1 Miaka miidi ize yomboke. Falao alotaga kugamba kakimala hagihi no mto Naili, 2 aho aonaga ng'ombe mfungate zigimbale zikalawa mwo mto no kudya mani mwe ndete. 3 Naho naonaga ng'ombe nt'huhu mfungate zihile naho zinyalise zikalawa mwo mto Naili, niyo zeza kukimala hagihi ne ziya zigimbale hank'handa yo mto, 4 ng'ombe ziya zinyaile zazidyaga ziya zigimbale, aho Falao enukaga mwe zint'hongo. 5 Eze agone naho niyo alota kaidi. Aonaga mafundo makulu yedi mfungate yamemile vedi yandaga yahota mwe sina dimwenga. 6 Naho akajika yalailaga mafundo matuhu mfungate yanyazigwe na mp'heho yakwe nyika naho masisili. 7 Yadya mafundo masisili yanyaile niyo yayamela yadya mafundo yamemile vedi. Falao eze enuke mwe zint'hongo abunk'hulaga kugamba andaga akalota. 8 Kwize kunde mtondo Falao andaga na wogofi vitendese, awetangaga wagangana wose wa Misili, na wadya wata umanyi, niyo awagambila zisozi zakwe, mna hakwandile na yeyose adahile kumtapitila zisozi zakwe.

9 Niho yudya mdamanyi ywe vint'hu vo kunywa, Falao niyo agamba, "Dielo nakumbukila masa yangu. 10 Hadya wakifiilaga maya suwe wandima wako, miye no mwoka mikate mkulu, wakivugailaga mwe divugailo kwe nyumba yo mkulu ywa wamizi. 11 Zuwa dimwenga nekilo chalotaga sozi, kila yumwenga na yakwe. 12 Elo, chandaga naye mwe divugailo mbwanga yumwenga ywa Kiibulania, uyo andaga mtumwa ywa mkulu wa wamizi. Chamgambilaga zisozi zetu niyo akitapitila. 13 Mbuli zilaila viligane na viya alongile, miye kunivuza mwe ndima yangu, yudya mwoka mikate mkulu naye kumnk'hata umtwi na kumtungika mwo mti."

14 Falao atumaga want'hu wamwitange Yusufu niyo wasunguza kumleta kwe divugailo. Yusufu eze ajike kupucha zifili, no kusakanya zisuke zakwe, niyo eza hameso ha Falao. 15 Falao niyo amgamba Yusufu, "Hilota sozi, mna hakuli yeyose adahile kunitapitila. Higambilwa kugamba weye wadaha kunitapitila." 16 Yusufu niyo amhitula Falao, "Miye hikudaha, mna Mnungu naakwink'he utapita udya ukuunga."

17 Falao niyo agamba Yusufu, "Hilota kugamba hikimala hank'handa ho mto Naili, 18 naonaga ng'ombe mfungate zigimbale zikalawa mwo mto niyo zadya mani. 19 Niyo zeza ngombe nt'huhu mfungate zinyaile na kusokela. Hinati kuwona ng'ombe zinyaile naho sisili enga izo mwe isi ino ya Misili. 20 Niyo zia zing'ombe zisisili zazidya ziya mfungate zigimbale. 21 Mna hamwenga na kugamba ziwadya weyawe wadya wagimbale, hakwandile na mnt'hu adahile kumanya kugamba ziwadya weyawe wadya wagimbale, kwaviya zoho nezinda no unyazi uudya wa nk'hongo. Aho niyo nenuka."

22 "Naho niyo nalota kugamba hiona fundo mfungate za mamp'hemba yekale vedi naho yamemile mpuluzi, yakuhota mwe digota dimwenga. 23 Naho niyo zalaila fundo nt'huhu mfungate sisili naho zinyaile ne mp'heho ya kwenyika, 24 ziya fundo mfungate zisisili, niyo zazidya ziya zifundo mfungate izedi. Elo, miye nawagambilaga wagangana zisozi izo mna hakwandile na yeyose adahile kunink'ha utapita wakwe."

25 Yusufu niyo amgamba Falao, "Sozi zako zimbili zina utapita umwenga. Mnungu kakugambila kiya akuunga adamanye. 26 Zing'ombe mfungate zigimbale, ni miaka mfungate. Ne zifundo mfungate izedi, ni miaka mfungate. Utapita we sozi iyo ni umwenga. 27 Ziya zing'ombe mfungate zinyailise, ziya zazitimile ziya zigimbale, na fundo mfungate heziina kint'hu, zinyazigwe ni mp'heho ya kwenyika, idya ni miaka mfungate ya gumbo. 28 Enga ivo hugambile, Mnungu kakulagisa kiya akuunga adamanye. 29 Nokunde na miaka mfungate ya ulozo mwe isi yose ya Misili. 30 Akajika aho, nukunde na miaka mfungate ya gumbo, niyo uwo ulozo houkumbukilwe naho. Digumbo idyo nediibanange isi. 31 Msimo wo ulozo houkumbukilwe naho, kwaviya sala ikwiza neinde iihisa. 32 Sozi yako ivuzagiza nk'hanana mbili naho kwa miliganyizo iligane kulagisa kugamba mbuli ino ilawa kwa Mnungu naho naadamanye mazuwa mageke yakwiza."

33 "Naivoelo, Falao, waungwa kusagula mnt'hu mmanyi, mbala umwink'he ande mnyamp'hala ywe isi yose ya Misili. 34 Naho waungwa usagule wambizi watuhu wengi wa mwe isi wakuunga waduganye hant'hu ha shano yo ulozo wose we miaka iyo mfungate ya ulozo. 35 Waungwa waduganye nk'hande yose mwe mika ino yo ulozo ikwiza no kwiika kindolo hasi ya Falao, kiikwe mwe mizi kwajili ya nk'hande. 36 Nk'hande iyo neinde mp'handa mkole ye isi ize idigwe mwe miaka mfungate ya gumbo ikwiza mwe isi ya Misili vileke want'hu wase kwiza kubanika."

37 Ulangilizi alavile Yusufu nouneka kunda wedi hameso ya Falao na vilongozi weyawe wose. 38 Niyo Falao awagamba vilongozi weyawe, "Hekidahe kupata mnt'hu ywedi enga Yusufu, mnt'hu mta Muye ywa Mnungu mndani mwakwe." 39 Falao niyo amgamba Yusufu, "Mnungu kakulagisa aya yose, hahali mtu mtuhu mbala naho mmanyi enga weye. 40 Ni weye noukimaile isi yangu, naho want'hu wangu nawaunge kwiva yadya ukuunga ulonge. Weye niwe nounde mkulu ywa kaidi kulawa miye. 41 Naho haluse nakusagula kunda mnyamp'hala mwe isi yose ya Misili." 42 Falao niyo ahambula imp'hete yakwe ye kiwalo cho useuta mwa kadole kakwe no kumvala Yusufu mwa kadole kakwe. Amvalaga valo dya kiseuta, no kumvala mkufu wa zahabu mwe singo yakwe. 43 Falao amwink'haga Yusufu digali dyakwe dya kaidi dikuvutwa ni falasi, akwele. Naho wamizi wamlongoelaga Yusufu wakagutiila wakagamba, "Damanyeni sila!" Ivo nivo Yusufu enk'higwe ukulu mkulu mwe isi yose ya Misili. 44 Falao niyo amgamba, "Miye ni Falao, mnt'hu yeyose mwe Misili asekudamanya kint'hu chochose haheina weye kuzumila." 45 Falao amwink'haga Yusufu zina dya Kimisili niye Safenathipanea. Niyo amwink'ha mvele ande mkaziwe mwana Potifela, mlavant'hambiko wo mzi wa Oni. 46 Yusufu andaga na miaka milongo mitatu aho akongaga kunda hameso ya Falao, niyo akonga kuitalamkila isi yose ya Misili. 47 Mwe miaka idya mfungate yo ulozo, isi yalozokaga nk'hande vitendese. 48 Yusufu awatendaga wandima waduganye ink'hande yose mwe miaka iyo mfungate yo ulozo, niyo aiika vindolo mwe mizi ya Misili. Mwe kila mzi aikaga kindolo cha nk'hande kulawa mwe zink'honde zimgihi.

49 Yusufu aikaga kindolo cha nk'hande nyingi vitendese, enga msanga we bahali, niyo adunduga kuuhima.

50 Miaka ye digumbo ikei mpaka, Yusufu apataga wana waidi wa kilume kwa mkaziwe Asenethi. 51 Yusufu niyo agamba, "Mnungu kanitenda nijale makunt'ho yangu yose na wandugu zangu." Ivo niyo amwink'ha zina mwanawe ywa nk'hongo niye Manase. Nuko kugamba, "Mtende ajale." 52 Naho agambaga, "Mnungu kanink'ha mwana mwe isi ya makunt'ho yangu." Ivo niyo amwink'ha zina mwana ywa kaidi niye Efulaimu, Nuko kugamba, "Kwink'higwa wana."

53 Miaka mfungate yo ulozo mwe isi ya Misili yasilaga, 54 niyo yakonga miaka mfungate ye digumbo, enga viya Yusufu alongaga. Kwandaga na gumbo mwe ziisi zint'huhu zose, mna kwandaga na nk'hande mwe isi ya Misili yose. 55 Gumbo dize dikonge mwa want'hu wa Misili, niyo want'hu awo wakonga kumwiila Falao awenk'he nk'hande. Ivo niyo awagamba waite kwa Yusufu, nawo niyo watenda enga ivo awagambile. 56 Gumbo dyandaga diihise no kwenela mwe isi yose, Yusufu niyo akomola vindolo vose, niyo awatagila nk'hande want'hu wa Misili. 57 Want'hu kulawa mwe si nt'huhu wezaga Misili kugula nk'hande kwa Yusufu, kwandilisaga na gumbo kila hant'hu.