1 Ibulahimu alombaga mvele mtuhu etangagwa Ketula. 2 Ketula amwelekelaga wana, mazina yawe ni Zimlani na Jokishani na Medani na Midiani na Ishibaki na Shua. 3 Jokishani niye aweleke Sheba na Dedani na Waashulu na Waletushi na Waleumi. 4 Mazina ya wana Midiani wandaga ni, Epa na Epeli na Hano na Abida na Elida. Woseni awa nawo welekwa wa Ketula.

5 Ibulahimu niyo amwink'ha Isaka kila kint'hu andaga nacho, 6 mna umwo andaga akei mgima, awenk'haga nt'hunyo wadya wana elekelwe ni wavele wakwe watuhu, niyo awegala kwe isi ya ulailo wa zuwa, hale na kudya eli mwanawe Isaka.

7 Ibulahimu abanikaga akanda ni mdala ywa miaka gana na milongo mfungate na mishano. 8 Ibulahimu akant'haga umuye wakwe akanda kadalahala vedi, magutwi yakwe yandaga magima, niyo akelunga na wakale wakwe wamlogoele. 9 Awanawe, Isaka na Ishumaeli, wammoselaga msanga tatiyawe uko kwe mp'hanga ya Makipela, imwe nk'honde ya Mamle, iyo yandaga ya Epuloni mwana Zohali Mhiti, 10 idya inkonde Ibulahimu agulaga kwa Wahiti. Ibulahimu na mkaziwe wamoselagwa msanga aaho. 11 Ibulahimu eze abanike, Mnungu amvikilaga Isaka mwanawe, uyo andaga akekala hagihi ne Beeli Lahai Loi. Kiibulania nuko kugamba "Disima dya mta ugima Akuliona."

12 Awa nawo welekwa wa Ishumaeli mwana ywa Ibulahimu amweleke kwa Hajili Mmisili, andaga mtumwa ywa Sala. 13 Elekaga wana kilume awa viligane no ludongo ivo welekwe, Nebaioti na Kedali na Adibeeli na Mibisamu, 14 Mishima na Duma na Masa, 15 Hadadi na Tema na Jetuli na Nafishi na Kedama. 16 Awa wandaga wana wa Ishumaeli na aya nayo mazina ya vilongozi we mp'huga mlongo na mbili kutimila na aho nawekala na mazina yawe. 17 Ishumaeli abanikaga akanda na miaka gana na milongo mitatu na mfungate niyo akelunganya na wakale wakwe. 18 Welekwa wa Ishumili wekalaga hagati gati ya isi ya Havila na Asilia, kwe nt'hendelo ya ulailo wa zuwa wa Misili, kuhinga Asilia. Wekalaga hale na welekwa watuhu wa Ibulahimu.

19 Na ivi nivo vyeleko va Isaka mwana ywa Ibulahimu. 20 Isaka eze abule miaka mlongo mine amlombaga Labeka mwana wa Betueli, Mshami ywa Mesopotamia, naho ni lumbudye dya Labani. 21 Labeka andaga mgumba, naivo Isaka amlombezaga Zumbe kwajili ya mkaziwe. Zumbe naye niyo amhitula, Labeka niyo enula ubovu. 22 Ubovu uwo wandaga wa mapasa, mna umwo wandaga wakei kwelekwa, wandaga wakahigana kwe zinda za mami yawe. Labeka niyo agamba, "Ni mbuli ino ikanilaila?" Ivo niyo agenda kumuuza Zumbe.

23 Niyo Zumbe amgamba,

"Si mbili zimndani mwako.

Want'hun waidi kulawa mwe nda yako hawaivane.

Yumwenga naande na ludole kumjink'ha miyawe.

Umkulu naande mtumwa kwo mdodo."

24 Mazuwa yakwe yo kweleka yeze yande hagihi, andaga na mapasa mwe zinda zakwe. 25 Ywa nk'hongo andaga mnk'hundu, naho mwili wakwe wandaga enga suke ya mazoya, niyo wamwimnk'ha zina niye Esau. 26 Lupisi ludodo, nduguye naye niyo elekwa umkono wakwe ukanda umtoza Esau kisinyagilo. Ek'hagwa zina niye Yakobo. Isaka andaga na miaka milongo mtandatu umwo Labeka akaweleka awo mapasa.

27 Wana awo niyo wakula, Esau andaga mkala mkulu, mnt'hu ywa kutanga, mna Yakobo andaga mnt'hu mp'halahole ywa kwikala kwe kaya. 28 Isaka amuunisaga Esau kwaviya naakambweda kudya ukala wa mwanawe, mna Labeka amuungagisaga Yokobo.

29 Zuwa dimwenga Yakobo andaga akambika nk'hunde, Esau ezaga akalawa kwo ukala, andilisaga na sala.

30 Niyo amgamba Yakobo, "Nink'he nk'hade iyo ink'hundu nidye, kwaviya nazehuka!" Nivo vilekile aketangwa Edomu. Kwa kiibulania, Edomu, nuko kugamba "ink'hundu".

31 Yakobo niyo amhitula, "Yanda kunitagila uwagilwa wo welekwa wako wa nk'hongo."

32 Esau niyo agamba, "Nihagihi no kubanika, uwagilwa wo welekwa wangu wa nk'hogo wanambizai?"

33 Yakobo niyo amgamba, "Unde kuniikila kilapi kugamba nounink'he uwagilwa wo welekwa wako wa nk'hongo." Ivo Esau niyo aika kilapi kwa Yakobo akamtagila uwagilwa wakwe wo welekwa wa nk'hongo. 34 Ivo Yakobo amwink'haga Esau mkate ne ditibwa dye zink'hunde. Ivo Esau adyaga na kunywa mazi, niyoahalawaa. Ivo Esau auonaga uwagilwa wo welekwa wakwe wa nk'hongo kugamba hi kint'hu.