1 Ize yajike aho wandima waidi wa Falao, uyo akudamanya vint'hu vo kunywa vya seuta na uyo akudamanya vint'hu vo koka wanaicho wabanangaga kwa seuta ywawe. 2 Falao awafiilaga maya wandima awo waidi, 3 niyo awavugaila mwe divugailo kwe nyumba yo mkulu ywa wamizi, aho aikagwa Yusufu. 4 Wekalisaga mwe divugailo, niyo mkulu ywa wamizi amwika Yusufu kunda mtumwa ywawe naho wandaga mwe divugailo kwa lupisi.

5 Kilo kimwenga yudya mwamizi we vint'hu vo kunywa, na akudamanya vint'hu vo koka walotaga sozi heziligane. 6 Aho mtondo Yusufu eze aweziile, aonaga wana wogofi. 7 Niyo awauza, "Nii dielo mwaoneka kunda na wogofi?"

8 Niyo wahitula, "Kilota sozi, mna kila yumwenga kalota sozi yakwe heviikudahika kuzitambalisa ulosi wakwe."

Yusufu niyo agamba, "Nigambileni zisozi zenyu. Ni Mnungu du akuwenk'ha want'hu udahi wa kufyambula sozi."

9 Yudya mdamanyi we vint'hu vo kunywa amgambilaga Yusufu, "Mwe sozi yangu hiona mzabibu kulongole kwangu, 10 una matambi matatu. Wize ukonge kutuguta niyo mabwali yalaila niyo kwalaila zabibu ziivile. 11 Nenulaga kikombe cha Falao no kuzikamila zizabibu izo mwe kikombe niyo namwink'ha Falao."

12 Yusufu niyo agamba, "Uno nuwo ulosi we sozi yako, matambi matatu uyaone ayo ni mazuwa matatu. 13 Mwa mazuwa ayo matatu, zumbe naakulave mwe divugailo niyo akuvuza mwe ndima yako. No umwink'he naho ikikombe chakwe enga viya noukatenda umwo wandile ukadamanya vint'hu vo kunywa. 14 Mna unikumbukile umwo mbuli zako zikanda zedi kwako. Ukande ywedi kwangu kwa kunitambula hameso ha Falao, nidahe kufosa mwe divugailo idi. 15 Kwaviya miye hitahigwa kulawa kwe isi ya Waibulania, naho aha Misili hibanange kint'hu kikuleka nigeligwe mwe divugailo."

16 Yudya mwoka mikate eze aone kugamba utapita we sozi ya mdamanyi wa vint'hu vo kunywa ni wedi, amgambaga Yusufu, "Name hilota sozi! Mwe sozi yangu miye nehinula nt'hangulu nt'hatu za mikate mwo mtwi wangu. 17 Mwe nt'hangulu ya kulanga nomnda na vint'hu vi hengi vo kokwa kwaajili ya Falao. Mna madege yandaga yakadya mwe nt'hangulu iyo imwo mtwi wangu."

18 Yusufu niyo ahitula, "Utapita we sozi yako nu uno, nt'hangulu nt'hatu, ni mazuwa matatu. 19 Mazuwa matatu kulongole zumbe naakulave kwe divugailo niyo akukant'ha mtwi wako no kutungika mwo mti, madege nayadye ikimba chako."

20 Dize dibule zuwa dya katatu, dyandaga zuwa dya kukumbukila kwelekwa kwakwe Falao, awadamanyilaga fugo wakulu wa wandima wakwe wose, Awalavaga, mwoka mikate mkulu na yudya mwamizi ywakwe mkulu we kudamanya vint'hu vo kunywa, niyo awegala hameso ha wandima wakwe. 21 Niyo amvuza yudya mdamanyi we vint'hu vo kunywa mwe ndima yakwe, 22 mna niyo amnk'hata mtwi na kutungikwa mwo mti yudya mwoka mikate mkulu enga ivo Yusufu awenk'haga utapita we zisozi zawe. 23 Mna yudya mdamanyi we vint'hu vo kunywa hamkumbukile Yusufu, nakamjala.