1 Kwalailaga gumbo kulu mwe isi, kujink'ha diya dyalailaga mwo ugima wa Ibulahimu. Isaka niyo aita kwa Abimaleki seuta ywa Wafilisiti uko Gelali. 2 Zumbe Mnungu amlailaga Isaka niyo amgamba, "Use kuita Misili, wikale mwe isi idya huunga hulagise. 3 Ikala aaha, miye neninde na weye, naho nohuvikile, naho neniwenk'heni weye ne vyeleko vako isi ino yose. Naho neni kint'hize kiya namlaganaga iso Ibulahimu. 4 Neniwatende welekwa wako kunda wengi enga nt'hondo za kwe mbingu, neniwenk'he welekwa wako isi ino yose, naho kombokela kwa welekwa wako want'hu wose mwe si nawavikilwe. 5 Nohuvikile kwaviya Ibulahimu nakanizumila, niyo adamanya zisigilizi zangu, na malagizo yangu na miko yangu"

6 Naivo Isaka ekalaga uuko Gelali. 7 Umwo want'hu weze wamuuze mwe mbuli ya mkaziwe, yehe awagambaga, andaga lumbudye. Ogohaga kugamba andaga mkaziwe kwaviya want'hu nawakadaha kumkoma vileke wamguhe Labeka uyo mkaziwe ahombweele. 8 Isaka eze ekale uko kwa mazuwa mengi seuta Abimaleki asungiilaga mwe dilanga niyo aona Isaka akamkumbatila mkaziwe. 9 Abimaleki amwitangaga Isaka niyo amgamba, "Kindedi uyu mkazio! Nii nokunigamba uyo lumbudyo?"

Yehe ahitulaga, "Kwaviya nehogoha kukomwa kwajili yakwe."

10 Abimaleki niyo agamba, "Kukitenda vivihi?" "Yumwenga mwa want'hu awa naakadaha kugona na mkazio haheina kufanyanya hegu nokukigela mwa masa." 11 Abimaleki niyo awakanya want'hu akagamba, "Yeyose akumtendela vihile mnt'hu uyu hegu mkaziwe naakomwe."

12 Isaka ahandaga mbeyu mwe isi idya niyo avuna kwa magana gana, kwaviya avikilagwa ni Mnungu. 13 Isaka andaga mgoli niyo anda mgoli vitendese. 14 Wafilisiti wamuonelaga finju kwo ugoli andaga nawo. Andaga na mafyo mengi ya mbuzi na ng'ombe na wandima wengi. 15 Yadya masima yasimbagwa ni wandima wa Ibulahim Ise dya Isaka umwo andaga mgima, wayasilizaga niyo wayamemeza sanga.

16 Abimaleki amgambaga Isaka, "Halawe mwe isi yetu kwaviya kunda na ludole kukijink'ha suwe." 17 Ivo niyo isaka ahalawa mwe isi idya niyo akuzenga kwe dikolongo dya Gelali niyo ekala uko. 18 Asimbaga naho masima yasimbagwa umwo Ibulahimu ise andaga mgima. Wafilisiti wayasilizaga aho ise eze abanike. Isaka niyo ahenk'ha zina ayadya Ibulahimu ise ayetangaga masima ayo.

19 Wandima wa Isaka wasimbaga sima mwe dikolongo niyo wabwiila mazi yakubwiluka. 20 Mna wadimi wa Gelali wagombaga na wadimi wa Isaka wakagamba, "Mazi aya yetu." Ivo niyo Isaka aditanga disima diya, "Mgombelwa."

21 Wandima wa Isaka wasimbaga sima tuhu niyo kwalaila nk'humbizi ya kudigombela idyo nadyo, niyo aditanga disima idyo, "Sitina". Kwa Kiibulania, Nuko kugamba, "Gaina." 22 Ahasogelaga hant'hu aho niyo akusimba sima tuhu kutuhu. Hakwandaga na nk'humbizi elo uko niyo adik'ha zina, "Rehoboth." Akagamba, "Haluse Zumbe kakink'ha luneka kwikala mwe isi ino naswe nekigendeele."

23 Isaka ahalawaga uko niyo aita Belisheba. 24 Ikilo ikia Zumbe amlailaga niyo amgamba, "Ni miye Mnungu ywa Ibulahimu. Usekwogoha miye ni hamwenga na weye. Nohuvikile na kukwink'ha welekwa wengi enga ivo nalaganaga na mndima ywangu Ibulahimu." 25 Isaka adamanyaga kilingo cha kutambikila niyo amvika Mnungu. Naho azengaga nk'hambi ukwo niyo wandima wakwe wafuka sima tuhu.

26 Zuwa dimwenga Abimaleki ezaga kulawa Gelali akanda hamwenga na Azati mlangilizi nywakwe na Fikoni mkulu ywa watowani wakwe. 27 Isaka niyo awauza, "Mni basai nanywe aho nk'hongo nomniihiya niyo mwaleka nasama mwe isi yenyu?"

28 Niyo wamhitula, "Haluse kimanya kugamba Zumbe ehamwenga na weye, naivo kiona kugamba kinde na kilapi cha mwivano weye na suwe chaunga wiike Ndagano, 29 kugamba houkitendele vihile naswe hekikutendela vihile. Nekinda wedi kwako nawe uhalawe kwa utondowazi. Naho imanyika kugamba Zumbe kakuvikila." 30 Niyo Isaka awadamanyila fugo niyo wadya no kunywa. 31 Mtondo utimile kila mnt'hu aikaga Ndagano kwa kilapi. Isaka awalagaga niyo wapangana enga wambuya.

32 Dizuwa idia wandima wa Isaka wezaga niyo wamgambila mbuli ze disima wasimbile. Wagambaga, "Kiona mazi." 33 Niyo disima idyo aditanga, "Kilapi." Kwaivo zina dyo mzi uwo wetangwa Beelisheba hata ivi dielo. Zina idyo kwa Kiibulania nuko kugamba "Sima dya Kilapi."

34 Esau eze abuze miaka milongo mine, alombaga wavele waidi, Yudisi mwana Beeli na Basemasi mwana Eloni. 35 Wavele awo watendaga imioyo ya Isaka na Labeka kunda na masulumizo.