1 Niyo Yusufu amgamba yudya mnyamp'hala ywe nyumba yakwe, "Memeza nk'hande mwa magunia ya want'hu awa, kila yumwenga viligane no ludole lwakwe lwo kwinula, naho yavuze matundu ya kila yumwenga mwe digunia dyakwe. 2 Naho gela ikikombe ichangu cho kunyweela mwe digunia dya uyo mdodo hamwenga na matundu yakwe yo kuguila ink'hande." Niyo atenda enga ivo asigiilwe ni Yusufu. 3 Mtondo kwize kutandazuke, wandugu wadya walekelagwa kuita hamwenga ne zimp'hunda zawe. 4 Weze wagende lupisi ludodo kulawa ho mzi, Yusufu niyo amtuma mnyamp'hala ywe nyumba yakwe, "Sunguza watimile want'hu awa, naho una wabwiila, wagambe, Nii mwaliha wiihi kwo uwedi? 5 Nii mkabawa ikikombe cho mkulu ywangu icho akunyweela no kusinyila mnamulo? Mdamanya kint'hu kiihile."

6 Yudya mtumwa eze awabwiile awagambilaga yadya alagizwe ni Yusufu. 7 Niyo wamgamba, mkulu, "Nivo wagaaze? Chakelisa kugamba, hakidamanye kint'hu enga icho! 8 Weye kumanya kugamba nekivuza amatundu yadya chaitaga nayo uko Kanani, yadya yandaga mwa magunia yetu. Chadaha naho vivihi kubawa matundu hegu zahabu kulawa kwe nyumba ya mkulu ywako? 9 Mkulu, uneva kinaonwa mwe yumwenga ywetu, naakomwe naho suwe kisigale nekinde watumwa wa zumbe."

10 Niyo awagamba, "Ni vedi ivo mlongile, yeyose naabwiilwe nuyo naande mtumwa ywangu, nyuwe msigale nomlekelwe mwite." 11 Niyo kila mnt'hu asunguza kuseleza digunia dyakwe hasi na kila mnt'hu aloholaga digunia dyakwe. 12 Yudya mtumwa akizungulaga ikikombe, kukongela kwo mkulu mpaka kwo mdodo mwa wose. Ikikombe niyo cha bwiilwa mwe digunia dya Benjamini. 13 Niyo walwebula zisuke zawe kwa kinyulu, niyo kila yumwenga atwikiza imp'hunda yakwe no kuuya kwo mzi.

14 Umwo Yuda na wanduguze wauyaga kwe nyumba ya Yusufu, Yusufu andaga akei aaho. Wamwinamilaga, 15 niyo Yusufu awagamba, "Mdamanya mbuli yani ino? Hammanyize mnt'hu enga miye nadaha kusinya mnamulo?"

16 Niyo Yuda agamba, "Kigeeze kwako weye zumbe ywetu? Chaunga kikesunt'he vivihi? Mnungu kaulaviliza wiihi wa watumwa wako, haluse wose kinda watumwa wako, hamwenga na yudya awonwe ne kikombe."

17 Mna Yusufu niyo agamba, "Bule hikudaha kudamanya ivi! Yudya aonwe ne kikombe niye naande mtumwa ywangu. Nyuwe msigalele keitileni kwa utondowazi, kwa tati yenyu."

18 Niyo Yuda amsogeela Yusufu no kumgamba, "Chakulombeza, mkulu, nnekele nilonge na weye ludodo. Usekunda na maya na miye, weye ni enga seuta mwenye." 19 Mkulu, wakiuzaga, uneva kinanaye tatiyetu hegu ndugu ywetu mtuhu? 20 Naho chakuhitulaga, kinanae Tati yetu eli mdala na mvuna ywetu amweleke kwo udala wakwe. Mkuluwe ywa yudya mbwanga kabanika, naho ni yehe mwana ekedu asigale kwa nine, naho ise amuungisa. 21 Mkulu nokukigamba watumwa wako, kimwigale uyo mbwanga vileke wize umwuone. 22 Naswe niyo chakuhitula mkulu, hakudaha kumwasa ise, kwaviya anamwasa uyo ise adaha akabanika. 23 Niyo wakigamba watumwa wako, hamna seele naye ndugu yenyu umdodo homuuone uso wangu.

24 "Umwo chauyaga kaya kwa mndima ywako, tati yetu chammgambilaga ivo weye walongaga. 25 Niyo tatiyetu akigamba kiuye kaidi kikagule nk'hande ludodo. 26 Suwe niyo chamhitula, kikamgamba, ‘Hakikudaha kuita uko. Nekiite uneva nekindanye na mvuna ywetu, kwaviya hakikudaha kumuwona yudya mkulu uneva hakinandile naye.’ 27 Niyo mndima ywako tatiyetu akigamba, ‘Mmanya kugamba mkazangu Laheli kanelekela wana waidi du. 28 Yumwenga mwa awo kanihalala, niyo nagamba, kwavovose kalwebulwa ni makala ya kwe mbago, kwaviya himuone ivo ahalawaga aha. 29 Uneva mnamguha mwana uyo naho, nakulumizwa uko, nomnimose msanga nkanda mdala mta kinyulu.’"

30 Yuda agendeelaga kulonga. "Naho mkulu, uneva hinauiye naye mvuna ywetu kwo mtumwa ywako tatiyetu naabanike. Kwaviya wikazi wakwe wigamila mwo wikazi wa uyu mvuna ywetu, naho kadalahalisa, kinamgela kinyulu chadaha kumkoma. 31 Uneva nnauya kaya haheina uyu mbwanga kunda naye, aho akeza kuwona hakinanaye mvuna ywetu, taiyetu naabanike. Kwaviya wikazi wakwe wegamila mwa uyu mbwanga naho ni mdala, kinamwigaila mbuli za usungu nekimkome. 32 Ivo miye nakelavaga kwa tate kugamba ugima wa mwana uyu nounde mwa miye, uneva hina uiye naye mvuna ywetu kwako, neninde ywa kukalalizwa hameso ya tate wikazi wangu wose. 33 Kwaivo zumbe, nakulombeza, miye nenisigale aaha ninde mtumwa ywako, hant'hu ha uyu mvuna ywetu, umlekele mvuna ywetu auye kaya hamwenga na wanduguze. 34 Neni uye vivihi kwa tate haheina kunda hamwenga na mvuna ywetu? Nogoha kuwona maihi yakuunga yamlaile tate."