1 Ivo Yakobo eze eve kugamba Misili iyuko nk'hande, awagambaga wanawe, "Nyuwe mwikala du aha mkakekaula? 2 Evaga kugamba Misili iyuko nk'hande, iteni mkagule nk'hande kinase kuzehuka ne digumbo." 3 Ivo wanduguze mlongo dya Yusufu niyo waita kwo kugula nk'hande uko Misili. 4 Mna Yakobo hamlekile Benjamini nduguye dya Yusufu aite nawo, kwaviya ogohaga kugamba sema analailwe ni kint'hu kihile.

5 Wana Yakobo wabulaga Misili hamwenga na want'hu watuhu kokugula nk'hande, kwaviya Kaanani nako kwandaga na gumbo. 6 Yusufu niye andaga mkulu we isi ya Misili, niye andaga akawatagila nk'hande want'hu we ziisi zose. Ivo wanduguze wezaga niyo wamwinamila hameso hakwe, nevihanga vawe wakaviika hasi. 7 Yusufu eze awaone wanduguze, awakombaganyaga, mna niyo aketenda enga hawamanyize. Niyo awauza kwa kuwafank'hila, "Nyuwe mlawa hii?"

Niyo wahitula, "Suwe kilawa Kaanani kiza kugulala nk'hande."

8 Hamwenga na kugamba Yusufu awamanyaga wanduguze, woho mna hawammanyaga. 9 Akumbukilaga isozi alotaga mwa woho niyo agamba, "Nyuwe mwi wapelembi, mwiza kukaula hant'hu he isi yetu haheina wamizi mwe isi yetu."

10 Niyo wamhitula, "Hivo ivo zumbe. Suwe watumwa wako kiza kugula nk'hande. 11 Suwe chose kindugu naho tatiyetu yumwenga. Kiwant'hu wedi hiyo wapelembi."

12 Yusufu niyo awagamba, "Bule! Nyuwe mwiza kukaula hant'hu haheina wamizi wedi mwe isi yetu."

13 Niyo wagamba, "Suwe watumwa wako chandaga mlongo na waidi, wana wa mnt'hu yumwenga ekelaga mwe isi ya Kanani. Mvuna ywetu ekaya hamwenga na tatiyetu, yumwenga ywetu naye abanikaga."

14 Yusufu niyo awagamba, "Hivo nilongile. Nyuwe mwi wa pelembi. 15 Ivi nivo nomgezigwe. Nakelisa kwa zina dya Falao, kugamba homhalawe aha mpaka mvuna ywenyu mdodo eze aha. 16 Msigiileni yumwenga ywenyu akeze naye aha, nyuwe msigale nomvugailwe naho mgezigwe milosi yenyu uneva ni ya kindedi. Nakelisa naho kwa zina dya Falao, nyuwe mwi wapelembi!" 17 Niyo awaguha wose no kuwavugaila kwe divugailo kwa mazuwa matatu.

18 Mwe dizuwa dya katatu Yusufu niyo awagamba, "Kwaviya miye namogoha Mnungu, damanyeni aya mnde wagima. 19 Uneva ni wahuilwa, yumwenga ywenyu naasigale mwe divugailo, wamwenga waguhe nk'hande wegaile zimp'huga zenyu, zinase kuzehuka. 20 Naho mwaungwa kwiza naye mvuna ywenyu kwangu, milosi yenyu ikaulwe ikindedi chakwe mnase mna komigwe."

Wazumila kudamanya ivo. 21 Niyo wakegamba woho kwa woho, "Ikindedi chasulumizwa kuliha yadya chamtendelaga mvuna ywetu. Chaonaga ivo andaga akadumangila, naivo andaga akaunga kimwambize kwajili yo ugima wakwe, mna suwe hachamtegelezaga, naivi nivo vikuleka chasusulumizwa."

22 Lubeni niyo agamba, "Namigambilagani kugamba msekumtendela vihile mbwanga, mna nyuwe hamwanivile. Haluse sakame yakwe yaungwa kiilihe." 23 Nawanda hawamanyize kugamba Yusufu naaka weva yadya nawakalonga, kwaviya naakalonga nawo kwa kwombokela mtapita. 24 Yusufu niyo ahituka na kulava masozi. Eze ande na udahi wo kulonga naho. Niyo amsagula Simioni, no kulagiza akakwe mp'hingu iivi waka kaula.

25 Niyo Yusufu alagiza wandima wakwe wamemeze nk'hande mwe mifuko ya wanduguze, naho kila yumwenga avuzilwe matundu yo kuguila nk'hande mwe mfuko wakwe, na mp'hamba. Niyo wadamanyilwa ivo vose. 26 Niyo wadya wanduguze niyo wakweza nt'hwika zawe ze nk'hande mwe zimp'hunda niyo waita. 27 Weze wabule hant'hu hamwenga na kuika nt'hulwe vileke wagone, yumwenga ywawe aloholaga mfuko wakwe vileke aink'he nk'hande mp'hunda yakwe, ehelagwa kuwona matundu ye mwo mfuko wakwe. 28 Niyo awagamba wanduguze, "Matundu yangu yavuzigwa, kauleni ye mwe digunia dyangu." Niyo wafa chevu, wakakehitukila wakazingiza.

Wakagamba, "Ni kint'hu chani iki Mnungu akidamanyile?"

29 Weze wauye kwa tati yawe Yakobo, niyo wamgambila yose yawalaile wakagamba, 30 "Mkulu ywa Misili kakikwank'hila, niyo akivugaila akagamba suwe nekikapelemba isi yakwe. 31 Niyo chamgamba, suwe hiyo wapelembi kiwant'hu wahuwilwa. 32 Suwe kiwana mlongo na waidi, suwe wose tatiyetu yumwenga. Ndugu yetu yumwenga abanikaga, mvuna ywetu mdodo eyuko Kanaani, ekala na tatiyetu. 33 Yudya mkulu niyo akigamba, ivi nivo nenimanye kugamba nyuwe mwi wahuwilwa. Mwaseni ndugu yenyu yumwenga aha, watuh muwegaile sumo ukwo kwenyu kaya. 34 Nasileni uyo ndugu ywenyu mdodo, ivo neni manye kugamba nyuwe hiyo wapelembi mna mwi want'hu wahuwilwa. Naivo nenimvuze kwenyu, naho nomdahe kwikala aaha, no kudamanya uchuuzi."

35 Umwo wandaga wakakupula magunia yawe ye nk'hande, waonaga vifuko va matundu mwe kila mfuko wa kila yumwenga. Weze waone matundu ayo, wose hamwenga na tati yawe, wogohaga. 36 Niyo tati yawe awagamba, "Nyuwe mnazila mwanangu? Yusufu hahali na Simioni naye hahali, naho mwaunga mumguhe Benjamini naye. Aya yose yanilaila miye!"

37 Ivo Lubeni amgamba ise, "Uneva hina mvuzile Simioni kwako, weye uwakome wanangu waidi. Nihuwile kugamba nenimdime naho nenimvuze kwako."

38 Yakobo niyo amgamba, "Hamkudaha kuita na mwanangu, nduguye kabanika, kasigala yehe du ekedu. Uwihi wowose una mlaila mwe sila, nomleke habanika kwa usungu mkulu."