1 Zuwa dimwenga, Dina mwana Yakobo na Lea, agendaga kuwatalamkila wavele wa Kikanani wamwenga. 2 Niho Shekemu mwana Hamoli Mhivi mkulu ywe isi idya, amuonaga niyo amgwila na kugona naye heina mwenye kuunga. 3 Naho Shekemu aonaga mwo moyo wakwe kugamba yudya Dina mwana Yakobo kahombweela, ivo niyo amunk'hilwa naye na kumhembeleza. 4 Niyo amgamba Hamoli ise, "Unink'he mndele uyu ande mkazangu."

5 Yakobo abunk'hulaga kugamba Dina mwananwe kageligwa soni, mna kwaviya wanawe we kilume wandaga kwo kudima, hadahile kudamanya dyodyose mpaka aho weze wande wauya. 6 Hamoli, ise dya Shekemu aitaga akasimuile na Yakobo, 7 Naho lupisi uulo wana Yakobo wandile wakauya kulawa kwo kudima. Weze weve ivo waonaga usungu niyo wafa maya kwa kiya awatendele want'hu wa Izilaeli kwa kugona na mwana Yakobo haheina mwenye kuunga kint'hu hekikuungwa kudamanywa. 8 Hamoli niyo amgamba Yakobo, "Mwanangu Shekemu kambwedesa mwanao Dina, elo nalombeza kugamba umzumile amlombe. 9 Neki zumilane kugamba, kunde na kulombelana mwa want'hu wetu na awenyu. 10 Naivo elo no mwikale umu mwe isi yetu hamwenga na suwe. Nomwikale hohose hadya nomsagule, namdamanye uchuuzi kwa ulekelwa, no kukepatila ugoli."

11 Naho Shekemu niyo awagamba walumbuze na ise dya Dina, "Nifiileni mbazi, name neniwenk'heni chochose icho mkuunga. 12 Nigambileni mageleko yadya mkuunga. Naho yongezeni imali vovose ivo mkuunga miye nenilihe, uneva mnazumila nimlombe Dina."

13 Wadya wana kilume wa Yakobo wamhitulaga Shekemu na ise Hamoli, kwa lubezo, kwaviya Shekemu andaga kagona kale na Dina lumbudyawe. 14 Wamgambaga, "Hakikudaha kumleka lumbu dyetu alombigwe ni want'hu hewevinilwe, iyo neinde soni kwetu. 15 Nekizumile du hadya nomnde enga suwe kwa kuwavinila wagosi wose uko kwenyu. 16 Aho niho nekilombelane. Nekikale mwa nyuwe naho kinde want'hu wa hamwenga. 17 Mna hamna zumilane na suwe no kuvinilwa, suwe chamguha lumbu dyetu na kuhalawa."

18 Fanyanyi zawe nezioneka kunda ziwawelela Hamoli na mwanawe Shekemu niyo wazumilana na idyo. 19 Yudya mbwanga andaga mhuwilwa mkulu mwe mp'huga yawe hazile lupisi lutali mwe kudamanya ayo agambilwe, kwaviya Shekemu ambwedesaga mwana Dina mwana Yakobo.

20 Hamoli na Shekemu mwanawe waitaga he nk'hiliyo mzi niyo walonga na want'hu wakagamba, 21 "Want'hu awa ni wambuya zetu, walekeni wekale kwa ulekelwa. Isi ino nk'hulu chenela chose hamwenga na suwe. Suwe kiwalombele woho nawo wakilombele. 22 Mna want'hu awa nawazumile kwikala na kunda na suwe uneva du wagosi wetu wose nawavinilwe enga ivo wavinilwe woho. 23 Togoleni, hamkuona kugamba mifugwa yawe no ugoli wawe, vose hevinde va kwetu? Ivo nekizumileni wekale mwetu." 24 Wekazi wose wo mzi wazumila mwe yadya yalongigwe ni Hamoli na Shekemu, niyo wagosi wose wavinilwa.

25 Yeze yomboke mazuwa matatu, umwo wagosi awo wandaga wakei mwo usungu wo kuvinilwa, wadya wana waidi we kilume wa Yokobo, Simioni na nduguye Lawi walumbuze dya Dina, waguhaga mabamba yawe yakutwa kose kose niyo wengila mwo mzi kipump'ha no kuwakoma wagosi wose. 26 Hamwenga na Hamoli na mwanawe ywe kilume Shekemu. Wamguhaga Dina kulawa mwe nyumba ya Shekemu niyo wahalawa. 27 Ukomi uwo wize womboke, wana kilume watuhu wa Yakobo wagendaga kuutaha umzi kulihiza kugeligwa soni kwa lumbu dyawe. 28 Waguhaga mafyo ya ng'ombe na mp'hunda, na kila kint'hu kimwomzi na mwe zink'honde. 29 Waguhaga kila kint'hu cha ugoli, wawatahaga wavele hamwenga na wana, no kwinula kila kint'hu mwe zinyumba.

30 Yakobo niyo awagamba wanawe, Simioni na Lawi, "Nyuwe mnigaila nk'huswa nk'huswa, kwaviya uneva Wakanani, Wapelizi na want'hu watuhu wowose mwe isi nawaniihiye. Miye hina want'hu wengi uneva nawakelunganye niyo weza kunikup'hukila mp'huga yetu yose neikomwe."

31 Wadya wabwanga waidi niyo wahitula, "Haikudahika lumbudyetu atendelwe enga pamp'he."