1 Zumbe niyo amgamba Musa, "Hisigaza nimtowe lumwenga Falao na want'hu wakwe wa Misili. Ikajika aho naawaguluseni mhalawe msekuhauya naho. 2 Ivo longa na want'hu wa Izilaeli wagosi kwa wavele uwagambe walombeze vint'hu va zahabu na masawa kwa wambuya zawe Wamisili." 3 Zumbe nakawatenda want'hu wa Izilaeli waungiswe ni want'hu wa Misili. Musa naye niyo anda mnt'hu mkulu kwa vilongozi weyawe dya Falao na kwa Wamisili.

4 Musa niyo amgamba Falao, "Zumbe agamba, ‘Dielo nekilo gati nenomboke mwe isi ya Misili, 5 nt'hulasasu yeyose naakomwe, kukongela nt'hulasasu mgosi ywa Falao mkipe ywe difumbi dyo useuta na nt'hulasasu ywo mtumwa na nt'hulasasu ywe mifugwa yose. 6 Nokunde na ndilo nk'hulu iihise heiinati ilaile naho heize ilaile mwe isi ya Misili. 7 Mna mwa want'hu wa Izilaeli hokunde na mnt'hu hegu kala hegu kuli nekilumizwe, vileke wamanye ivo miye huika mhaka mwa Wamisili na Waizilaeli.’ " 8 Musa niyo agendeela akagamba, "Vilongozi weyao wose naweze wafuname kwangu wakagamba, ‘Guha want'hu wako wose mhalawe.’ Yakajika ayo neni halawe. " Musa ahalawaga ha Falao amemile maya.

9 Zumbe niyo amgamba Musa, "Falao naagendeele kunda mk'hani, vileke nidamanye vihungi vangu va kutisa mwe isi ya Misili." 10 Musa na Haluni wadamanyaga vihungi va kutisa hameso ha Falao, mna Zumbe amtendaga Falao kunda mnk'hani, naho hawalekelaga Waizilaeli wahalawe mwe isi yakwe.