1 Zumbe amgambaga Musa, "Iteni mkamgambe Falao, Zumbe agamba, ‘Walekele want'hu wangu waite, vileke wakanivike. 2 Uneva unalemela, nenitowe isi yako kwa kuimemeza majula kila hant'hu. 3 Mto wa Naili noumeme majula, naho nayafose umwo niyo yeza kwako, kwe chumba chako cho ugono, mwo lusazi lwako na kwe zinyumba za vilongozi weyao na kwa want'hu wako, na kwa maziko yenyu hata kwe vint'hu venyu vo kokela mikate. 4 Ayo amajula nayakupalagate weye hamwenga na want'hu wako na vilongozi weyao.’ "

5 Zumbe niyo amgamba Musa, "Mgambe Haluni aloloteze mkono wakwe ne nk'home yakwe kwo mto na kwe mikologombe na makawa. Nokulaile majula yakuunga yameme mwe isi yose ya Misili." 6 Ivo niyo Haluni aloloteza mkono wakwe ne nk'home mwa mazi yose ya Misili, niyo majula yalaila no kumemea mwe isi yose ya Misili. 7 Mna wasai wadamanyaga usai, niyo nawo watenda majula yameme mwe isi ya Misili.

8 Falao awetangaga Musa na Haluni niyo awagamba, "Mlombezeni Zumbe vileke majula yamlawe mwe isi, name neni walekele want'hu wakamlavile nt'hambiko Zumbe."

9 Musa niyo amhitula Falao, "Nenione kinyemi kukulombezela weye hamwenga na vilongozi weyao na want'hu wako kugamba majula yahalawe mwe zinyumba zenyu, naho yasigale kwo mto wa Naili du."

10 Falao niyo agamba, "Nilombezele luvi."

Niyo Musa agamba, "Vinde enga ivo ukulonga vileke umanye kugamba hahali yeyose enga Zumbe Mnungu ywetu. 11 Amajula nayamlawe mwe zinyumaba zenyu na vilongozi weyao na want'hu wako niyo yasigala mwo mto wa Naili du." 12 Niyo Musa na Haluni wahalawa ha Falao no kugenda kumlombeza Zumbe vileke amajula yamemile mwe isi yahalawe. 13 Zumbe niyo adamanya viligane na viya Musa alombeze. Majula yose mwe zinyumba na mwe milwazo na mwe migunda yafaga yose. 14 Want'hu wayaduganyaga amajula ayo malundolundo, niyo kwanda na mp'hofa mwe isi. 15 Mna Falao eze aone kugamba mwe isi mnda mwedi niyo agendeela kunda mnk'hani. Naho enga ivo Zumbe alongaga, Falao haungile kuwategeleza Musa na Haluni viligane na viya Zumbe alongile.

16 Mna Zumbe niyo amgamba Musa, "Mgambe Haluni achulule nk'home yakwe no kuitowa isanga yose mwe isi ya Misili inde mada." 17 Haluni niyo aichuluila ink'home na kuitowa isanga, niyo sanga yahituka kunda mp'hunje vawahambile want'hu na viumbwa mwe isi yose ya Misili. 18 Wasai nawo niyo wageza kudamanya usai wawe mwe int'hifu vileke kulaile mp'hunje, mna hawadahaga. Kwandaga na mp'hunje mwe isi yose, 19 wadya wasai niyo wamgamba Falao, "Aya yadamanywa ni Mnungu." Mna Falao agendeelaga kunda mnk'hani, haungile kuweva Musa na Haluni viligane na viya Zumbe alongaga.

20 Zumbe niyo amgamba Musa, "Winuke luvi kilokilo wiite umbase Falao umwo akaita kwo mto umgambe, Mnungu agamba, ‘Walekele want'hu wangu wakanivike. 21 Nakukanya, uneva huna walekele, nohusulumizise kwa kwigala matuluma ya sofulo kwako na kwa vilongozi weyao na kwa want'hu wako. Zinyumba ne isi yose ya Wamisili nevimeme matuluma ya sofulo. 22 Mna neniyamile isi ya Gosheni uko wakwikala want'hu wangu, vileke kusekunda na matuluma ya sofulo kudya. Aho niho noumanye kugamba ni miye Zumbe ywe isi yose. 23 Mafyo ayo ye zisofulo hayawagele nk'huswa nk'huswa want'hu wangu wa Izilaeli. Kihungi iki neni kidamanye luvi.’ " 24 Zumbe niyo egala matuluma ya sofulo kwe nyumba ya Falao na kwe zinyumba za vilongozi weyawe. Isi yose ya Misili yabanangagwa ni matuluma ya sofulo.

25 Niyo Falao awetanga Musa na Haluni no kuwagamba, "Iteni mkamvike Mnungu ywenyu, mna uumu mwe isi."

26 Mna niyo Musa ahitula, "Bule," "Hevinde vedi kutenda ivo kwaviya Wamisili hawelelwe ne nt'hambiko kikuunga kimlavile Mnungu ywetu. Naho kina lava nt'hambiko heikuwelela, awo nawakitowe maiwe na kukikoma. 27 Chaungwa kuita utafi wa mazuwa matatu kwedijangwa kikamvike Zumbe, Mnungu ywetu, viligane na ivo akisigiile."

28 Falao niyo agamba, "Neni walakeleni mwiiite mka mvike Zumbe, Mnungu ywenyu, uko kwedijangwa, mna ho mwiite hale. Haluse mnilombezele name."

29 Musa niyo ahitula, "Nohulombezele kwa Zumbe haluse ivi kikapangana aha kugamba luvi matuluma ye zisofulo yahalawe kwako weye Falao na vilongozi weyao na kwa want'hu wako. Mna usekukidanat'hiliza naho ukawafingiza want'hu wasekuita kwo kumvika Mnungu."

30 Musa ahalawaga kwe kaya ya Falao no kugenda kumlombeza Zumbe. 31 Niyo Zumbe adamanya viligane na viya alombeze Musa, kayausa matuluma yose ye zisofulo kwa Falao na vilongozi weyawe na kwa want'hu wakwe, hakusigale sofulo yoyose. 32 Hamwenga na ayo Falao nakagendeela kunda mnk'hani, hata ivi hawalekelaga want'hu wa izilaeli waite.