1 Niyo Mnungu amvika Sala enga viya amwiikilaga Ndagano. 2 Ivo Ibulahimu umwo andaga mdala, Sala enulaga ubovu no kumweleka mwana kilume. Mbwanga uyo elekagwa mwo lupisi uludya alongaga Mnungu kugamba neelekwe. 3 Ibulahimu amwink'haga uyo mwana zina niye Isaka, 4 naho Ibulahimu amvinilaga Isaaka, umwo eze abule mazuwa mnane enga viya Mnungu asigiile. 5 Umwo Isaka akelekwa Ibulahimu andaga na miaka gana. 6 Sala niyo agamba, "Mnungu kanink'ha kinyemi na luseko. Yeyose akuunga eve imbuli iyo naaseke hamwenga na miye." 7 Niyo ongeza kugamba, "Niani agambile Sala hegu nakamwelekela Ibulahimu mwana? Mna himwelekela mwana kilume mwo udala wangu uno."

8 Isaka niyo agendeela kukula, niyo mwe dizuwa alekelaga ukonk'ha, Ibulahimu amtendelaga wila wa kinyemi.

9 Zuwa diwenga Sala amuonaga Isaka akaseziga na Ishumaeli mwana Hajili Mmisili. 10 Ivo Sala niyo amgambila Ibulahimu, "Mguluse mtumwa uyo na mwanawe. Mwana ywao mvele uyo hana ukipe wowose mwo ukipe wa mwanangu Isaka." 11 Mbuli ino neimgelesa kinyulu Ibulahimu kwaviya Ishumaeli naye andaga mwanawe.

12 Mna Mnungu niyo amgamba Ibulahimu, "Usekunda na kinyulu mwa uyo mwana uyu hegu mtumwa ywako ywe kike mna damanya enga ivo Sala mkaziwo alongile. Ikindedi welekwa wako nawalawe kombokela kwa Isaka enga ivo nilagane. 13 Naho kwa mbuli yo mwana uyo ywo mtumwa ywako nenimtende kunda na want'hu wengi kwaviya yehe naye ni mwanao."

14 Mtondo wakwe, Ibulahimu amwink'haga Hajili nk'hande na kazembe kamemile mazi. Niyo amwelesa umwana kwo mgongo, niyo amgamba ita. Hajili ahalawaga niyo anda aka twangadika no mwana uko kwe nyika ya Belisheba. 15 Mazi yeze yasile mwa kazembe, Hajili amwikaga umwana he nk'holo yo mti, 16 niyo yehe ekala hasi, uhale wa nk'hacho gana. Akelongelaga mwenye kugamba, "Henidahe kifinyiliza hakaula mwanangu ivo akubanika." Umwo andile kekala hadya, niyo akonga kuilisa.

17 Mnungu amwivaga umwana akaila, niyo uko kwe mbingu mtumigwa ywa kwe mbingu amuuza Hajili, "Una sungu sungu dyani? Usekogoha. Mnungu kamwiva uyo mwana akaila ukwo eli. 18 Inuka, ita kamwinule umhembeleze, kwaviya nenimtende si nk'hulu, kulawa mwa welekwa wakwe." 19 Mnungu niyo amgubula meso Hajili, aonaga sima dina mazi.Ivo agenda kuteka mazi mwe kazembe niyo amnywesa umwana. 20 Mnungu andaga na uyo umwana mwo kukula kwakwe, yehe ekalaga kwe nyika akanda mkala mkulu. 21 Nekekala kwe dijangwa dya Palani, nine niyo amzunguila mvele ywa Kimisili.

22 Lupisi ulo Abimaleki hamwenga na Pikoli endile mkulu ywe difyo dyakwe dya watoani, waitaga kwa Ibulahimu na kumgamba, "Mnungu ehamwenga na weye kwa kila kiya ukudamanya. 23 Ivo uike kilapi aha kugamba hounidant'hilize miye hegu wanangu hegu welekwa wangu. Miye ni mkindedi kwako, weye nawe uniikile Ndagano kugamba nounde mkindedi kwangu na kwe isi ino ukwikala."

24 Ibulahimu niyo amhitula, "Naika kilapi."

25 Niyo Ibulahimu amkalaliza Abimaleki mwe mbuli ye disima diya watumwa wa Abimaleki watahaga. 26 Abimaleki niyo agamba, "Himmanyize uyo adamanye ayo. Hunigambile imbuli iyo, naivo nivo bosi naiva." 27 Akajika aho Ibulahimu niyo aguha ngoto na ng'ombe no kumwink'ha Abimaleki na want'hu awo waidi niyo waika lagano. 28 Ibulahimu niyo apagula ngoto za kivele mfungate mwe difyo dyakwe, 29 niyo Abimaleki amuuza Ibulahimu, "Nii ukatenda ivo?"

30 Ibulahimu niyo agamba, "Zumila imyate ino ye zingoto mfungate. Kwa kudamanya ivi wanda muwona kugamba ni miye nisimbile disima idi." 31 Naivo hant'hu aho niyo hetangwa Belisheba. Kwa kiibulania Nuko kugamba, "Sima dya kilapi." Kwaviya aho naho awo waidi waikilaga kilapi.

32 Weze wajike kuika Indagano iyo aho Belisheba, Abimaleki na Pikoli wauyaga kwe isi ya Wafilisiti. 33 Ibulahimu ahandaga mkwazu uko Belisheba niyo amvika Zumbe, Mnungu ywa mazuwa yose. 34 Ibulahimu ekalaga kwa wafilisiti kwa lupisi lutali.