1 Niyo Zumbe amgamba Musa, "Mwize weye na Haluni na Nadabu na Abihu na wadala wa Izilaeli milongo mfungate, mnivike kwa luhale. 2 Wize weye wikedu haheina mtuhu hagihi na miye, usekwiza uku na want'hu watuhu."

3 Musa niyo awagambila want'hu mbuli zose na malagizo asiigilwe ni Zumbe. Want'hu wose wahitulaga kwa hamwenga wakagamba, "Nekidamanye yose alongile Zumbe." 4 Musa niyo awandika yose alongaga Zumbe.

Musa enukaga kilokilo niyo azenga kilingo cha kutambikila kidamanywe kwa maiwe niyo aika mikola ya maiwe mlongo na miidi iligane no uwazilo wa makabila mlongo na maidi ya Waizilaeli. 5 Musa awatumaga wabwanga wa Waizilaeli wakalave nt'hambiko yo utondowazi kwa Zumbe, malavo yo kokwa na kumchinjila jeku kwa malavo yo utondowazi, 6 niyo Musa aguha dihindi dye sakame no kugela mwa kaziga, idya isigale aikupuilaga he kilingo cho kutambikila kidamanywe kwa maiwe. 7 Aguhaga kitabu che Indagano no kuwasomela want'hu. Niyo want'hu wagamba, "Nekiyatoze no kudamanya ayo yose alongile Zumbe."

8 Musa aguhaga isakame idya imwe kaziga niyo awamyagila want'hu akagamba, "Ino niyo isakame ye Ndagano ya Zumbe aikile na nyuwe viligane ne zimbuli izi zose."

9 Musa na Haluni na Abihu na wadala milongo mfungate wa Wazilaeli wakwelaga kwo mnima, 10 naho wamuonaga Mnungu ywa Waizilaeli. Hasi he viga vakwe handaga enga hazengigwa na maiwe yedi yang'aile enga ulanga ivo wili ung'aile. 11 Mnungu hawatendile vihile awo wakulu wa Waizilaeli, naho wamuonaga Mnungu, niyo wadya na kunywa hamwenga.

12 Zumbe Mnungu amgambaga Musa, "Kwela uku unigojele kwo mnima vileke hwink'he vibao va maiwe viwandikwe miko ne zisigilizi niziwandike kwajili ya kuwahiniza Waizilaeli." 13 Niyo Musa no mwambizi ywakwe Yoshua wakeika lumwe. Musa akwelaga kwo mnima wa Mnungu. 14 Umwo wandile wakei kuita, Musa awagambaga wadala, "Kigojeni aha he nk'hambi mpaka aho nekiuiye. Haluni na Huli we aha hamwenga na nyuwe, ivi yeyose mta masa ya kuilamula naawabase."

15 Niyo Musa akwela kwo mnima wa Sinai, vunde niyo dyagubika mnima. 16 Ung'azi utendese wa Mnungu wezaga mwo mnima Sinai. Vunde nadyo dyagubikaga mnima kwa mazuwa mtandatu. Zuwa dya mfungate, Mnungu amwitangaga Musa kulawa mwe diya divunde. 17 Ung'azi utendese wa Mnungu waonekaga hameso ha want'hu wa Waizilaeli enga moto ukukweela mnanga mwo mnima. 18 Musa engilaga mwe divunde niyo akwela kwo mnima. Ekalaga uuko kwa mazuwa milongo mine, msi na kilo.