1 Gumbo dyagendelaga kunda kali mwe isi ya Kanani. 2 Mp'huga ya Yakobo ize ibinde nk'hande yalawaga Misili, tati yawe niyo awagamba, "Uyeni naho Misili mkakiguile nk'hande ludodo."

3 Mna Yuda niyo amgamba tati yawe, "Yudya mnt'hu kakikanya kugamba, kisekuita kwakwe uneva hakinandile naye ndugu ywetu mdodo. 4 Uneva anazumila kiitanye na ndugu ywetu, nekiite kokugula nk'hande. 5 Mna hunazumile, hekiite kwaviya yudya mnt'hu kakigamba asekukiona naho hakina itile naye."

6 Yakobo niyo agamba, "Nii mnigaila makunt'ho aya kwa kumgamba uyo mnt'hu mna ndugu ywenyu mtuhu?"

7 Niyo wahitula, "Yudya mnt'hu naakakiuzisa zimbuli ze mp'huga yetu, akagamba, tati yenyu akei mgima? Mna ndugu ywenyu mtuhu? Naswe nekimhitula viligane ne miuzile yakwe. Nekikamanya vivihi kugamba naakigambe kiite na ndugu ywetu uko?"

8 Yuda niyo amgamba ise, "Nnekele niite no mvuna ywetu, kiite kisunguze kikagule nk'hande, kinase kuzehuka. 9 Naande mwo ukaulizi wangu mwenye. Nouniuze miye uneva hina mvuzile kwako, k'halalizi neinde mwangu mwo ugima wose. 10 Wandile hachekalise hegu nekiita na kuuya nk'hanana mbili."

11 Niyo Izilaeli tati yawe awagamba, uneva niivo tendeni ivi, geleni vint'hu vedi va mwe isi mwa magunia yenyu, mmwigaile geleko uyo mkulu. Mwigaileni mavuta ya nk'wazu ludodo na viuki na ubani na mavuta ya mhemp'he na nk'hungu na lozi. 12 Guheni matundu yakuguwila nk'hande, naho msekujala kuvuza amatundu yaikigwe mwe mifuko yenyu. Vadahika yagelagwa hivo. 13 Mguheni ndugu ywenyu msunguze kuuya kwa uyo mnt'hu. 14 Mnungu ywo udahi naawenk'heni kuonelwa mbazi hameso ya uyo mnt'hu vileke awak'heni Benjamini hamwenga na uyu ndugu yenyu mtuhu. Mna uneva wanagu neniwaze enga ivo, goja wage.

15 Ivo wadya want'hu niyo waguha digeleko diya, hamwenga na kongezela nk'hanana mbili ya matundu yekuguila ink'hande, hamwenga na Benjamini. Ivo niyo waita mpaka Misili, niyo wakimala hameso ya Yusufu. 16 Yusufu eze amuone Benjamini hamwenga na woho, niyo amgamba mnyamp'hala we nyumba yakwe, "Wegale want'hu awa kwe nyumba yangu, kachinje nyama yambikwe vedi, kwaviya want'hu awo neninde nawo ho ludyo lwa nomsi." 17 Yudya mtumwa niyo adamanya enga viya Yusufu alongile, niyo awaguha wadya want'hu, no kuwegala kwe nyumba ya Yusufu.

18 Umwo wandile wakegalwa kwe nyumba ya Yusufu wogohaga wakagamba, "Kigalwa uku kwaviya matundu yadya yavuzagwa mwa magunia yetu viya nk'hongo. Hauluse aunga akitoe naho akitahe kinde watumwa wakwe, niyo aguha zimp'hunda zetu." 19 Naivo niyo waita henk'hili ye nyumba ya Yusufu niyo walonga na yudya mtumwa mnyamp'hala, 20 Wakamgamba, "Kaula mkulu, suwe chezaga bosi kikeza kugula nk'hande. 21 Kize kibule hant'hu chaikile nt'hulwe vileke kigone, chaloholaga magunia yetu, kikaule! Matundu ya kila mnt'hu nayanda mwe kila gunia dya kila mnt'hu haheina kuhunguka. Naswe kiyavuza matundu ayo kwako. 22 Hamwenga na ayo kigala matundu matuhu yo kuguila nk'hande. Mna hakikummanya uyo akivuzile matundu yetu mwa magunia yetu."

23 Yudya mtumwa mnyamp'hala niyo ahitula, "Mse kogoha. Mnungu ywenyu, Mnungu ywa tati yenyu, niye ageile matundu ayo mwe magunia yenyu. Maliho yenyu nayahokelaga." Niyo amwink'hiza Simioni, kwawe.

24 Yudya mtumwa mnyamp'hala niyo awengiza wadya want'hu kwe nyumba ya Yusufu, niyo awenk'ha mazi ya kuhaka iviga vawe, niyo azink'ha nk'hande zimpunda zawe. 25 Nawaikila lumwe mageleko yawe wamwink'he Yusufu aho neezile nomsi, kwaviya naweva kugamba nawadye hamwenga na yehe. 26 Yusufu ezeeze hakaya, niyo waguha mageleko yawe, wamwink'haga mageleko yawe ayo wamwigailaga kwe nyumba yakwe, niyo wamfunamila. 27 Awauzaga ugima wawe, niyo agamba, "Tati yenyu mgima, yudya mdala mwanigambilaga? Akei mgima naho ni ywedi?"

28 Niyo wahitula wakagamba, "Mtumwa ywako tati yetu, akei mgima." Niyo wafika madi no kufunamiza mitwi yawe hasi hameso hakwe.

29 Yusufu aze kaule, niyo amuona nduguye Benjamini mwana nine, niyo agamba, "Uyu nuyo mndugu ywenyu umdodo yudya mwanigambile? Niyo amgamba, uvikilwe ni Mnungu mwanangu." 30 Ahoo Yusufu asunguzaga kuhalawa, kwaviya moyo wakwe wamemaga nkwina mwa nduguye, andaga hagihi na kuila. Engilaga kwe chumba chakwe niyo aiila uuko. 31 Eze ibinde kuila no kuuhaka kihanga chakwe mazi, afosaga kuse akaketogeza moyo, niyo asigiila nk'hande iletigwe. 32 Niyo wampasila Yusufu hakwehakwe, wanduguze nawo hawehawe, wadya Wamisili wandile wakadya naye, nawo wapasilwagwa hawehawe, kwaviya yandaga ni mwiko kwa Wamisili kudya hamwenga na Waibulania. 33 Wanduguze Yusufu nawekala hameso hakwe viligane na malika yawe, kukongela umkulu mpaka umdodo. Nawo wehelagwa weze waone ivo wekale. 34 Nk'hande neikapasigwa kulawa he meza ya Yusufu, mna Benjamini apasilagwa nk'hanana shano ya idya ya wanduguze. Ivo wadyaga no kunywa kwa kinyemi hamwenga na yehe Yusufu.