1 Ivo mbingu ne si vajikaga hamwenga na vose vimndani mwake. 2 Mwe dizuwa dya mfungate Mnungu ahumulaga kwaviya andaga kabinda zindima zakwe zose. 3 Mnungu niyo adivikila dizuwa dyo mfungate no kuditenda dikukile, kwaviya mwe dizuwa idyo Mnungu ahumulaga aho eze ibinde zindima zakwe zose zo uumbi.

4 Ivo nivo si ne mbingu ziumbigwe.

Aho Zumbe Mnungu aumbaga si ne mbingu, 5 hakwandaga na maziti mwe isi, naho hakwadaga na mbeyu, kwaviya andaga akei kwigala fula, naho hakwandaga na mnt'hu ywa kuilima isanga, 6 mna mazi kulawa hasi yatumbukaga mwe si niyo yomela si yose.

7 Niyo Zumbe Mnungu aguha ulongo we si na kumuumba mnt'hu kwa uwo ulongo no kumvila muye wo ugima kwe zimp'hula zakwe, uyo mnt'hu niyo anda kiumbwa kina ugima.

8 Naho Zumbe Mnungu ahandaga kiunga uko Edeni, uko ulailo wa zuwa, niyo amwiika uyo mnt'hu amdamanyaga. 9 Mnungu ahotezaga maziti yedi ye hengi yakweleka matunda yedi yakudigwa. Hagati he kiunga handaga na ziti dikugela ugima ne diziti dyo umanyi wa ayedi na yaihile.

10 Kwandaga na mto uko Edeni womeelaga kiunga kulawa Edeni uwo mto wakepangaga mwe mito mine. 11 Zina dya mto wa nk'hongo wetangagwa Pishoni, uwo wazunguluka mgati mwe isi yose ya Havila, ukwo kwandaga na zahabu. 12 Zahabu ye isi iyo yandilisaga yedi. Naho kwandaga na mavuta ya mhemp'he yakwitangwa bedola na maiwe ya ugoli yakwitangwa shohamu. 13 Mto wa kaidi wetangwa Gihoni, uwo wazunguluka mwe isi yose ya Kushi. 14 Zina dyo mto wa katatu wetangwa Tigilisi, ukuseela kwo ulailo wa zuwa wa Asilia, naho wa kane wetangwa Euflate.

15 Mnungu amwiikaga uyo mnt'hu mwe Kiunga icho cha Edeni akilime hamwenga na kukikaula vedi. 16 Zumbe Mnungu amgambaga uyo mnt'hu, "Wadaha kudya matunda ya kila ziti mwe kiunga, 17 mna matunda ya mti wo umanyi we yaihile na ayedi usekudya, kwaviya zuwa noudiile matunda yo mti uwo ikindedi noubanike."

18 Niyo Zumbe Mnungu afanyanyaga mwenye kugamba, "Hivo vedi mnt'hu uyu ekale ekedu. Nenimuumbile mwambizi akuunga amwelele." 19 Ivo aguhaga ulongo we si niyo aumba makala yose na madege. Ayegalaga kwa uyo mnt'hu akaule ivo akuunga ayetange, ivo mazina ayenk'haga yanda naayo mazina yawe hata diyelo. 20 Ivo uyo mnt'hu ayenk'haga mazina ayo makala ya kudimwa na makala ya kwe mbago na madege yose ya mwo ulanga, mna hakwandaga na chochose chaonekaga kunda mwambizi amwelelaga uyo mnt'hu.

21 Ivo Zumbe Mnungu amwink'haga uyo mnt'hu nt'hongo zizamise, umwo andaga mwe zint'hongo, alusomolaga lubavu lwakwe lumwenga mwa uyo mnt'hu niyo alugubika ne nyama. 22 Amuumbaga mvele kulawa mwo lubavu niyo amwigaila uyo mnt'hu. 23 Niyo uyo mnt'hu agamba,

"Haluse, uyu vuha kulawa mwa mavuha yangu

naho nyama kulawa mwe nyama yangu,

neetangwe mvele,

kwaviya kalavigwa mwe mgosi."

24 Kwe mbuli iyo mgosi naamwase ise na nine no kutimilana na mkaziwe, naho nawalungane kunda mwili umwenga.

25 Mnt'hu uyu na mkaziwe, wose waidi wandaga kimbwigili, mna hawaonaga soni.