1 Nyoka andaga mpapala mwa makala yose aumbaga Zumbe Mnungu. Nyoka niyo amuuza yudya mvele, "Nikindedi Mnungu kawagambani msekudya matunda ya mti wowose mwe kiunga?"

2 Yudya mvele niyo ahitula, "Matunda ya mti wowose mwe kiunga chadaha kudya, 3 mna umti uwo wihagati mwe kiunga bule, Mnungu kakilemeza kisekudya matunda yakwe, naho kaigamba kisekuukwafa, kwaviya ikindedi nekinabanike."

4 Nyoka niyo amgamba mvele, "Bule,ikindedi hombanike. 5 Mnungu kalonga ivo, kwaviya kamanya kugamba mnadya matunda yo mti uwo nomfumbulwe meso yenyu nomnde enga Mnungu, mkamanya ayedi na yaihile."

6 Yudya mvele eze aone udya mti ni wedi kwa nkh'ande naho wagela kumunk'hwamunk'hwa, naho ni wedi kwa kupata umanyi. Ivo niyo aguha matunda yo mti uwo niyo adya. Niyo amwink'ha mgosiwe naye niyo adya. 7 Weze wadye amatunda ayo, niyo wenk'higwa umanyi no kubunk'hula kugamba nawanda kimbwigili, ivo wakesumilaga wenye mani yo mtini niyo wakevala.

8 Kisingi kiya Adam na mkaziwe weze weve Zumbe Mnungu akagenda mwe kiunga, wakefisaga mgati mwa maziti ye kiunga. 9 Mna Mnungu niyo amwitanga uyo mnt'hu, "We mnt'hu wikuhi?"

10 Uyo mnt'hu niyo amhitula, "Nehyogoha nize nikwive umwo mwe kiunga, hikefisa kwaviya nikimbwigili."

11 Mnungu niyo amuuza. "Uyo akugambile kugamba ukimbwigili niani? Weye kudya matunda yadya nakugambile usekudya?"

12 Yudya mnt'hu niyo ahitula, "Yudya mvele unink'hile kindanye niye anink'hile matunda, niyo nadya."

13 Zumbe Mnungu niyo amuuza yudya mvele, "Nii ukatenda ivi?"

Yudya mvele niyo ahitula, "Nyoka niye anidant'hilize niyo nadya."

14 Niyo Zumbe Mnungu amgamba nyoka, "Nohusulumize kwaayo udamanye, nakuligita weye wi kedu mwa makala yose. Kukongela ivi haluse no kugendeela nougende kwa kubulumka ne zinda, naho noudye luvumbi mwo wikazi wako wose. 15 Name neni watendeni mnde wank'hondo weye na uyo mvele, cheleko cha uyo mvele nekikuhonde umtwi, cheleko chako weye nekikihonde kisinyagilo che cheleko chakwe uyo mvele."

16 Niyo amgamba yudya mvele, "Nehwongezelese usungu mwo kweleka kwako. Noweleke wana kwa usungu. Hata ivo nouunge kugendeela kwikala na mgosiyo naho naakwikaile."

17 Naho niyo amgamba Adamu, "Kwaviya weye kumtegeleza mkaziyo niyo wadya matunda yo mti udya nakugambile usekudya. Kwaayo udamanye, isanga iligitwa. Ukombekese mwe zindima zako mwo ugima wako wose vileke ikwink'he nk'hande ya kukukint'ha. 18 Sanga neikwelekele mbigili na miwa, naho noudye matunda na mani ya kwembago. 19 Nouungwe udamanyise ndima no kulawa kiluke uitende isanga ikwelekele kint'hu, mpaka mwe dizuwa nouuyiye mwe sanga umwo walawaga. Weye ywi sanga, naho mwe sanga nouuye."

20 Adamu amwink'haga mkaziwe zina niye Hawa, kwaviya niye mamiyawe dya want'hu wose welekwe. 21 Zumbe Mnungu awadamanyilaga suke za nk'hingo Adamu na mkaziwe.

22 Niyo Zumbe Mnungu agamba, "Haluse mnt'hu kanda enga miyetu naho ana umanyi wo kumanya ayedi na yaihile. Na ivi hakuungwa kuguha matunda yo mti wo ugima no kuyadya, niyo ekala mazuwa yose." 23 Ivo Zumbe Mnungu awagulusaga kulawa mwe kiunga cha Edeni no kumtenda ailime isanga umwo walawaga. 24 Zumbe Mnungu eze awakulumbuze, aikaga makelubi kwe nt'hendelo yo ulailo wa zuwa we kiunga, na gola dya moto dikuhituka hituka nt'hendelo zose kwamila isila ikuita kwe diziti dyo ugima.