1 Isaka niyo amwitanga Yakobo, niyo amvikila akamsigiila kugamba, "Usekulomba mvele ywa Kikanani. 2 Sunguza kuita Padanalamu kwa babako Besueli, uko Mesopotamia, ukalombe soviyo yumwenga, mwa wana mtumbao Labani. 3 Mnungu ywo Udahi wose naaivikile indoza yako, no kukwink'ha wana wabindile ingi, naivo nounde tate ywa isi nyingi! 4 Mnungu akuvikile weye hamwenga na welekwa wako enga viya amvikile Ibulahimu. Naho, isi ino ukwikala enga mtakwiza neinde yako, isi iino Mnungu amwink'haga Ibulahimu!" 5 Isaka amtumaga Yakobo kuita Mesopotamia kwa Labani, andaga mwana Besueli Mwalamu, naho niye lumbudye dya Labeka, uyo nine dya Yakobo na Esau.

6 Esau amanyaga kugamba, Isaka kamvikila Yakobo, naho kamtuma kuita Mesopotamia kugenda kuzungula mvele. Iviya iviya, abunk'hulaga kugamba, umwo Isaka akamvikila Yakobo, amsigilaga kugamba asekulomba mvele ywa Kikanani. 7 Naho aonaga kugamba Yakobo kaweva nine na ise, naho kaita Mesopotamia. 8 Niyo Esau anda kamanya kugamba, ise Isaka hakwelelwa ni wavele wa Kikani. 9 Ivo Esau aitaga kwa ise mdodo Ishumaeli, mwana ywa Ibulahimu niyo amlomba Mahalati mwana ywa Ishumaeli andaga lumbudye dya Nebaioti.

10 Yakobo akongaga utafi kulawa Beelisheba kuhinga Halani. 11 Zuwa dize diswe, aikaga nt'hulwe niyo aguha iwe nokudiika hasi yo mtwi wakwe, niyo atambala na kugona aikile mtwi wakwe mwe diiwe idyo. 12 Mwe zisozi aonaga mhindo ulaile hasi mwe isi, mpaka kulanga, watumigwa wa kwe mbingu wakakwela na kuseela mwo mhindo uwo. 13 Zumbe akimalaga hakanda ha Yakobo, niyo agamba, "Ni miye Zumbe, Mnungu ywa Ibulahimu na Isaka. Nohwink'he isi ino, iino uigonele, weye na welekwa wako. 14 Nawande wabindile ingi, enga luvumbi lwe isi. Nawasambale nt'hendelo zose, naho kwa kombokela weye neniwavikile want'hu wa si zose. 15 Ukumbukile kugamba, neninde hamwenga na weye, naho nohwamile hohose nowiite, naho no huvuze mwe isi ino. Hohuleke hata nikint'hize yadya nilagane kwako."

16 Yakobo eze enuke mwe zint'hongo niyo agamba, "Zumbe eyaha aha! Name hyamanyize!" 17 Ogohaga niyo agamba, "Hant'hu aha hatisa vidala! Vadahika ino Nyumba ank'hulu ya Mnungu, naho nk'hili ya kuita kwe mbingu."

18 Yakobo enukaga kilo kilo, niyo aguha diiwe diya aikilaga umtwi wakwe, niyo adikima dinde mkimaila niyo adigidila mavuta diiwe vileke dinde nk'humbukila kwa Zumbe. 19 Ehetangaga hant'hu aho Beseli. Hamwenga na kugamba mzi uwo wetangagwa Luzi. 20 Yakobo niyo aika kilapi kwa Zumbe, "Uneva unanda hamwenga na miye no kunidima mwe nt'hambo yangu ino no kunink'ha nk'hande na suke, 21 naho nna uya mp'heho tondolo kwa tate, nounde ni weye Mnungu ywangu. 22 Iwe idi dye nk'humbukila nikimalise aha, nahande ni hant'hu nouvikigwe, naho nohwink'he kimwenga mwe kila vint'hu mlongo ukunink'ha."