1 Zumbe amlailaga Ibulahimu he miti mikulu ya Mamle. Ibulahimu andaga ekale henk'hili ye nk'hambi yakwe umwo kwandile msi ubwikane. 2 Ibulahimu enulaga meso niyo aona want'hu watatu wakimale. Aaho eze awaone awagulukilaga kugenda kuwa singila. Afunamilaga hasi ne kihanga chakwe kikakima hasi, 3 akagamba, "Wamkulu mnaona ni vedi, msekunomboka, miye mtumwa ywenyu. 4 Gojeni niwenk'heni mazi mhake iviga venyu, mwadaha kuhumula hasi yo mti uno. 5 Neniwenk'heni nk'hande ludodo, neiwenk'heni ludole mdahe kugendeela ne nt'hambo yenyu. Mnitunya kwa kwiza mwe kaya yangu, elo lekeni niwasank'hanileni."

Niyo wahitula, "Nivedi, kizumila."

6 Ibulahimu asunguzaga kwingila kwe nk'hambi yakwe no kumgamba Sala, "Sunguza kuguha vihimo vitatu va unga wedi udamanye nk'hande." 7 Akajika asunguzaga kwiita kwe difyo dye zing'ombe zakwe niyo asagula ndama yedi igimbale, no kumwink'ha mndima asunguze kuichinja na kuyambika. 8 Ibulahimu niyo aguha mabongo na mele na nyama niyo awenk'ha awo want'hu wadye. Umwo wandile wakadya, yehe nakakimala hagihi nao hasi ho mti.

9 Wadya watakwiza niyo wamuuza Ibulahimu, "Mkaziyo sala ekuhi?"

Niyo ahitula, "Ekwe nk'hambi kundani."

10 Yumwenga ywawe andile kilongozi niyo agamba, "Miezi mnane kukongela ivi haluse, Neni uye kwako, naho mkazio Sala naande na mwana kilume"

Sala andaga hanyuma yo ulwivi lwe nk'hambi akategeleza. 11 Ibulahimu na mkaziwe wandaga wadalahalise, naivo Sala andaga hakuona mazuwa yakwe ye miezi. 12 Sala niyo aseka akagamba, "Miye hidalahala, mnumangu naye kadalahala, nenidahe kunda na kinyemi na kupata wana?"

13 Zumbe niyo amuuza Ibulahimu, "Nii Sala kaseka niyo agamba, ‘Ivi ni kindedi nadaha kupata mwana no kudalahala kwangu uku?’ 14 Ivo kiyuko kint'hu chochose kidala kiku mhuma Mnungu? Ivo nilongile niivo, miezi mnane kukongela ivi haluse neni uye, naho Sala naande na mwana kilume."

15 Mna Sala kwa kogoha akakanaga kugamba "Hisekile"

Mna Zumbe amgambaga, "Heiye kuseka."

16 Wadya want'hu watatu wahalawaga niyo wabula hant'hu wakudaha kuuona mzi wa Sodoma, Ibulahimu naye aitaga nao akawasindikiza. 17 Zumbe niyo akelongela mwenye kugamba, "Henimfise Ibulahimu kiya hugenda kudamanya. 18 Yehe naande Tate ywa want'hu wa isi nk'hulu ina udahi, naho kwa yehe want'hu wa si zose nawavikilwe. 19 Himsagula vileke awahinize wanawe nawelekwa wakwe, yehe nawahinize kutoza sila zangu wande wedi na kudamanya yakunelela, miye name nidahe kuwakint'hizila kiya nilagane nawo."

20 Niyo Zumbe amgamba Ibulahimu, "Yeyuko malongelezo yaihile kwa Sodoma na Gomola, naho wiyuko wavu utendese uko. 21 Ivo neniseele uuko hakaule miye mwenye, uneva malongelezo ayo nivile ni kindedi hegu vihi."

22 Wadya watakwiza waidi wahalawaga no kugendeela kuhinga Sodoma, mna Zumbe asigalaga kakimala na Ibulahimu. 23 Ibulahimu niyo ambasa Zumbe no kumuuza, "Ni kindedi nouwakome want'hu heweina wiihi hamwenga na waihi? 24 Uneva unanda na want'hu milongo mishano mwo mzi uwo heweina wavu. Noubanange umzi uwo wose? Houwalekele awo want'hu kwajili ya awo milongo mishano? 25 Hangi uneva noutende ivo kuwakoma want'hu awedi hamwenga na waiihile. Want'hu wedi kudamanyilwa enga want'hu waihile. Haikudahika! Msengela mbuli we isi yose haeleke kudamanya ayadei."

26 Zumbe niyo ahitula, "Uneva nna wabwiila want'hu milongo mishano uko Sodoma, heni ubanange umzi uwo kwajili ya awo."

27 Niyo naho Ibulahimu agamba, "Zumbe nionele mbazi kwa kugendeela kulonga na weye, miye ni mnt'hu du, naho hina wedi wa kulonga chochose. 28 Mna yadahika wakanda uuko want'hu milongo mine na washano kuleka wadya milongo mishano. No uubanange umzi wose kwaviya wahunguka awo washano?"

Zumbe amhitulaga, "Heniubanange mzi wanada uukwo want'hu milongo mine na shano heweena masa." 29 Ibulahimu niyo amuuza naho, "Mafani kwadaha kunda na want'hu milongo mine du."

Zumbe niyo ahitula, "Heni ubanange uneva wanada uuko want'hu milongo mine."

30 Ibulahimu niyo agamba, "Nakulombeza Zumbe, usekuniihiya, naunga nilonge kaidi. Nevinde vivihi uneva wananda uuko want'hu milongo mitatu?"

Zumbe niyo agamba, "Heni ubanange uneva wananda uuko want'hu heweina wavu milongo mitatu."

31 Ibulahimu niyo agamba, "Zumbe unifile mbazi kwaviya higendeela kulonga na weye. Togola wananda uuko milongo miidi du?"

Zumbe niyo ahitula, "Nnawaona heweina wavu milongo miidi mwo mzi uwo, heniubanange."

32 Ibulahimu niyo agamba, "Usekunda na maya Zumbe, nenilonge, uulu du. Togola wananda uuko want'hu mlongo du heweina wavu?"

Niyo Zumbe agamba, "Heniubanange umzi uneva wananda uuko want'hu mlongo heweina wavu." 33 Zumbe eze ibinde kulonga na Ibulahimu niyo akeitila, Ibulahimu naye auyaga kaya.