1 Yusufu aitaga niyo amgamba Falao, "Tate na wandugu zangu hamwenga na mafyo, ne mifugwa yawe, na kila kint'hu chawe, weza kulawa mwe isi ya Kanani, naivi we aha mwo mkoa wa Gosheni." 2 Naho nakaguha wanduguze washano niyo awegala hameso ya Falao.

3 Falao niyo awauza, "Ndima yenyu nyuwe ni ihi?" Niyo wamhitula Falao, "Mkulu, suwe watumwa wako kiwadimi wa ngoto, enga ivo wandaga wakale wetu." 4 Wamgambaga Falao, "Kiza kwikala watakwiza mwe isi ino, kwaviya, madimo ya watumwa wako hayana ludyo, kwaviya gumbo ditendesa uko Kanani. Elo chakulombeza watumwa wako ukink'he isi ya Gosheni kikale."

5 Falao niyo amgamba Yusufu, "Iso na wanduguzo weza kwako, 6 naho isi ya Misili imwe mikono yako. Wekaze iso na wanduguzo hant'hu hedi mwe isi, waleke wekale mwo mkowa wa Gosheni. Naho uneva weyuko mwa woho want'hu wamanyi mwa madimo, waike wande wakimalizi wa madimo yangu."

7 Yakobo niyo amguha ise no kumwika hameso ha Falao. Niyo Yakobo amvikila Falao. 8 Falao niyo amuuza Yakobo, "Una miaka mingahi?"

9 Yakobo niyo ahitula, "Miaka nink'higwe kwikala enga mtafi, ni miaka gana na milongo mitatu. Miaka inda migeke naho yakwangadika, naho haibuile kwe idya wekalaga wakale wangu enga watafi." 10 Niyo naho Yakobo amvikila Falao, niyo ahalawa. 11 Niyo Yusufu awekaza, ise, na wanduguze, hant'hu hatendese wedi mwe isi ya Misili, hande hawe enga ivo Falao alagize. Hant'hu aho handaga hagihi na mzi wa Lamasesi. 12 Yusufu niyo awenk'ha nk'hande ise na wanduguze, na want'hu watuhu wose we mp'huga ya ise, viligane no uwazilo wa wana wawe.

13 Gumbo dyagendeelesaga naho niyo kwanda hekwiina nk'hande mwe isi yose, niyo want'hu mwe isi za Kanani na Misili wazehuka kwa sala. 14 Yusufu niyo akisanya matundu yose mwe Misili, na Kanani, yailaile mwo kutaga nk'hande no kuyegala matundu ayo kwe kaya ya Falao. 15 Matundu yose yeze yasile mwe isi ya Misili na Kanani kwa kuguila nk'hande, Wamisili naweza kwa Yusufu niyo wamgamba, "Kink'he nk'hande, kinase kuzehuka hameso hako kwaviya matundu yetu yasila."

16 Niyo Yusufu awahitula, "Nink'heni mifugwa yenyu yose name neniwasakanyileni na nk'hande, uneva matundu yenyu yasila." 17 Ivo niyo wegala mifugwa yawe kwa Yusufu, niyo awenk'ha nk'hande kwa kusakanya ne zimpunda zawe ne zingoto zawe ne zing'ombe zawe ne zimpunda zawe. Mwo mwaka udya, nakawenk'ha nk'hande kwa kusakanya ne mifugwa yawe yose.

18 Mwaka utimile niyo wamwizila no kumgamba, "Hakikudaha kufisa ikindedi hameso yako weye mkulu kugamba matundu yetu yasila, naho haluse mifugwa yetu ikwako. Hakihali kisigale cho kukwink'ha weye mafani, imili yetu ne isi yetu. 19 Usekukileka kibanike chambize, ukigule suwe ne sanga yetu, kwa kwasakanya ne nk'hande. Suwe hamwenga ne zink'honde zetu nekinde watumwa wa Falao, naho sanga yetu ndeinde yakwe. Mna ukink'he du nk'hande kinde wagima ne zimbeyu mwe migunda yetu."

20 Yusufu niyo amguila Falao isi yose ya Misili. Kila Mmisili haheina kuunga watagaga isanga yawe kwaviya gumbo dyatendesaga. Naho niyo isanga yose yanda ya Falao. 21 Ivo Yusufu awatendaga want'hu wose kunda watumwa wa Falao mwe isi yose ya Misili. 22 Mna migunda ya walavant'hambiko haiguile. Hawaitagile migunda yawe kwaviya nawakahokela nk'hande iyo wapangilwagwa kulawa kwa Falao. Kwaivo hakwandile na cho kuwatenda walava nt'hambiko watage migunda yawe. 23 Yusufu niyo awagamba want'hu, "Miye hiwagulani nyuwe hamwenga ne migunda yenyu, mnda watu wa Falao. Elo nomwink'higwe zimbeyu mkahande mwe migunda yenyu. 24 Hakeza mpaka ho uvuni, nomumlihe Falao, imwenga mwe shano, vine kwa shano visigale nevinde venyu kwa mbeyu na nk'hande yenyu wenye ne zimp'huga zenyu, na wana wenyu."

25 Niyo wagamba, "Weye kuukombola ugima wetu, kunda ywedi kwetu, naswe nekinde watumwa wa Falao." 26 Ivo niyo Yusufu aika mwiko mwe mbuli ye migunda mwe isi ya Misili, naho iyuko hata ivi dielo kugamba, Falao naalihigwe imwenga mwe zishano yo uvuni. Isi ya walavant'hambiko ikedu niyo hi ya Falao.

27 Waizilaili wekalaga uko Gosheni mwe isi ya Misili. Niyo wanda wagoli uko na kugenyelesa. 28 Yakobo ekalaga mwe isi ya Misili kwa miaka gana na milongo mine na mfungate. 29 Mazuwa yo kubanika kwa Yakobo yeze yande hagihi, amwitangaga Yusufu mwanawe niyo amgamba, "Uneva wiyuko uwedi kulawa kwako, ika mkono wako hasi ya mawambo yangu, naho uniikile kilapi kugamba hounimosele msanga mwe Misili. 30 Mna heza kubanika, uninule kulawa Misili, niyo wanimosela msanga hadya wamoselwe wakale wangu."

Yusufu niyo ahitula, "Nenidamanye enga ivo ulongile."

31 Niyo Yakobo amgamba, "Ika kilapi kugamba noudamaye ivo." Yusufu aikaga kilapi, niyo Yakobo afunamila kwo mtwi wakwe na kumtogola Mnungu hadya ho lusazi lwakwe.