1 Zumbe amgambaga Ibulamu, "Halawe mwe isi yako na wanduguzo ne isi ya iso, wiite kwe isi idya huunga hulagise. 2 Nohutende unde na want'hu wengi vitendese. Naho nohuvikile no kuditenda dizina dyako dimanyikise naho weye nounde uvikilwa.

3 Neniwavikile wose wakukuvikila,

Mna neniwaligite wose wakukuligita.

Naho kwa weye neniwavikile want'hu wa si zose."

4 Ivo Ibulamu ahalawaga enga ivo Zumbe amgambilaga, Lutu naye aitaga na Ibulamu. Ibulamu andaga na miaka milongo mfungate na mishano umwo akahalawa kulawa Halani. 5 Ibulamu amguhaga mkaziwe Salai na Lutu mwana nduguye no ugoli wakwe wose na watumwa awaguhaga uko Halani, niyo wakonga kuita kwe isi ya Kanani.

Weze wengile Kanani, 6 Ibulamu ombokelega mgati mwe isi mpaka hant'hu hakukile kwo mti mkulu wa Momle, uko Shekemu. Mwo lupisi ulo Wakanani wandaga mwe isi iyo. 7 Zumbe amlailaga Ibulamu niyo amgamba, "Ino niyo isi neniwenk'he welekwa wako." Niyo Ibulamu amzengela Zumbe uyo amlailaga kilingo cha kutambikila. 8 Akajika asogelaga kuhinga kwe isi ye vigulu ikwo ulailo wa zuwa wo mzi wa Beseli, niyo azenga nk'hambi. Beseli ikanda Usweelo wa zuwa, mzi wa Ai nawo ukanda kwo ulailo wa zuwa. Hadya naho amzengelaga Zumbe kilingo cha kutambikila niyo amvika kwa zina dyakwe. 9 Akajika aho agendeelaga na nt'hambo kuita kwe isi ya Negebu.

10 Mna kwalailaga gumbo kulu uko Kaanani chamtendaga Ibulamu ahingise Kwa mwenye mzi kuita Misili no kwikala uuko kwa lupisi kwaviya gumbo dyandilisaga kulu. 11 Eze ande hagihi kwingila Misili amgambaga mkaziwe Salai, "Himanya kugamba weye umvele uhombweele. 12 Wamilisi wanakuona nawagambe weye ywi umkazangu, naivo nawanikome nokukuleka weye mgima. 13 Ivo wagambile weye ulumbu dyangu, naivo hawanikome naho nawanitendele ayedi kwajili yako." 14 Weze wajink'he umhaka no kwingila Misili, Wamisili waonaga kugamba Salai ni mvele ahomboele. 15 Wandima wa Falao weze wamuone uyo mvele, niyo wagenda kumgambila Falao ivo uyo mvele ahombweele, Salai niyo egalwa kwe kaya kwa Falao. 16 Kwajili yo mvele uyo, Falao amtendelaga uwedi Ibulamu, naho niyo amwink'ha mafyo ya ngoto na mbuzi na ng'ombe na mp'hunda vele na gosi na watumwa wagosi na wavele na ngamia.

17 Mna kwaviya Falao kamguha Salai mkaza Ibulamu, Zumbe amwigailaga maine ya kusumlumiza uyo Falao na want'hu we mwe nyumba yakwe. 18 Falao niyo amwitanga Ibulamu no kumuuza, "Weye kunitenda vivihi? Nii hunigambile kugamba uyu andaga mkazio? 19 Nii ukagamba uyu ni lumbudyo niyo waleka miye namguha kunda mkazangu? Mkaziyo uyo mguhe naho uhalawe!" 20 Niyo Falao awagamba want'hu wakwe, wamlave Ibulamu mwe isi hamwenga na mkaziwe no kila kiya andile nacho.