1 Yakobo awetangaga wanawe niyo agamba, "Keduganyeni niwagambileni kiya kikuunga kiwalaileni mwa mazuwa yekulongole."

2 "Keduganyeni naho mtegeleze, nyuwe wana wa Yakobo.

Mtegelezeni tati yenyu Izilaeli."

3 "Lubeni niweye mwelekwa ywangu ywa nk'hongo, weye ywi ludole lwangu.

Naho cheleko cho ubwanga wangu.

Mwa wose weye niwe mdahi mkulu naho ni mta ludole."

4 Kunda enga ugubiko wa mazi mengi yakomboka.

"Mna hounde ywa nk'hongo naho.

Kwaviya nokugona mwo lusazi lwa iso.

Naho nokulugela usavu lusazi lwangu."

5 "Simioni na Lawi ni wandugu.

Mna mabamba yawe ni vitowanilo va nk'humbizi."

6 Heninde hamwenga nawo mwe kinyele chawe,

Heninde hamwenga nawo mwe midugano yawe,

Kwaviya wakomaga want'hu kwa maya,

Naho kwa kinyemi chawe wayahamant'haga majeku.

7 Nayaligitwe amaya yawe kwaviya yatendesa ukali,

No kufujuka kwawe hekwiina mbazi.

Neniwasambaze mwe isi ya Izilaeli.

Naho neniwasambaze mwe want'hu wawe.

8 Weye Yuda, wanduguzo nawa kutunye.

Nouwagoge waihi wako mwe zisingo zawe.

Wanduguzo nawakwinamile.

9 Yuda ni enga simba,

Ikomile kwo kongola niyo yakwela mnanga,

Katambaala hasi na kukechuula,

Hahali ywa kumgela nk'huswank'huswa.

10 Ngoda ye kiseuta heifose kwa Yuda,

Naho nk'home yo uzumbe hemlawe mwe viga vakwe,

Mpaka eze umwenye,

Naho isi zose nezimwive yehe.

11 Naa izinganize imp'hunda yakwe mwo mzabibu,

Na mwana mp'hunda kwo mzabibu wedi.

Yehe afigisa suke zakwe mwa mazi ya zabibu na mwe sakame ink'hundu ye zabibu.

12 Meso yakwe nayande yenk'hundu kwa kunywa divai.

Meno yakwe nayang'ale kwa kunywa mele.

13 Zabuloni neekale mp'wani,

Yehe naande enga mp'wani ya kwegamiza meli.

Naahakane ne isi ya Sidoni.

14 "Isakali naande enga mp'hunda ina ludole

Ikuketambalika mgatigati mwe zint'wika zakwe.

15 Niyo aona kugamba hant'hu ho kwikala ni hedi,

Naho isi yakwe inyenda,

Ivo niyo afunamiza mgongo wakwe no kuketwika nt'wika.

Nakukelava mwenye kudamanya ndima zo utumwa kwa want'hu watuhu."

16 "Dani naawasengele want'hu wakwe ivo viwagilwe,

Enga viya nk'holo nt'huhu za Izilaeli zikudamanya."

17 Dani naande enga nyoka mwe sila,

Nyoka ina sumu mwe sila,

Nyoka ikuluma visinyagilo va falasi,

Naho akweile ifalasi agwe.

18 "Nagojela unikombole weye Zumbe Mnungu!"

19 "Gadi naakump'hukilwe ni fyo dya wahoki,

Mna yehe naawakulumbuze na kuwatowa."

20 "Si ya Asheli neilozoke nk'hande.

Naho naamlozoele seuta nk'hande yedi."

21 "Nafutali yehe keiga mp'hala heivugailwe,

Ikweleka wana wedi."

22 "Yusufu yehe ni enga mti ukweleka,

Mti ukweleka hagihi ne n'choko, matambi yakwe yagubika mwo lukazi.

23 Wank'hondo wakwe nawamkump'hukila kwa maya,

Niyo wamgulusa na kumlasa misale.

24 Mna uta wakwe utoga

Ne mikono yakwe neipate ludole

Kwa udahi wa Mnungu Mta Udahi wa Yakobo,

Akwitangwa Mdimi, naho Mwamizi ywa Izilaeli.

25 Ni kwa wambizi wa Mnungu wa iso

Ni Mnungu mta udahi akukuvikila

kwa uvikilwa wa vula kulawa kulanga.

Kwa uvikilwa wa mazi mengi kulawa hasi ye isi,

Uvikilwa wa wavele kwelekesa wana wengi ne mifugwa neyongezekele.

26 Uvikilwa wa iso ni mkulu kujink'ha uvikilwa, hegu vint'hu vedi vikulawa kwe milima ya kale,

Vint'hu vikumunk'hilwa ne vigulu va mazuwa yose,

ne vint'hu ivo vose vikale mwo mtwi wa Yusufu.

Uvikilwa uno unde mnanga mwa Yosefu eli mkulu mwa wanduguze."

27 "Benjamini ni enga uzi kali.

Mtondo adya yoo ukala wakwe, mwalagulo awapanga watahigwa."

28 Awa nawo nk'hongelo ya makabila mlongo na waidi wa Izilaeli, na ivo nivo alongaga tati yawe umwo andaga akawavikila, awavikilaga kila yumwenga na uvikilwa wakwe.

29 Yakobo awagambaga wanawe, "Miye nenikelunge na want'hu wangu, mnimosele msanga hamwenga na wakale wangu mwe mp'hanga imwo mgunda wa Efuloni Mhiti, 30 mwe mp'haga idya ya Makipela hagihi na Mamle mwe isi ya Kanani, idya Ibulahimu agulaga kwa mnt'hu we dikabila dya Wahiti akwitangwa Efuloni, hande hant'hu ha kumosela msanga hamwenga no mgunda. 31 Hadya naaho wamoselwe msanga Ibulahimu na mkaziwe naho Sala iviya iviya naaho amoselwe msanga, Isaka na mkaziwe Labeka, naho naaho ammosele msanga Lea. 32 Mnimosele msanga mwo mgunda udya ne mp'hanga idya yagulagwa kwa Wahiti." 33 Yakobo eze ajike kuwalagiza wanawe, aketambalikaga naho mwo lusazi niyo abanika.