi mtuhu na fyo dyakwe." 17 Niyo amgamba mtumwa ywa nk'hongo, "Umwo ndugu yangu Esau akeza kudugana na weye no kukuuza kugamba. Weye ywi mtumwa ywa ani? Waitahi? Mifugwa ino ulongoze ya ani? 18 umhitule kugamba, Mifugwa ino yo mtumwa ywako Yakobo. Egala mageleko kwa mkuluwe Esau. Yehe mwenye Yakobo eza kunyuma." 19 Niyo amsigiila iivo yudya ywa kaidi na ywa katatu na kwa wadya wose wandile wakatimila, "Ivi nivo mkuunga mlonge umwo mkadugana naye Esau. 20 Naho msekujala kumgambila, Mtumwa ywako Yakobo eyuko kunyuma eza." Yakobo afanyanyaga kugamba, "Mafa mwa mageleko aya humwink'ha yadahika naaleke kuniihia naho mafa naanilekele." 21 Alongozaga mageleko, mna yehe mwenye agonaga kwe nk'hambi.

22 Yakobo enukaga kilo ikia no kuwaguha wakaziwe wose waidi, na wavele wakwe watuhu waidi hi wa ndoza, na awanawe mlongo na yumwenga, niyo awombosa mwo mto Yaboki. 23 Eze ajike kuwombosa, niyo naho ambosa ne vint'hu vose andile navo, 24 mna mwenye niyo asigala kunyuma,

niyo mnt'hu yumwenga eza no kuhigana nae vyeleka mpaka kilokilo. 25 Uyo mnt'hu eze aone kugamba hakudaha kumhuma Yakobo, niyo amtenk'hula Yakobo mapeng'ene umwo wandile wakahigana. 26 Yudya mnt'hu niyo amgamba Yakobo, "Goja niite kwaviya kwatandazuka."

Yakobo niyo amgamba, "Hikukulekela, mpaka univikile."

27 Yudya mnt'hu niyo amuuza, "Weye wetangwa ani?"

Niyo ahitula, "Netangwa Yakobo."

28 Niyo yudya mnt'hu agamba, "Haluse howitangwe naho Yakobo. Kuhigana na Mnungu na want'hu, niyo wawahuma, ivo zina dyako nowitangwe Iziaeli." Nuko kugamba, "Kahigana na Mnungu."

29 Niyo Yakobo amgamba, "Nigambile dizina dyako."

Mna yudya mnt'hu amhitulaga, "Waungilai kudimanya dizina dyangu?" Niyo amvikila.

30 Yakobo niyo agamba, "Himuona Mnungu meso kwa meso, mna nikei mgima." Ivo niyo ahetanga hant'hu aho, Penieli. Zina Panueli kwa kiibulania, nuko kugamba, "Uso wa Mnungu." 31 Zuwa dyandaga ditont'homoka umwo Yakobo andaga akahalawa Penieli, naho Yakobo andaga akajegula kwaviya mapengene yakwe nayatenk'huka. 32 Nivo vikuleka hata dielo, welekwa wa Izilaeli hawakudya nyama ya peng'ene, kwaviya Yakobo atenk'hulwagwa nk'hwali ye dipeng'ene.