1 Ivo Waishumailia waitaga naye Misili niyo wamtaga kwa Potifa andile mkulu yumwenga mwa vilongozi wa Falao. Naho nakanda mkulu ywa Watowani wamizi. 2 Zumbe andaga hamwenga na Yusufu, naho amtendaga Yusufu agendeele vedi mwe zimbuli zakwe zose. Ekalaga mwe nyumba yo mkulu ywakwe ywe Kimisili. 3 Uyo mkulu nakabunk'hula kugamba Zumbe nakanda hamwenga na Yusufu, naho kamtenda agendeele vedi mwe zimbuli zakwe zose naakadamanya. 4 Potifa niyo ambwendesa Yusufu, niyo amwiika kunda mndima ywakwe mwenye. Naho kunda mnyamp'hala mwe nyumba yakwe yose, na kila kint'hu kiya andaga nacho. 5 Kukongela aho na kugendeela, Zumbe kwa kombokela kwa Yusufu, aivikilaga nyumba ya yudya Mmisili na kila kint'hu kiya andile nacho mwe nyumba yakwe na kwe nk'honde. 6 Potifa alekelaga kila kint'hu andaga nacho mo ukimalizi wa Yusufu, haheina yehe mwenye kukimaila, kuleka ink'hande yakwe du.

Yusufu aumbwagwa vedi naho andaga mbwanga akuwagila, 7 lupisi lumwenga mkaza Potifa akongaga kumunk'hilwa naye na kumlombeza wakagonanye. 8 Yusufu amlemelaga na kugamba, "Kaula, mkulu kaniika kunda mnyamp'hala ywa kila kint'hu ananacho mwe nyumba. Naho yehe mwenye hakukaula mbuli yeyose idya kwaviya miye ni aha. 9 Hahali mta udahi mwe nyumba ino enga miye. Mkulu hanilemeze kint'hu chochose mna weye bule, kwaviya ywi mkaziwe. Nenidahe vivihi kudamanya usavu no wavu hameso ha Mnungu?"

10 Hamwenga na kugamba uyo mvele ambwedesaga na kumhembeleza Yusufu kila zuwa, Yusufu hagezile kugona naye.

11 Mna zuwa dimwenga umwo Yusufu aitaga kwe nyumba akadamanye ndima zakwe, hekwiina mtumwa yeyose. 12 Yudya mvele amgwilaga Yusufu mwe suke akamgamba, "So kigonanye!" Mna Yusufu anyilikilalaga kuse no kumwasila isuke mwe mikono yakwe. 13 Yudya mvele eze aone kugamba Yusufu kamwasila isuke na kunyilika kuse, 14 awetangaga wandima wa mwe nyumba na kuwagamba, "Kauleni! Muibulania uyu kigailwe ni mnumangu he nyumba akigela soni. Keza kwe chumba kwangu niyo aunga anikakalise, mna higuta lukunga. 15 Eze eve haguta niyo anyilikia kuse, mna kanasila isuke yakwe."

16 Yudya mvele aiikaga isuke idya mpaka hadya mgosiwe aho auyaga kaya. 17 Niyo amgambila mgosiwe imbuli idya, "Muibulania uyu mtumwa umwigale aha, kengila kwe chumba changu no kinisezigila. 18 Mna nize nigute lukunga nakanyilika kuse no kunasila isuke yakwe."

19 Ivo yudya mkulu ywa Yusufu eze eve ivo mkaziwe naakamgambila, "Ivi nivo mndima ywakwo anitendile." Mkulu uyo niyo ywa Yusufu afilisaga maya. 20 Yusufu agelagwa kwe divugailo kudya wavugailwa wa seuta wandaga wakavugailwa, niyo Yusufu ekala uuko. 21 Mna Zumbe andaga hamwenga na Yusufu, nakumwambiza mpaka kamtende aungiswe ni mkulu ywe divugailo. 22 Amwiikaga Yusufu kunda mkulu ywa wavugailwa wose, naho niyo anda mnyamp'hala ywa kila kint'hu nekikadamanyika kwe divugailo. 23 Uyo mkulu ywe divugailo hakakaula kint'hu chochose kiya naka kimaila Yusufu, kwaviya Mnungu andaga hamwenga na Yusufu, niyo amtenda agendeele vedi kwa kila kint'hu kudya naaka damanya.