1 Umwo want'hu weze wagenyele mwe isi na wanakike weze welekwe mwe isi, 2 wana Mnungu wamwenga waonaga kugamba awo wanakike wa awant'hu wandaga wahombweela, ivo niyo wawaguha wadya wawaungile vileke wande wavele ywawe. 3 Niyo Zumbe agamba, "Muye wangu howikale mndani mwo mnt'hu mazuwa yose, woho ni wa kubanika du. Kukongela ivi haluse no kugendeela hawekale kujink'ha miaka gana milongo miidi." 4 Mwa mazuwa ayo no kugendeela, kwandaga na mazint'hu mwe isi yandaga ni cheleko cha wavele na wana wa Mnungu. Want'hu awo wandaga ni wadahi naho aho kale watogoleswawa.

5 Mnungu eze aone kila mnt'hu adamanya wavu mwe isi na kufanyanya wiihi kwa lupisi lwose, 6 Zumbe Mnungu akanaga mwo moyo wakwe kugamba amuumbaga mnt'hu no kumwiika mwe isi. Zumbe Mnungu engilwgwa ni kinyulu mwo moyo wakwe, 7 niyo agamba, "Neniwabanage pele want'hu niwaumbile mwe isi, naho nenibanange makala na madege na viumbwa vikutambala. Kwaviya nna kinyulu kugamba nehiwaumba mwe isi." 8 Mna Mnungu elelwagwa ni Nuhu.

9 Ino niyo simulizi ya Nuhu. Nuhu andaga ni ywedi hameso ha Mnungu, andaga hakukalalizwa ni want'hu wekalaga nae mwo lupisi lwakwe naho andaga mbwiyaye dya Mnungu. 10 Nuhu andaga na wana watatu wa kilume, Shemu na Hamu na Jafeti. 11 Mnungu aonaga isi ibanika naho imema nt'hulumunndu kila hant'hu mwe isi.

12 Mnungu aikaulaga isi niyo aona kugamba yandaga ibanika, kwaviya want'hu wose watimila sila zawe ziihile.

13 Mnungu niyo amgamba Nuhu, "Hipata ulamuzi kuwabanaga wose we mwe isi. Ikindedi neniwabanange pele hamwenga ne isi, kwaviya waimemeza isi kwa wiihi na kuhujila. 14 Kwaivo kezengele safina yako kwa mahant'hi ya ziti ditogese, ikant'he vyumba naho ikizige lami kundani na kuse. 15 Izenge kwa utali wa mita gana dimwenga milongo na mitatu na kenda na uzangalamu wakwe mp'hima milongo mitatu, utali wakwe kuita kulanga nawo mp'hima milongo mitatu. 16 Udamanye mzeze mwe safina, naho wase mwazi nyanda mlongo na mnane kulawa mwo mzeze mwe zimbavu zakwe. Izengele magulu matatu naho ugele lwivi mwo lubavu lwakwe. 17 Nenigale ugubiko wa mazi mengi mwe isi nikome kila kiya kina ugima. Kila kint'hu mwe isi nekibanike, 18 mna neniike Ndagano na weye. Nowingile mwe safina weye na wanao na wavele ywawe. 19 Gela makala maidi idi mwe safina viumbwa viidi idi gosi na vele, vileke visekubanika enga ivo nevinde kwako. 20 Maidi idi mwe kila madege na kila makala ye hengi na kila kiumbwa kikutambala vikanda viidi idi vileke visekubanika. 21 Uguhe kila nk'hande ikudigwa, kwaajili yenyu na kwaajili ya viumbwa ivo." 22 Nuhu adamanyaga yose yadya asigiilwe ni Mnungu.