1 Akajika aho, mwo lupisi lumwenga Mnungu amgezaga Ibulahimu, amwitangaga, "Ibulahimu!"

Niyo Ibulahimu etika, "Woe!"

2 Mnungu niyo amgamba, "Mguhe mwanao," "uyudya umwanao Isaka heena miyawe ukumuungisa, wiite kwe isi ya Molia. Kwe milima huunga hulagise, ukamlave kunda nt'hambiko."

3 Mtootondo utimile, Ibulahimu akant'haga nk'huni zo kokela malavo, niyo apakiya mwe mp'hunda yakwe, niyo amguha Isaka hamwenga na watumwa wakwe waidi. Wakongaga int'hambo kuita kudya agambilwe ni Mnungu. 4 Mwe dizuwa dya katatu Ibulahimu auonaga mnima kwa hale. 5 Niyo awagamba wadya watumwa, "Ikaleni aha ne dipunda. Miye no mbwanga kigendeele mpaka hadya kikavike, akajika chauya."

6 Ibulahimu amtwikaga Isaka zink'huni zo kokela malavo, yehe mwenye aguhaga ngola no moto. Umwo wandile wakaitanya, 7 Isaka niyo amuuza ise, "Tate!"

Ibulahimu niyo etika, "Woe mwanagu?"

Isaka niyo amuuza ise, "Naona kugamba umoto ne zink'huni kinanazo, haluse ingoto ye nt'hambiko iihi?"

8 Ibulahimu niyo amhitula mwanawe, "Mnungu mwenye naamanye uko neilawe."

9 Weze wabule hadya Ibulahimu agambilwe ni Mnungu, Ibulahimu adamanyaga kilingo cha kutambikila, niyo apanga zink'huni mnanga. Niyo amgwila mwanawe niyo amkakiliza, no kumtambalika mnanga mwe zink'huni aho he kilingo cho kutambikila. 10 Niyo aguha ingola yakwe amchinje mwanawe. 11 Mna mtumigwa ywa kwe mbingu niyo amwitanga, "Ibulahimu, Ibulahimu."

Ibulahimu niyo etika, "Woe."

12 Niyo amgamba, "Use kumkoma mwanao naho use kumtenda dyodyose." "Haluse himanya kugamba wamtegeleza Mnungu naho wamwogoha kwaviya hulemele kunilavila mwanawo heena miyawe."

13 Ibulahimu niyo enula meso no kuwona ngoto ikegwiile mahembe yakwe mwa kasaka. Agendaga kuiguha niyo ailava yoho kunda nt'hambiko yo koka hant'hu ha mwanawe. 14 Ibulahimu ahenk'haga zina hant'hu aho, "Zumbe enk'hiza." Naho hata ivi dielo want'hu wagamba, "Kwo mnima Mnungu kalava."

15 Mtumigwa ywa kwe mbingu ywa Mnungu uko kulanga amwitangaga kaidi Ibulahimu, 16 Mnungu kagamba, "Nakelisa kwa zina dyangu mwenye kugamba hunilemeele kunilavila mwanao, mwanawo heena miyawe, 17 ikindedi nohuvilkile na kuwatenda welekwa wako wande wengi enga nt'hondo za kwe mbingu naho enga msanga wa mp'hani. Welekwa wako nawaikaile mizi ya wank'hondo wawe. 18 Naho kombokela kwa weye want'hu wa si zose nawavikilwe kwaviya weye kunitegeleza." 19 Ibulahimu awauiiyaga watumwa wakwe, no kuuyanya nawo Belisheba uko ekalaga.

20 Yakajika ayo, Ibulahimu abunk'hulaga kugamba Milika elekaga wana kilume mnane, kwa nduguye Naholi. 21 Mwelekwa ywa nk'hongo etangagwa Uzi, nduguye amtimile etangangwa Buzi na kutimilwa ni Kemueli ise dya Asilia, 22 Kesidi na Hazo na Pilidashi na Yidilafi na Betueli, 23 ise dya Labeka. Milika amwelekelaga Naholi nduguye dya Ibulahimu awo wana kilume mnane. 24 Hamwenga na ayo, Luma muwele ywa Naholi naho amwelekaga Teba na Gahamu na Tahashi na Maaka.