1 Zumbe Mnungu niyo amgamba Musa, "Konga nt'hambo hano, weye na want'hu wako uwalavile mwe isi ya Misili, mwiite mwe isi nilagane na Ibulahimu, na Isaka na Yakobo, umeo nagambaga, ‘Neniwenk'he welekwa wenyu isi ino.’ 2 Nenimsigile mtumigwa ywa kwe mbingu awalongoze, neniwakulumbuze Wakanani, na Waamoli na Wahiti na Wapelezi na Wahivi na Wayebusi. 3 Iteni mwe isi iyo imemile mele na uki. Mna kwaviya nyuwe mna kigungu mtwi, heniite hamwenga na nyuwe, seka nna wakomeni pele mwe sila."

4 Want'hu wakongaga kuhongeza weze weve mbuli izi zihile, naho hakwandaga na yeyose availe mahambo yakwe. 5 Nawadamanya ivo kwaviya Zumbe Mnungu amgambaga Musa, "Wagambe Waizilzeli, kugamba woho ni want'hu wata kigungu mtwi, nnaita nawo kwa lupisi ludodo du, neniwasengele. Ivo hambuleni mahambo yenyu vileke nimanye vo kuwadamanyilani." 6 Ivo, Waizilaeli hawagendeelaga naho kuvala mahambo yawe kukongela aho waitaga kwo mnima wa Holebu uwo ukwitangwa Sinai.

7 Ivo Musa nakanda na kihendo cha kudiguha Dihema na kudiika kuse ye nk'hambi. Hema idyo kadiink'ha zina, hema dya mdugano. Mnt'hu yeyose akuunga ulangilizi kwa Zumbe Mnungu nakaita kwe Dihema idyo Dikukile kuse ye nk'hambi. 8 Kila lupisi Musa umwo aitaga kwe dihema idyo, kila mnt'hu akimalaga ho lwivi lwe dihema dyakwe na kumkaula Musa mpaka akeingila mwe dihema idyo. 9 Lupisi Musa eze engile mwe dihema idyo, Utamwasi wa kungugu nounda ukimala mwo lwivi lwe Dihema Dikukile, Zumbe Mnungu naye niyo alonga naye. 10 Want'hu wose weze wauone utamwasi wa kungugu ukimala mwo mnango mwe Dihema Dikukile, kila yumwenga ywawe akimalaga na kuvika mwo mnango mwe dihema dyakwe. 11 Ivo nivo Zumbe Mnungu naakalonganya na Musa, enga mnt'hu na miyawe. Niyo Musa auya naho kwe Dihema. Yoshua mwana ywa Nuni uyo andaga mndima ywakwe yehe hahauke kwe Dihema Dikukile.

12 Musa niyo Amgambila Zumbe Mnungu, "Kaula! ‘Weye wanigamba, Niwalongoze want'hu awa, mna hunigambile niani akuunga anambize. Hata ivo kugamba kunimanya kwa zina naho hipata uwedi hameso hako.’ 13 Haluse nakulombeza, uneva kindedi hipata uwedi ha meso hako, nilagise haluse zisila zako, vileke nipate kukumanya na kupata uwedi ha meso hako. Nalombeza ukumbukile kugamba kuisagula awa Waizilaeli wande want'hu wako."

14 Mnungu niyo agamba, "Miye mwenye neniite hamwenga na weye, naho nohwink'he utondowazi."

15 Musa niyo agamba, "Uneva weye mwenye howiite hamwenga na miye, ivo usekukilava hant'hu aha. 16 Kwaviya wat'hu watuhu nawamanye vivihi kugamba hipata uuwedi ha meso hako miye na want'hu wako uneva howiite hamwenga na suwe? Mna unaita hamwenga na suwe neikitende miye na want'hu wako kunda want'hu hewekuliganywa na want'hu watuhu mwe isi."

17 Zumbe Mnungu niyo amgamba Musa, "Kwaviya hikumanyisa naho wanelela hameso hangu, miye name neza kwa zina dyako, mbuli ino ulongile neniidamanye."

18 Musa niyo agamba, "Nalombeza unilagise un'gazi wako utendese."

19 Zumbe Mnungu niyo amhitula, "Neniutende ung'azi wangu utendese womboke ha meso hako na kukulagisa uwedi wangu wose na kudibilikiza dizina dyangu. Ni miye Zumbe Mnungu. Miye neninde na mbazi kwa yudya humuunga. 20 Mna houdahe kunikaula kkihanga changu kwaviya hakuli mnt'hu yeyose akuunga anione niyo agendeela kunda mgima mwe isi. 21 Niyo Zumbe Mnungu amgamba Musa, mna hana hant'hu hagihi na miye noukimale mnanga mwo luwe. 22 Naho umwo ung'azi wangu utendese ukomboka, nohugele mwe diwawi dye mp'hanga yo luwe na kukugubika no mkono wangu, mpaka nide hyomboka kale. 23 Akajika neniuuse mkono wangu, niho nounione kwa kunyuma mna uso wangu houuone."