1 Akajika aho, Yusufu agambilwagwa kugamba ise andaga akalumwa. Ivo awaguhaga wanawe waidi Manase na Iflaimu, niyo aita nawo kwo kumtemeela ise. 2 Yakobo eze eve kugamba mwanao Yusufu keza, akekakamulaga, niyo akungumala mwo lusazi. 3 Yakobo niyo agamba, "Mnungu ywo udahi anilailaga uko Luzi mwe isi ya Kanani niyo anivikila. 4 Anigambaga, nohongezele cheleko chako no kuwagenyeza mwo uwazilo wako, nohutende fyo dya want'hu, naho neni wenk'he welekwa wako isi ino inde yawe mazuwa yose."

5 "Kwaivo Yusufu, wanao awaidi awa uwelekele Misili umwo nandile hinati kwiza, nawande wangu, Iflaimu na Manase, nawande wangu enga ivo weli Lubeni na Simioni. 6 Mna, wana nouweleke kulongole nawande wako, hawenk'higwe ukipe we isi yangu, mna nawenk'higwe hant'hu aho kwombokela kwa Iflaimu na Manase. 7 Nadamanya ivi kwaajilki ya Nyokwe, umwo nandile hauya kulawa Padani. Yehe Laheli abanikaga mwe isi ya Kanani kikanda hagihi mpaka Efulata. Ivo kwa kinyulu kikulu nammoselaga msanga uko hank'handa ye sila ikwiita Efulata." Mazua aya, Efulata niyo ikwitangwa Betelehemu.

8 Yakobo eze awaone awana wa Yusufu, niyo agamba, "Awa nawo wahi?"

9 Yusufu amhitulaga, "Awa nawo wanangu nink'higwe ni Mnungu aha Misili."

Yakobo niyo agamba, "Hake walete hangu vileke niwavikile." 10 Meso ya Yakobo yandaga hayakuona vedi kwaviya nakadalahala naho nevinda vidala kwakwe kuona. Ivo niyo Yusufu awegala hagihi naye, niyo ise awahokelaga no kuwakumbatila. 11 Yakobo niyo amgamba Yusufu, "Hyakawiile kukuona naho, naho Mnungu kanink'ha kuwaona wanao iviyaiviya." 12 Niho Yusufu awausa wanawe mwa mavindi ya ise, niyo yehe mwenye enama uso wakwe hameso ya ise mwe sanga.

13 Yusufu niyo awaguha wose waidi, Ifulaimu kamwiika kumoso kwa Yakobo niyo Manase amwika kulumwe kwa Yakobo. 14 Mna Yakobo niyo achulula mikono yakwe, niyo ageleka mkono wakwe wa kulume mwo mtwi wa Ifulaimu, hamwenga na kugamba andaga mdodo, mkono wa kumoso nao niyo augeleka mwo mtwi wa Manase, uyo andile ywa nk'hongo ukwelekwa. 15 Yokabo niyo amvikila Yusufu akagamba,

"Mnungu ywa wakale wangu uyo avikagwa ni Ibulahimu na Isaka, avikile wana awa.

Mnungu akudima ugima wangu wose ibuile mwe dizuwa idi avikile wana awa!

16 Mtumigwa yudya ywa kwe mbingu anikombole na maihi yose, awavikile wana awa, zina dyangu hamwenga na mazina ya watate Ibulahimu na Isaka, yagendeele kutambulwa kwombokela wana awa naho wande na wana wengi na cheleko kingi mwe isi!"

17 Yusufu akeivaga vihile umwo ise agelekaga mkono wakwe wo kulume mwo mtwi wa Ifulaimu, niyo awinula mkono wa ise auuse mwo mtwi wa Ifulaimu vileke augeleke mwo mtwi wa Manase. 18 Niyo amgaba ise, "Tate hivoivo. Geleka mkono wako mwo mtwi wa uyu kwaviya niye mkulu."

19 Mna Ise niyo alemela, akamgamba, "Mwanagu hivimanya ivo, wana wa Manase wande kabila kulu dina want'hu wengi. Mna wana wa mvunawe nawande kabila kulu kujink'ha awo."

20 Nakawavikila mwe dizuwa dia akagamba, "Mwa mazina aya Waizilaeli nawalonge uvikilwa. Nawagambe, Mnungu naawatendeni enga Ifulaimu na Manase." Kwaivo Yakobo kamlongoza Ifulaimu, Manase akatimila.

21 Yakobo niyo amgamba Yusufu, "Enga ivo ukuwona, miye nihagihi no kubanika, mna Mnungu naande hamwenga na weye, naho naakuvuze kwe isi ya wakale wenyu. 22 Kudya Shekemu, nakwink'ha weye, isi ina uwolo naho hikuwenk'ha wanduguzo, naiguhaga kulawa kwa Waamoli, kwa kutowana nk'hondo kwa sime yangu na kwa uta wangu."