1 Aho Laheli eze aone kugamba hamwelekele mgosiwe Yakobo mwana, amuonelaga finju mkuluwe, niyo amgamba Yakobo mgosiwe, "Nelese, cheivo nenibanike!"

2 Yakobo niyo amuonela maya Laheli akamgamba, "Hikudaha kunda enga Mnungu. Yehe niye hekwink'hile wana."

3 Laheli niyo ahitula, "Mtumwa ywangu ywe kivele Biliha, eyaha, gona naye anelekele wana, name ninde na wana kombokela yehe." 4 Ivo niyo Laheli amwink'ha Yakobo mgosiwe, mtumwa ywakwe, Biliha, ande mkaziwe, niyo agona naye. 5 Niyo Biliha enula ubovu no kumwelekela Yakobo mwana kilume. 6 Laheli niyo agamba, "Mnungu kanitendela vedi, keva indilo yangu, no kunink'ha mwana kilume." Niyo Laheli amwink'ha uyo mwana zina niye Dani. 7 Biliha niyo apata ubovu mtuhu, niyo amwelekela Yakobo mwana kilume ywa kaidi. 8 Laheli niyo agamba, "Hihigana vitendese na mkulu, mna himhuma." Niyo amwink'ha zina uyo mwana niye Nafutali. Nuko kugamba, "Higana."

9 Lea eze ande kaleka ukweleka, amguhaga mtumwa ywakwe uyo Zilipa, niyo amwink'ha mgosiwe Yakobo vileke ande mkaziwe. 10 Niyo Zilipa amwelekela Yakobo mwana kilume. 11 Niyo Lea agamba, "Hipata tondokela." Ivo niyo amwitanga uyo mwana niye Gadi. Nuko kugamba, "Tondokela." 12 Zilipa mtumwa ywa Lea, amwelekelaga Yakobo mwana kilume ywa kaidi, 13 niyo Lea agamba, "Nna kinyemi kikulu! Haluse wavele nawanitange, kinyemi." Niyo amwink'ha mwana uyo zina niye Asheli. kwa kiibulania nuko kugamba "Kinyemi."

14 Mwo msimo wo uvuni we ngano, Lubeni aitaga kwe nk'honde niyo aona mti uwo want'hu wakuuhuwila kugamba maizi yakwe yadaha kuwatenda wavele kupata ubovu, niyo aguha amwigaile nine Lea. Laheli niyo amgamba Lea, "nink'hage maizi ludodo mwa maizi ya mwanao."

15 Lea niyo amhitula, "Togola ni mbuli ndodo kwa kunihoka mnumagu? Naho haluse waunga uguhe maizi ya mwanangu?"

Laheli niyo ahitula, "Uneva unanink'ha maizi ya mwanao, Yakobo naakagone na weye ikilo cha dielo."

16 Kisingi kiya umwo Yakobo andaga akalawa kwo mgunda, Lea afosaga kugenda kumsingila niyo amgamba, "Kilo cha dielo chakugonanya, kwaviya hikugula kwa maizi ya mwanangu." Ivo ikilo kiya niyo Yakobo agonanyaga na Lea.

17 Mnungu amwivaga Lea, niyo enula ubovu, na kumwelekela Yakobo mwana ywa shano. 18 Lea niyo agamba, "Mnungu kanink'ha uwagilwa wangu, kwaviya nehimwink'ha mtumwa ywangu ande mkaza mnumangu." Niyo Lea amwink'ha umwana zina dya Isakali. 19 Lea enulaga ubovu naho, niyo amwelekela Yakobo mwana ywa mtandatu. 20 Lea niyo agamba, "Mnungu kanink'ha geleko dyedi. Haluse mnumangu naanizumile kwaviya himwelekela mwana ywa mtandatu." Niyo amwink'ha mwana zina niye Zabuloni. Kwa kiibulania nuko kugamba, "Geleko." 21 Uuko uko Lea elekaga mwana kike, niyo amwink'ha zina niye Dina.

22 Mnungu amkumbukilaga Laheli, niyo azumila kulombeza kwakwe niyo alohola cheleko chakwe. 23 Ivo Laheli enulaga ubovu niyo engila nyumba mwana kilume, niyo agamba, "Mnungu kausa zisoni zangu kwa kunink'ha mwana kilume." 24 Niyo amwitanga mwana uyo Yusufu naho niyo agamba, "Zumbe naanink'he mwana mtuhu."

25 Aho Laheli eze amweleke Yusufu, Yakobo amgambaga Labani, "Nilekele niite kwetu kaya, kwe isi yangu. 26 Nink'he wakazangu na wanangu nipatile kwa kudamanya ndima kwako, unilekele niite. Kumanyisa ivo miye hudamanyile ndima."

27 Labani niyo amgamba, "Name nna dya kulonga. Mnungu kanitenda nikombaganye kugamba Mnungu kanivikila kwajili ya weye. 28 Longa maliho yako, name nohulihe."

29 Yakobo niyo amhitula, "Weye mwenye kumanya ivo hudamanyile ndima, na ivo mafyo yako yagenyele mwo kudima kwangu, 30 kwaviya madimo yako yandaga mageke umwo nandile nikei kwiza, mna haluse yagenyelesa, naho Mnungu kakuvikila vitendese kila aho naitaga. Haluse, niini neniite hadamanye mbuli za kwe nyumba yangu mwenye?"

31 Labani niyo amgamba, "Nohwink'he mbwai?" Yakobo niyo amhitula, "Use kuniliha chochose, Nenigendeele no madimo yako uneva unazumila iki hulonga. 32 Nilekele nomboke mwa madimo yako yose dielo, no kupagula kila ngoto ina mawalo na madoladola, na kila mbuzi nt'hitu na ina madoladola, na mawalo. Ayo nayande nayo maliho yangu. 33 Uko kulongole nowize uone kugamba nandaga mhuwilwa, umwo ukeza kulaula maliho yangu uneva neninde na mbuzi heiina mabalobalo hegu madoladola, hegu ngoto yeyose heiina utitu, aho naho noumanye kugamba iyo ibaigwa."

34 Labani niyo agamba, "Ni vedi! Goja vinde enga ivo ulongile." 35 Mna dizuwa idia Labani apagulaga mavulata yandile na malema, na yadya yandile na madoladola, ne zint'hogota zandile na mabalo ne zia zandile na madoladola, na kila imwenga yandile no ung'azi, na kila ngoto yandile no utitu, niyo aziika mwo ukimalizi wa wanawe. 36 Labani niyo aita na mafyo hale na Yakobo, lugendo lwa mazuwa matatu, umwo Yakobo akagendeela kudima mafyo ya Labani yasigale.

37 Niyo Yakobo aguha nk'hombosha za mnwati mbisi na za mlozi na za mwalamoni, niyo azigobola vileke zink'hombosha zinde na malema yang'aile. 38 Aziikaga zink'hombosha kulongole kwo luhondo ludya lwa mafyo yakunyweela. Aziikaga hadya kwaviya mavulata naho yakuozelega yakeza kunywa mazi. 39 Mafyo niyo yawozela yakanda halongole he zink'hombosha izo, niyo yeleka mabehela yandaga na malema, naho yandaga na mabalo na madoladola.

40 Akajika aho niyo Yakobo azizagula zingoto ne zimbuzi, mna kwa ziya zisigale aonyekeza vihanga vawe kwe zia zandile na malema, na zose zandile no utitu mwa mafyo ya Labani, naho hahanganye na madimo yakwe.

41 Umwo mbuguma zina ludole zikabwikana, Yakobo aikaga zingoda kulongole kwa mahondo yo kunywesela, vileke yaozele hagihi ne zingoda. 42 Mna mifugwa isokele haikaga zingoda kulongole. Ivo mifugwa isokele yandaga ya Labani, mna idya idamane niyo yanda ya Yakobo. 43 Kwaivo Yakobo niyo anda mgoli vitendese. Nakanda na mafyo mengi, na watumwa na ngamia na mapunda.